اقش, كانادا جانە مەكسيكا باسشىلارى مەحيكوداعى سولتۇستىك امەريكا ەلدەرىنىڭ سامميتىنە قاتىسىپ, حالىقارالىق ساۋدا, زاڭسىز كوشى-قون جانە ايماقتىق ماسەلەلەر بويىنشا ءوز ويلارىمەن ءبولىستى, دەپ حابارلايدى Egemen.kz.
اقش پرەزيدەنتى دجو بايدەن, مەكسيكا پرەزيدەنتى اندرەس مانۋەل لوپەس وبرادور جانە كانادا پرەمەر-ءمينيسترى دجاستين تريۋدو ەنەرگەتيكالىق ماسەلەلەردى شەشۋ, كليماتتىڭ وزگەرۋىنىڭ اسەرىن ازايتۋ, پاندەميادان كەلەتىن قاۋىپتىڭ الدىن الۋ, ايماقتىق ستراتەگيانى قالىپتاستىرۋ جاعدايىن تالقىلادى.
اقش كانادانى گايتيدەگى حالىقارالىق ميسسيانى باسقارۋعا كومەكتەسۋگە شاقىردى. بايدەننىڭ ايتۋىنشا, بۇل كاريب تەڭىزى ارالدارىنداعى مەملەكەتتەرگە گۋمانيتارلىق داعدارىستى شەشۋگە كومەكتەسەدى.
سامميت بارىسىندا اقش پەن مەكسيكا باسشىلارى زاڭسىز ميگرانتتارمەن كۇرەسۋ ستراتەگياسىن تالقىلادى. تەك 2022 جىلدىڭ وزىندە امەريكادا 2,3 ميلليوننان استام زاڭسىز ميگرانت تىركەلگەن.
سونداي-اق كەزدەسۋ بارىسىندا مەكسيكا پرەزيدەنتى اندرەس مانۋەل دجو بايدەندى لاتىن امەريكاسىنداعى ساياسي-الەۋمەتتىك جاعدايلارعا نازار اۋدارۋعا, اسىرەسە كوشى-قون داعدارىسىن شەشۋگە شاقىردى. ءوز سوزىندە اندرەس مانۋەل امەريكالىق جۇمىس بەرۋشىلەردى قۇجاتسىز جۇرگەن مەكسيكالىق ميگرانتتارعا ءار ءتۇرلى سالالاردا جۇمىس ىستەۋگە كوبىرەك مۇمكىندىك بەرۋىن سۇرادى.
گۇلشاحرا سانسىزباي