قىزىلوردا وبلىسىندا ءبىلىم وردالارىنان بىلىق شىقتى. ايماقتاعى سەگىز مەكتەپتىڭ ديرەكتورى مەن ەسەپشىلەرى ءىرى مولشەردە مەملەكەت قارجىسىن جىمقىرعانى انىقتالدى, دەپ حابارلايدى Egemen.kz Qazaqstan تەلەارناسىنا سىلتەمە جاساپ.
بۇگىندە سىبايلاس جەمقورلىققا قارسى ءىس-قيمىل دەپارتامەنتى سوتقا دەيىنگى تەرگەپ-تەكسەرۋ ارەكەتتەرىن جۇرگىزىپ جاتىر.
التى زاڭبۇزۋشىلىق دەرەك ءبىر عانا جاڭاقورعان اۋدانىندا تىركەلىپ وتىر. جاۋاپتىلار مەكتەپتە مۇلدەم جۇمىس ىستەمەيتىن تۇلعالارعا ەڭبەكاقى اۋدارىپ, قۇجاتتاردى بۇرمالاپ كەلگەن.
سونداي-اق قىزىلوردا قالاسىنداعى №112 مەكتەپتىڭ كۇزەتشىسىنە ءبىر ايدا 6 ميلليون تەڭگە ۇستەماقى تولەنگەن. وسىنداي سىبايلاس جەمقورلىق دەرەكتەرىنەن كەيىن وبلىستاعى بارلىق ءبىلىم وشاقتارىنا ءجىتى تەكسەرۋ جۇرگىزىلمەك.
«تەك ءبىر عانا №51 ورتا مەكتەپ بويىنشا ۇرلانعان قاراجات كولەمى 117 ميلليون تەڭگەنى قۇرايدى. اتالعان قۇقىق بۇزۋشىلىقتار جاۋاپتى تۇلعالارمەن ەڭبەكاقى قورى قاراجاتتارىن تولەۋ بارىسىندا ءتيىستى اقپاراتتى جۇيەلەردىڭ كەمشىلىكتەرىن پايدالانا وتىرىپ جاساعان دەگەن نەگىزدەر بار», دەدى وبلىستىق سىبايلاس جەمقورلىققا قارسى ءىس-قيمىل دەپارتامەنتى باسشىسىنىڭ ءبىرىنشى ورىنباسارى اسىلحان اشىقوۆ.