بۇگىن قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا مادەنيەتتانۋشى-فيلوسوف, PhD دوكتورانت ابىلايحان قالنازاروۆتىڭ «شىمكەنتتىڭ جۇمساق كۇشى. شىمكەنت قالاسىنىڭ برەندىن ءتيىمدى باسقارۋ مەن يميدج-يدەولوگياسىن ىلگەرىلەتۋ بويىنشا كوممۋنيكاتيۆتىك ستراتەگيا (تالداۋلار مەن ۇسىنىستار)» اتتى تۇڭعىش قازاقشا پوليتتەحنولوگيا كىتابىنىڭ تۇساۋكەسەرى ءوتتى, دەپ حابارلايدى Egemen.kz.
سالتاناتتى ءىس-شاراعا «قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى تولەۋبەك مۇقاشەۆ پەن بەلگىلى جۋرناليست زەيىن الىپبەك قاتىسىپ, كىتاپتىڭ قىزىل لەنتاسىن بىرلەسە قيدى.
اتالمىش اناليتيكالىق-ۇسىنىمدىق زەرتتەۋ ەڭبەگى مەملەكەت تىزگىنىن ۇستاعان بارلىق دەڭگەيدەگى باسشىلار مەن يدەولوگتارعا نۇسقاۋلىق-قويىن كىتاپشا رەتىندە ازىرلەنگەن.
قازاقستان تاريحىندا وسى تاقىرىپتا العاش رەت قولعا الىنعان كىتاپ 5 تاراۋ, 432 بەتتەن تۇرادى. تەوريالىق بازاسى ۇلىبريتانيا ۇكىمەتىنىڭ كەڭەسشىسى, ەۋروپا پارلامەنتىنىڭ دەپۋتاتى, اعىلشىن عالىمى سايمون انحولت كونتسەپتسياسىنا نەگىزدەلگەن.
«قازاقستان ءماسليحاتتارى دەپۋتاتتارىنىڭ بىرلەستىگى» رقب توراعاسى تولەۋبەك مۇقاشەۆتىڭ ايتۋىنشا, اتالمىش ەڭبەك ەل ۇكىمەتىنە, اۋماقتىق اتقارۋشى ورگاندارعا زور پايداسىن تيگىزەدى.
«بۇل - ەل يدەولوگتارى ءالى ويعا دا الىپ ۇلگەرمەگەن تىڭ جوبا. بۇل ەڭبەك ءوز مازمۇنىندا ءۇش «قاباتتى» قامتىعان ەكەن: ءبىرىنشىسى - برەندتىك-يميدجدىك, ەكىنشىسى - يدەولوگيالىق جانە ءۇشىنشىسى – ۇلتتىق قۇندىلىقتار ءورىسى. تاپ مۇنداي باسقارۋشىلىققا ارنالعان جۇمىستار ءبىر وڭتۇستىك ءوڭىرى ەمەس, ەلىمىزدىڭ ءار ايماعىنا لايىقتالىپ ازىرلەنۋى ءتيىس. ولاردىڭ جالپى جيىنىنان ەلدىك اۋقىمداعى ورتاق يدەولوگيا سومدالىپ شىعادى», دەدى ت.مۇقاشەۆ.
بۇل رەتتە زەيىن الىپبەك كىتاپتىڭ باسشىلىق, بيلىك پەن قوعام جانە باق اراقاتىناسىنا ارنالعان تۇستارىنا توقتالدى.
«كونتەنتتى بەيىمدەۋ جانە وڭىرلىك-قالالىق باق-پەن جۇمىس ىستەۋگە كوپ ورىن بەرىلىپتى. بۇل ايماقتىق مەديا نارىقتى دامىتۋدىڭ جالپى الەمدىك ءۇردىسى, ياعني جەرگىلىكتى حالىققا ءتۇيىندى حابارلامالاردى نەعۇرلىم ءتيىمدى جەتكىزۋگە مۇمكىندىك بەرەدى. وندا دا جەرگىلىكتى ەرەكشەلىكتى, حالىقتىڭ قالاۋىن, پروبلەمالار مەن مۇددەلەر, وزگەلىك دارەجەسىن, وڭىرلىك نەمەسە بايتاقتىق ماڭىزى بار جاڭالىقتاردى جاريا ەتۋدىڭ جەدەلدىگىن ەسكەرۋ قاجەت. بۇل ء«بىر» دەسەك, ەكىنشى جاعىنان مۇنى ءتۇسىنىپ وقىعان ادام كەمى ءبىر وبلىس نەمەسە قالانىڭ يدەولوگيا جونىندەگى ورىنباسارى دارەجەسىنە دەيىن وسەتىن ءتارىزدى. مەملەكەتتىك قىزمەتتە ءومىر باقي ءجۇرىپ جينايتىن تاجىريبە مۇندا شەبەر سيپاتتالىپ, وپ-وڭاي جانە تۇسىنىكتى تىلمەن جەتكىزىلگەن», دەپ اتاپ ءوتتى جۋرناليست.
ايتا كەتسەك, ءىس-شارا ۇلتتىق اكادەميالىق كىتاپحانانىڭ جاڭادان جابدىقتالعان فاريزا وڭعارسىنوۆا زالىندا ءوتتى.
جيىن سوڭىندا اۆتور پرەزەنتاتسيالانعان كىتاپ دانالارىن قور بازاسىنا ەنگىزۋ ءۇشىن كىتاپحانا ديرەكتورى عازيزا قۇدايبەرگەنگە تابىستادى.