بۇگىن «سامارا-شىمكەنت» تاسجولىنىڭ 1153-ءشى شاقىرىمىندا ىرعىز اۋدانىنان 20 كم جەردە جولاۋشىلار اۆتوبۋسى جولدا قالىپ قويعان, دەپ حابارلايدى Egemen.kz.
اقتوبە وبلىسى تجد ءباسپاسوز قىزمەتىنىڭ مالىمەتىنشە, اۆتوبۋستا 3 قازاقستان ازاماتى مەن 38 وزبەكستان رەسپۋبليكاسىنىڭ ازاماتى بولعان. اۋا رايىنىڭ قولايسىزدىعىنا بايلانىستى, جولدىڭ جابىق بولۋ سالدارىنان بارلىق جولاۋشىلار ىرعىز اۋىلىنداعى ورتا مەكتەپكە ورنالاستىرىلعان.
سونداي-اق بۇگىن ايتەكە بي اۋدانىندا «سامارا-شىمكەنت» تاسجولىنىڭ 968-ءشى شاقىرىمىندا, قارابۇتاق كەنتىنەن 2 كم جەردە جولاۋشىلار اۆتوبۋسى تۇرعانى تۋرالى اقپارات كەلىپ تۇسكەن. اۆتوبۋستا بارلىعى 31 ادام بولعان, ولار وزبەكستان رەسپۋبليكاسىنىڭ ازاماتتارى.
«اۋا رايىنىڭ قولايسىزدىعىنا بايلانىستى, جولدىڭ جابىق بولۋ سالدارىنان بارلىق جولاۋشىلار, قارابۇتاق اۋىلىنىڭ مەشىتىنە ورنالاستىرىلدى», دەلىنگەن حابارلامادا.