اتىراۋدا قىمبات كولىگىنە ساندارى مەن ارىپتەرى بىردەي VIP ءنومىر تاعاتىندار قاتارى از ەمەس. ولار بىلتىر وسىنداي نومىرلەر ساتىپ الۋعا 241 ملن 307 مىڭ تەڭگە جۇمساعان.
«ازاماتتارعا ارنالعان ۇكىمەت» مەملەكەتتىك كورپوراتسياسى» كەاق وبلىستىق فيليالىنىڭ ءباسپاسوز قىزمەتى ءمالىم ەتكەندەي, اتىراۋلىق جۇرگىزۋشىلەر اراسىندا VIP نومىرلەرگە سۇرانىس ارتقان. ماسەلەن, بۇرناعى جىلى اتىراۋلىق جۇرگىزۋشىلەر 961 VIP ءنومىر ساتىپ الۋ ءۇشىن 249 ملن 335 مىڭ 283 تەڭگە تولەگەن. ال بىلتىر مۇنايلى وڭىردە تىركەلگەن كولىكتەرگە 241 ملن 307 مىڭ 788 تەڭگەنىڭ VIP نومىرلەرى تاعىلعان.
– ەڭ قىمبات ءنومىردىڭ بىرەۋى 983 مىڭ 250 تەڭگەگە باعالاندى. جۇرگىزۋشىلەردىڭ سۇرانىسىنا بايلانىستى ارقايسىسى 786 مىڭ 600, 472 مىڭ 650 جانە 196 مىڭ 650 تەڭگەگە باعالانعان VIP نومىرلەر ساۋداعا شىعارىلدى. وتكەن جىلى سانى مەن ارىپتەر ءتىزىلىمى بىردەي 856 مەملەكەتتىك تىركەۋ بەلگىسى بار ءنومىر راسىمدەلدى, – دەپ حابارلادى وڭىرلىك فيليالدىڭ ءباسپاسوز قىزمەتى.
بيىل ايلىق ەسەپتىك كورسەتكىشتىڭ وسۋىنە بايلانىستى جوعارى سۇرانىسقا يە VIP نومىرلەر قۇنى 196 مىڭ 650-دەن باستالىپ, 983 مىڭ 250 تەڭگە ارالىعىندا قۇبىلادى. مەملەكەتتىك نومىرلەر قۇنى ساندىق جانە ارىپتەر سايكەستىگىنە بايلانىستى وزگەرەدى. ال قاراپايىم مەملەكەتتىك نومىرلىك تىركەۋ تاڭبالارى 9 مىڭ 660 تەڭگەنى قۇرايدى.
– كولىككە تاعىلاتىن مەملەكەتتىك ءنومىر يەسى ونى وزگە ادامعا سىيلاۋىنا, ساتىلىمعا شىعارۋىنا بولمايدى. بۇرىنعى كولىگىن ساتقان بولسا, جاڭا كولىك العانشا – 6 ايعا دەيىن مەملەكەتتىك ءنومىر بەلگىسىن حالىققا قىزمەت كورسەتۋ ورتالىعىندا ساقتاۋىنا بولادى, – دەپ ءمالىم ەتتى ءباسپاسوز قىزمەتى.
اتىراۋ وبلىسى