قالا تۇرعىندارى مەن قوناقتارىنا ارنالعان كىتاپتا اباي وبلىسىنداعى تاريحي جەرلەر, فوتوسۋرەت, دەرەكتەر مەن ەسكەرتكىشتەر تۋرالى مالىمەتتەر جيناقتالعان. «كيەلى اباي ەلى» كىتاپ-البومى 1000 داننامەن قازاق, ورىس, اعىلشىن تىلدەرىندە جارىققا شىقتى, دەپ حابارلايدى Egemen.kz.
«سەمەي وتكەن عاسىردىڭ باسىندا قازاق رۋحانياتىنىڭ استاناسى سانالدى. ابايدان باستاۋ الىپ, الاش قايراتكەرلەرىمەن جالعاسقان ۇلى جول حالقىمىزدى جاڭا دەڭگەيگە كوتەردى. 2020 جىلى مەملەكەت باسشىسى قاسىم-جومارت توقاەۆتىڭ شەشىمىمەن سەمەيدىڭ ەلىمىزدىڭ تاريحي ورتالىعى مارتەبەسىن الۋى كەزدەيسوق قۇبىلىس ەمەس ەدى. 2022 جىلى جاڭا, دەربەس ايماق - اباي وبلىسىنىڭ قۇرىلۋى ادىلدىك كوشىنىڭ جالعاسىنا اينالدى. بۇل جەر - تاريحتىڭ قاينار كوزى. ساۋلەت پەن مەموريالدىق قۇرىلىس, تاريح پەن عىلىم, مادەنيەت پەن ءبىلىم بەرۋ, ينجەنەرلىك تەحنولوگيالار مەن وزگە سالا نىساندارى ماڭىزدى وقيعالاردىڭ كۋاسىندەي, بۇگىنگە دەيىن وتكەن كۇننەن سىر شەرتەدى. تاريحتى ءبىلىپ, تۇسىنۋدە - كەلەشەك دامۋىمىزدى ايقىندايتىن داڭعىل جول بار», دەپ جازىلعان وبلىس اكىمى نۇرلان ۇرانحاەۆتىڭ العىسوزىندە.
بەلگىلى جۋرناليست اللا بەلياكينا بۇل كىتاپ اباي وبلىسىنداعى ءبىرىنشى شىعارىلعان كىتاپ جانە مۇقاباسىنداعى ءتۇس جاڭادان قۇرىلعان ءوڭىردىڭ جاڭاشىلدىعىن, العا ۇمتىلىسىن بىلدىرەدى دەگەن پىكىرىمەن ءبولىستى.
كىتاپتىڭ ءبىرىنشى بولىگىندە «اباي جولىنا» ارنالىپ ۇلى تۇلعانىڭ ومىرىنەن دەرەكتەر كەلتىرىلىپ, شىعارماشىلىعى باياندالادى. مۇحتار اۋەزوۆتىڭ رومان-ەپوپەياسىنىڭ نەگىزىندە گەوگرافيالىق جانە ساكرالدى جەرلەر تۋرالى بىلۋگە بولادى. بۇل بولىمدە اباي قۇنانباي ۇلىنىڭ ەسىمىمەن بايلانىستى ەسكەرتكىشتەرمەن جانە مۇراجايلارمەن تانىسۋعا بولادى.
ەكىنشى بولىمدە وبلىستىڭ اكىمشىلىك ورتالىعى سەمەي قالاسى تۋرالى باياندالادى. تاريحي مۇراعا باي قالادا ەڭ ءبىرىنشى تەلەگراف, سۋ جۇيەلەرى, تەلەفون, كينەماتوگرافيا عيماراتى اشىلىپ, وركەنيەتتىڭ جەتىستىكتەرى حالىق يگىلىگىنە بەرىلگەن.
ءۇشىنشى بولىمدە اباي وبلىسىنىڭ قوناقجايلىعى, حالىق ءجيى باراتىن كيەلى جەرلەر تۋرالى ايتىلادى. بۇگىندە ەلىمىزدىڭ ماقتانىشى ەل تۇرعىندارى مەن تۋريستەر كوپ كەلەتىن الاكول, كيەلى ولكە «قوڭىر اۋليە» ۇڭگىرى, سۋى شيپالى شوشقالى كولى تۋرالى جان-جاقتى قىزىقتى اقپاراتتار جاريالانعان.
«كىتاپتى باسپاعا دايىنداۋ بارىسىندا وزىندىك قيىندىقتار بولدى. سەبەبى بۇكىل وبلىستى ايتپاعاندا قالانىڭ وزىندە قىزىقتى, تاريحي قۇندى دەرەكتەر كوپ. ولاردى تاڭداۋ بىزگە وتە قيىن بولدى. جالپى وبلىسىمىزداعى اۋداندار دا تاريحي قۇندى دەرەكتەرگە باي», دەيدى اللا بەلياكينا.
جاڭا كىتاپ-البومداعى فوتوسۋرەتتەر وقىرمانعا ءوڭىر تاريحى تۋرالى كەڭىنەن ماعلۇمات بەرەدى.