پرەزيدەنت قاسىم-جومارت توقاەۆ ۇلىقتاۋ راسىمىندە كونستيتۋتسياعا سايكەس بيلىك تارماقتارى تۇگەل جاڭعىرتىلاتىنىن ايتقان ەدى. «بارلىق ماسەلە, اسىرەسە تۇيتكىلدى جانە داۋلى پروبلەمالار كونسترۋكتيۆتى ديالوگ ارقىلى, ەڭ الدىمەن, پارلامەنتتە شەشىلۋگە ءتيىس.
الداعى سەنات جانە ءماجىلىس سايلاۋى وسى مۇمكىندىكتى بەرەدى» دەگەن مەملەكەت باسشىسى سەناتتىڭ ساپالىق تۇرعىدا قۇرامىن جاقسارتۋدى العا قويعان بولاتىن. 14 قاڭتاردا وتكەن سايلاۋ – وسى ساياسي وزگەرىستەردىڭ انىق ناتيجەسى دەپ بىلەمىن.
ياعني بۇل ساياسي ءىس-شارالار پرەزيدەنتتىڭ العا قويعان ماقساتتارىنىڭ بىرتىندەپ ورىندالىپ جاتقانىن اڭعارتادى. دەپۋتاتتىق كورپۋستىڭ جاڭا وكىلدەرى قازاقستاننىڭ ساياسي رەفورمالىق تۇرعىدان وركەندەۋىنە ەلەۋلى ۇلەس قوسادى دەگەن سەنىم مول. اسىرەسە جاستاردىڭ كۇنى بۇگىنگە دەيىن ءتۇيىنى تارقاماعان وزەكتى دە وتكىر ماسەلەلەرى شەشىمىن تابادى دەپ ۇمىتتەنەمىز. ويتكەنى ءار وڭىردەن ىرىكتەلىپ, جاسىرىن داۋىسپەن سايلانعان سەنات دەپۋتاتتارى سول ايماقتىڭ پروبلەماسىن بۇگە-شىگەسىنە دەيىن بىلەتىن حالىق قالاۋلىلارى.
بايقاپ قاراساق, بۇگىندە سەنات سايلاۋىندا دەپۋتاتتىق مانداتقا يە بولعانداردىڭ باسىم بولىگى پارتيالىق تىزىمنەن ەمەس, ءوزىن-ءوزى ۇسىنعاندار. بۇل – ازاماتتىق قوعامدا جەكە ساياسي مۇددەنىڭ ارتىپ كەلە جاتقانىنىڭ كورىنىسى.
ابىلايحان ءابدىراش,
«مەديتسينا جاستارى» رقب توراعاسى