قاراعاندىدا تاكسي جۇرگىزۋشىسىن ءولتىرىپ, كولىكتى ايداپ كەتكەن ازامات 14 جىلعا باس بوستاندىعىنان ايىرىلدى, دەپ حابارلايدى Egemen.kz.
قىلمىستىق ءىس سوتتا «ادام ءولتىرۋ» جانە «كولىك ۇرلاۋ» دەگەن ەكى باپ بويىنشا قارالدى. تاكسي جۇرگىزۋشىسىن ءولتىرۋ وقيعاسى 2022 جىلدىڭ قازان ايىندا بولدى.
سوت تەرگەۋى بارىسىندا بەلگىلى بولعانداي, جولدا جول اقىسىن تولەۋگە بايلانىستى تۋىنداعان جانجال كەزىندە جۇرگىزۋشى جولاۋشىنىڭ بەتىنەن بۇراعىشپەن ۇرعان. سودان كەيىن جولاۋشى قولىنا پىشاق الىپ, جۇرگىزۋشىنى بىرنەشە جەردەن جاراقاتتاعان, جۇرگىزۋشى العان جاراقاتتارىنان كوز جۇمدى. كەيىن سوتتالۋشى كولىكتى ايداپ كەتكەن.
«سوتتالۋشىنىڭ كىناسى كۋاگەرلەردىڭ جاۋاپتارىمەن, ساراپتاما قورىتىندىسىمەن جانە قىلمىستىق ءىستىڭ باسقا دا ماتەريالدارىمەن دالەلدەندى. پروكۋرور ونى تاعىلعان ەكى باپ بويىنشا دا كىنالى دەپ تانىپ, 14 جىلعا باس بوستاندىعىنان ايىرۋدى سۇرادى. جابىرلەنۋشى تاراپ سوتتالۋشىنى ءومىر بويىنا باس بوستاندىعىنان ايىرۋ جازاسىنا كەسىپ, 20 ميلليون تەڭگە مورالدىق زياندى وتەۋ تۋرالى تالاپ قويعان», دەپ حابارلادى سوتتىڭ ءباسپاسوز قىزمەتىنەن.
سوتتالۋشىنىڭ قورعاۋشىسى سوتتالۋشىنىڭ ارەكەتىن قازاقستان رەسپۋبليكاسى قىلمىستىق كودەكسىنىڭ 106-بابىنىڭ 1-بولىگى «دەنساۋلىققا قاساقانا اۋىر زيان كەلتىرۋ» بويىنشا سارالاۋدى جانە اۆتوكولىكتى ايداپ اكەتۋ فاكتىسى بويىنشا ەڭ تومەنگى جازا تاعايىنداۋدى سۇرادى.
سوت بارلىق دالەلدەمەلەردى, ايعاقتاردى جانە ساراپتاما ناتيجەلەرىن زەرتتەپ, سوتتالۋشىنى 14 جىلعا باس بوستاندىعىنان ايىردى.
«ونىڭ ارەكەتىندە قىلمىستىڭ قاۋىپتى قايتالانۋى انىقتالدى, ويتكەنى ول بۇرىن قىلمىستىق جاۋاپكەرشىلىككە تارتىلعان. سونداي-اق سوتتالعان ازاماتتان جابىرلەنۋشى تاراپتىڭ پايداسىنا مورالدىق زياندى وتەۋ رەتىندە 10 ميلليون تەڭگە ءوندىرىلدى», دەدى سوت.