بيىل ەلوردادا مەكسيكا ەلشىلىگى اشىلادى. بۇل تۋرالى قازاقستان رەسپۋبليكاسى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى, دەپ حابارلايدى Egemen.kz.
«2023 جىلعى 12-13 قاڭتاردا مەحيكا قالاسىندا مەكسيكانىڭ سىرتقى ىستەر ءمينيسترى مارسەل ەۆراردتىڭ سول ەلدە اككرەديتتەلگەن ديپلوماتيالىق كورپۋسپەن 34-ءشى جىل سايىنعى كەزدەسۋى ءوتتى. مينيستر ءوز سوزىندە بيىلعى ماقساتتار تۋرالى ايتا وتىرىپ, 2023 جىلى مەكسيكا 5 جاڭا ەلشىلىكتى, ونىڭ ىشىندە قازاقستاندا دا ەلشىلىك اشاتىنىن رەسمي تۇردە جاريالادى. قازاقستان مەكسيكا ۇكىمەتىنىڭ شەشىمىن قۇپتايدى جانە مەكسيكانىڭ استانادا ەلشىلىك اشۋىنا كومەك كورسەتۋگە دايىن», دەدى ول بريفينگ بارىسىندا.