سەنات دەپۋتاتتارىن سايلاۋ اياقتالدى. جاقىندا ءماجىلىس دەپۋتاتتارىنىڭ سايلاۋىن كۇتىپ وتىرمىز. بۇعان دەيىن ۇكىمەتتىڭ قۇرامى ءىشىنارا جاڭارتىلعانىن كوردىك. ەلىمىزدە بولىپ جاتقان وسىنداي ساياسي وزگەرىستەر تىڭ سەرپىلىس اكەلەدى دەپ سەنەمىز.
ۇكىمەتتىڭ جاڭا قۇرامى تولىق جاساقتالدى دەپ ايتۋعا ءالى ەرتە. ۇكىمەتكە تاعايىندالىپ جاتقان جاڭا مينيسترلەرگە قاتىستى قوعامدا ءارتۇرلى پىكىر بار. بىرەۋلەرى تاجىريبەسى از دەسە, ەندى ءبىرى جاس دەيدى. ياعني «حالىقارالىق ارەنادا وزدەرىن قالاي ۇستاي الادى؟», «ەلىمىزدىڭ ابىرويى مەن اتاعىن بەلگىلى دەڭگەيدە قورعاي الا ما, جوق پا؟» دەگەن قورقىنىش بار. بۇعان دا كوڭىل ءبولۋىمىز كەرەك. ايتپاعىم, ەلدىڭ اراسىندا ءجۇرىپ, ولاردى حالىق تانىپ, بەدەلى كورىنىپ جاتقاندار سايلاناتىن بولسا, جۇرت تا ونى قولداپ, وڭ كوزقاراسپەن قارايتىنى انىق. جاڭادان سايلانىپ جاتقان دەپۋتاتتار ەلىمىزگە ءبىر وزگەرىس اكەلەتىنىنەن ءۇمىتتىمىز.
حالىقتىڭ ىشىنەن جاڭا تۇلعالار بيلىككە كەلەتىن بولسا, وندا كوپ وزگەرىس بولاتىنى ءسوزسىز. حالىق يدەياسى مىقتى, ىسكەرلىگى جوعارى جاڭا ادامداردى كۇتەدى. ەلدىڭ ساناسىندا قالىپ قويعان كەشەگى شەرحان مۇرتازا, فاريزا وڭعارسىنوۆا, امانگەلدى ايتالى سياقتى تۇلعالار بار. نەگە قازىر وسىنداي ادامدار جوق؟! بۇل تۇلعالار قازىرگى دەپۋتاتتارعا ۇلگى بولۋ قاجەت. شىنىن ايتساق, قازىرگى دەپۋتاتتاردى ەل-جۇرت تانىمايدى جانە كىم ەكەنىن بىلمەيدى. ولاردى قاراپايىم حالىق بىلمەسە, قانداي وزگەرىس كۇتۋگە بولادى؟ نەعۇرلىم كوپ وزگەرىستى كۇتۋ ءۇشىن سايلاۋ ءادىل جانە اشىق ءوتۋى قاجەت.
پرەزيدەنت وزگەرىستەرگە باستاما بولاتىن بىرقاتار مۇمكىندىكتى كورسەتىپ بەردى. ونى جۇزەگە اسىراتىن وسى جاڭا قۇرام. ءۇمىتىمىز وتە زور. دەپۋتاتتار حالىقتىڭ مۇددەسىن قورعايدى دەگەن سەنىمدەمىز.
قايرات ايتباي,
ساياساتتانۋشى