قىس – قاتال سىنشى

ابىروي بولعاندا توتەنشە جاعدايلار دەپار­تا­مەنتىنىڭ قىزمەتكەرلەرى قۇلاعدار بولا سالا اتقا قونعان. ايتسە دە, اق تۇتەك بوران العا ۇمتىلعان قادامدى كەرى سەرپىپ, قارعا ادىم جەر جىلجۋدىڭ ءوزى مۇڭ بولعان شاقتا جان جىلىتار جاردەم قولىن سوزعانىمەن, دىتتەگەن جەرگە جەتۋدىڭ ءوزى وڭاي ەمەس.

وقيعا بىلاي وربىگەن ەكەن. ءتورت جولاۋشى «نيۆا» اۆتوكولىگىمەن ەرەيمەنتاۋ قالاسىنان شالعايداعى ماساقپايعا ساپار شەككەن.

– ءبىز شىققاندا كۇن اشىق ەدى, – دەيدى جولاۋ­شىنىڭ ءبىرى تالعات بايتەمىروۆ, – قايتاردا بوران كوتەرىلىپ كەتتى. جول جابىلدى. ىمىرت ۇيىرىلگەن سوڭ توڭىرەكتى بولجاۋدان قالدىق. كەشكى ساعات توعىزدان تاڭعى تورتكە دەيىن جول بويىنداعى تاۋ-تەڭىز قاردى جانتالاسىپ كۇرەكپەن تازالاپ ارەكەت ەتكەنىمىزبەن وتە المادىق.

«قىرسىققاندا قىمىران ءىريدى» دەگەندەي, كوز بايلانعان سوڭ جول سۇلباسىن انىق باعدارلاي الماعان جولاۋشىلار جول جيەگىنە ءتۇسىپ كەتكەن. جارعا جانتايا قۇلاعان كولىك ىستەن شىققان. ءىستىڭ ناسىرعا شاپقانىن اڭعارعان جولاۋشىلار ىلە قۇتقارۋ قىزمەتىنە تەلەفون شالىپ, قاي جەردە جولدا قالعاندىقتارىن تۇسىندىرگەن. ارادا ءۇش ساعات وتكەننەن كەيىن تەلەفون قۋاتى دا وشكەن. بورانمەن الىسقان جولاۋشىلار دا قاجىعان. سۋىق كولىكتىڭ ىشىندە كوزدەرى ءىلىنىپ كەتسە كەرەك. تاڭعى ساعات سەگىزدىڭ شاماسىندا وقيعا ورنىنا جەتكەن قۇتقارۋشىلار جول جيەگىندەگى كولىكتىڭ تەرەزەسىن قاعىپ, جولاۋشىلاردى وياتىپ الىپ, جىلى كيىندىرىپ, ىستىق شاي ىشكىزىپ, ەستەرىن جيناتىپتى.

انىق اجالدان امان قالعان جولاۋشىلار بولسا اق تۇتەك بورانمەن الىسىپ, باستارىن بايگەگە تىگىپ, جان ۇشىرىپ جەتكەن توتەنشە جاعدايلار دەپارتامەنتىنىڭ جاۋجۇرەك قىزمەتكەرلەرى ءىلياس اۋباكىروۆ, قۋان اقىلبەكوۆ, بايىرلى كوپەنوۆ جانە ساعىنىش بىلالوۆتەرگە العىستارىن جاۋدىردى.

بۇل جولعى وقيعا شيەلەنىسىپ شيرىققانىمەن, ءبىرشاما ءساتتى اياقتالدى. اياق-قول توڭعانىمەن, باس امان. بىراق الداعى ۋاقىتتا جولاۋشى بىتكەن قىستىڭ قاتال سىنشى ەكەنىن ەستەن شىعارماسا ەكەن دەيمىز. وزدەرى عانا ەمەس, ءدۇيىم جۇرتتى ابىگەرگە سالۋدىڭ قاجەتى جوق. ونىڭ ۇستىنە سوڭعى تاۋلىكتەردە كۇن ەرەسەن سۋىتىپ تۇر. ال ايدالادا اق بوراندا اداسۋ اجالدىڭ سۋىق قۇشاعىنا ءوزىڭ تىلەنىپ بارعانمەن بىردەي.

اقمولا وبلىسى