وتاندىق مادەنيەت تاريحىنا قاتىستى جازىلعان «قازاقستان ونەرى», «قازاقستان گرافيكاسى», «قوجا احمەت ياساۋي ماۆزولەيى» ەڭبەكتەرىنىڭ اۆتورى, تانىمال قىلقالام شەبەرى ناعىمبەك نۇرمۇحاممەدوۆتىڭ ەسىمىن جەرلەستەرى ءاردايىم ەسكە الىپ جۇرەدى. جۋىقتا وبلىستىق كوركەمسۋرەت مۋزەيىنە تۇلعانىڭ ەسىمى بەرىلدى.
پاۆلودار وبلىستىق كوركەمسۋرەت مۋزەيى بۇدان بىلاي حالىق سۋرەتشىسى ناعىمبەك نۇرمۇحاممەدوۆتىڭ ەسىمىمەن اتالادى. قۋانىشتى وقيعاعا وراي قىلقالام شەبەرىنىڭ سۋرەتتەرىنەن كورمە ۇيىمداستىرىلىپ, ءتۇرلى تاقىرىپتاعى كارتينالار كوپشىلىككە كوزايىم بولدى.
ناعىمبەك نۇرمۇحاممەدوۆ كوزىنىڭ تىرىسىندە وتاندىق بەينەلەۋ ونەرى مەن كوركەمسۋرەت مادەنيەتىن دامىتۋعا باعا جەتپەس ۇلەس قوسقان جان. ول – ەكىنشى دۇنيەجۇزىلىك سوعىستىڭ ارداگەرى, قازاق كسر حالىق سۋرەتشىسى, ونەرتانۋ عىلىمدارىنىڭ كانديداتى, ش.ءۋاليحانوۆ اتىنداعى قازاق كسر مەملەكەتتىك سىيلىعىنىڭ لاۋرەاتى. سۋرەتشى 1924 جىلى باياناۋىل اۋدانىنىڭ سايتاندى دەگەن جەرىندە دۇنيەگە كەلگەن. مايدان دالاسىنان امان-ەسەن ورالعان سوڭ 1947-1953 جىلدارى لەنينگرادتاعى يليا رەپين اتىنداعى كەسكىندەمە, ءمۇسىن جانە ساۋلەت ينستيتۋتىندا پروفەسسور ر.ر.فرەنتستىڭ جەتەكشىلىگىمەن ءبىلىم العان. 1959 جىلى الماتىعا كوشىپ, ونەر اكادەمياسىن ءتامامدادى. نەگىزىنەن رەاليزم جانە يمپرەسسيونيزم باعىتتارىندا ىزدەنىپ, كوپتەگەن پورترەت پەن پەيزاجدى, تاريحي تاقىرىپتاعى كارتينالاردى سالعان.
وڭىردەگى سۋرەتشىلەر وداعى قوعامدىق بىرلەستىگىنىڭ توراعاسى وسەرباي شۇرانوۆ اتاپ وتكەندەي, سۋرەتشىنىڭ بۇكىل شىعارماشىلىعى ۇلكەن كەنەپتەرگە تۇسىرىلگەن كەسكىندەمەلەردىڭ ەركىندىگىمەن, تۇستەر ۇيلەسىمدىلىگىمەن, تاقىرىپقا پسيحولوگيالىق تۇرعىدان بويلاۋىمەن, بەينەلەردىڭ ليريكاسىمەن ەرەكشەلەنەدى.
– نۇرمۇحاممەدوۆ قازاق دالاسىنداعى قاراپايىم ادامداردىڭ ەڭبەگىن بەينەلەۋدى ەرەكشە جاقسى كوردى. اباي قۇنانباي ۇلى, ءابىلحان قاستەەۆ, ساپارعالي بەگالين, توقاش بوكين, مالىك عابدۋللين, تالعات بيگەلدينوۆ سياقتى تانىمال تۇلعالاردىڭ پورترەتتەرىن سالعان. جەتى جاسىندا اكەسى قايتىس بولىپ, ءنوۆوسىبىر, كەيىن الماتىدا جەتىمدەر ۇيىندە تاربيەلەنگەن. ءبىلىم الۋىنا قازاق عىلىم اكادەمياسىنىڭ نەگىزىن سالۋشى قانىش ساتباەۆ كوپ كومەك كورسەتىپتى. جازۋشى قالمۇقان يساباەۆ ەستەلىگىندە كەلتىرگەندەي, بىردە قانىش اعانىڭ كابينەتىندە وتىرسا, ءبىر جاس جىگىت كىرىپ كەلىپ, سالەمدەسىپ كەتەدى. الگى جىگىتتى ودان كەيىن دە بىرنەشە رەت كورەدى. تەگىن ەمەس ەكەنىن بىلگەن قالامگەر «بۇل بالا كىم؟» دەپ قانەكەڭنەڭ سۇرايدى عوي. قانىش اعامىز: «بۇل – ناعىمبەك دەگەن جاس سۋرەتشى. اتا-اناسىنىڭ قولىنان ءدام تاتقان ەدىم. قازىر اكە-شەشەسى قايتىس بولدى, ەشكىمى جوق, سوندىقتان قارايلاسىپ ءجۇرمىن», دەپ ايتقان ەكەن. سول جاس جىگىت كەيىن ونەرىمەن ءدۇيىم وداققا تانىمال بولادى. وسىنداي اتاقتى جەرلەسىمىزدىڭ ەسىمى وبلىستىق كوركەمسۋرەت مۋزەيىنە بەرىلىپ وتىرعانى ءبىزدى ايرىقشا قۋانتتى, – دەيدى ءو.شۇرانوۆ.
سۋرەتشى كوزىنىڭ تىرىسىندە وتاندىق ونەر تاريحىن زەرتتەپ, «قازاقستان ونەرى», «قازاقستان گرافيكاسى», «قوجا احمەت ياساۋي ماۆزولەيى», «قازاقستان سۋرەتشىلەرى – ەكىنشى دۇنيەجۇزىلىك سوعىسقا قاتىسۋشىلار» دەگەن ەڭبەكتەر جازدى. فرانتسيا, برازيليا, جاپونيا ەلدەرىنە شىعارماشىلىق ساپارمەن بارىپ كورمەلەر ۇيىمداستىرعان, سۋرەتتەر توپتاماسىن جاساعان. سالعان كارتينالارى كانادا, بەلگيا, يۋگوسلاۆيا, فينليانديا كورمەلەرىندە قويىلدى. قازاقستاننىڭ بەينەلەۋ ونەرى جونىندە كىتاپتار مەن البومدار شىعاردى. «ەڭبەك داڭقى ەرلەرى» توپتاماسى قازكسر مەملەكەتتىك سىيلىعىن العان.
كورمەدە قىلقالام شەبەرىنىڭ 27 تۋىندىسى ۇسىنىلدى. الماتىدان ارنايى كەلگەن مارا ناعىمبەكقىزى كوركەمسۋرەت مۋزەيىنە اكەسىنىڭ ەكى كارتيناسىن سىيعا تارتتى.
«اكەم تۋعان توپىراققا ءبىرىنشى رەت اياق باسىپ تۇرمىن. شاھاردا ناعىمبەك نۇرمۇحاممەدوۆتىڭ شىعارماشىلىعى بەينەلەنگەن ايالداما بارىن كورىپ, كەرەمەت تولقىدىم. جەرلەستەرى سۋرەتشىنىڭ ەڭبەگىن ۇمىتپاي, جاس ۇرپاققا ونىڭ باي سۋرەت گالەرەياسىنان اقپارات ۇسىنىپ, تانىتۋى وڭىردەگى مادەنيەت سالاسى باسشىلىعىنىڭ دۇرىس باعىتتا جۇمىس ىستەپ وتىرعانىن كورسەتسە كەرەك. مۋزەيگە ەسىمى بەرىلەتىنىن ەستىگەندە ايرىقشا قۋاندىم. جەرگىلىكتى مادەنيەت مەكەمەلەرىنە العىسىم شەكسىز. اكەم ەڭبەكسۇيگىش جان ەدى. ادامدارمەن ارالاسقاندا اقيقاتتى ايتقاندى ۇناتاتىن», دەيدى قىلقالام شەبەرىنىڭ قىزى مارا ناعىمبەكقىزى.
پاۆلودار