بيىل ون جەتى جاسقا تولاتىن قازاقستان رەسپۋبليكاسىنىڭ ەر ازاماتتارى اسكەرگە شاقىرۋ ۋچاسكەلەرىنە تىركەلۋگە جاتادى. ءىس-شارالار اۋداننىڭ (وبلىستىق ماڭىزى بار قالانىڭ) قورعانىس ىستەرى جونىندەگى باسقارمالارى مەن بولىمدەرىندە تۇراقتى نەمەسە ۋاقىتشا تۇرۋى بويىنشا وتكىزىلەدى, دەپ حابارلايدى Egemen.kz.
«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» قازاقستان رەسپۋبليكاسى زاڭىنىڭ 16-بابىنا جانە قورعانىس ءمينيسترىنىڭ 2017 جىلعى 24 قاڭتارداعى №28 بۇيرىعىمەن بەكىتىلگەن «اسكەري مىندەتتىلەر مەن اسكەرگە شاقىرىلۋشىلاردى اسكەري ەسەپكە الۋ قاعيدالارىنىڭ» 17-بابىنا سايكەس جىل سايىن قاڭتاردان ناۋرىزعا دەيىن جەرگىلىكتى اتقارۋشى ورگاندار جەرگىلىكتى اسكەري باسقارۋ ورگاندارىمەن بىرلەسىپ, ازاماتتاردى اسكەرگە شاقىرۋ ۋچاسكەلەرىنە تىركەۋدى جۇرگىزەدى.
تىركەۋ ازاماتتاردى اسكەري ەسەپكە الۋ, ولاردىڭ سانىن, اسكەري قىزمەتكە جارامدىلىق ساناتىن ايقىنداۋ, ءبىلىم دەڭگەيىن, العان ماماندىعىن جانە دەنە شىنىقتىرۋ دايارلىعى دەڭگەيىن بەلگىلەۋ ماقساتىمەن جۇرگىزىلەدى.
كورسەتىلگەن مالىمەتتەر نەگىزىندە جەرگىلىكتى اسكەري باسقارۋ ورگاندارى اسكەرگە شاقىرۋ رەسۋرستارىن قارۋلى كۇشتەر اسكەرلەرىنىڭ, باسقا دا اسكەرلەر مەن اسكەري قۇرالىمداردىڭ تۇرلەرى مەن تەكتەرى بويىنشا الدىن الا ءبولۋ مەن قورعانىس مينيسترلىگىنىڭ اسكەري وقۋ ورىندارىنا تۇسەتىن كانديداتتارعا ىرىكتەۋ جۇرگىزەدى.
تىركەۋ بارىسىندا جاستارمەن اڭگىمەلەسۋ, قاجەتتى قۇجاتتاردى تەكسەرۋ جانە ەمدەلۋگە نەمەسە مەديتسينالىق باقىلاۋعا مۇقتاج جاستاردى انىقتاۋ ماقساتىندا مەديتسينالىق تەكسەرۋ جۇرگىزىلەدى.
ءىس-شارالار اياقتالعان سوڭ جاستارعا شاقىرۋ ۋچاسكەسىنە تىركەلگەنى تۋرالى كۋالىك – قازاقستان ازاماتىنىڭ العاشقى جەكە ەسەپكە الۋ-اسكەري قۇجاتى بەرىلەدى.
بيىل بارلىعى 110 000-نان استام جاس اسكەري ەسەپكە قابىلدانادى دەپ جوسپارلانىپ وتىر.