وتاندىق شارۋالار العاش رەت كوكتەمگى ەگىسكە دايىندىق قاراجاتىن ەرتە الىپ وتىر. 2023 جىلدىڭ ەگىن ەگۋ جۇمىستارىن جۇرگىزۋگە اگرارلىق نەسيە كورپوراتسياسى 23 ملرد تەڭگە ءبولدى. ەندى شارۋاشىلىقتار كوكتەمگە ەرتە قامداناتىن بولادى.
«كەڭ دالا» باعدارلاماسىن ىسكە اسىرۋعا نەگىزىنەن نەسيە سەرىكتەستىكتەرى بەلسەندى قاتىسادى. سولاردىڭ ءبىرى – «تسەلينوگراد» نەسيە سەرىكتەستىگى. سەرىكتەستىك اقمولا وبلىسىنىڭ شارۋالارىن 940 ملن تەڭگەگە قارجىلاندىردى. قارجى ۇيىمىنىڭ باسشىسى بۇل قاراجات 2023 جىلعى ەگىس ناۋقانىن ءتيىمدى جۇرگىزۋگە مۇمكىندىك بەرەتىنىن جەتكىزدى.
– شارۋالار جىل سايىن «كەڭ دالا» باعدارلاماسى بويىنشا دايىندىق قاراجاتىن كوكتەمدە الاتىن. بۇل ءتيىمسىز ەدى. بيىل, بىرىنشىدەن, قارجىلاندىرۋ كولەمى ۇلعايدى, ەكىنشىدەن, ەگىن سالۋشىلاردىڭ مۇددەسىن ەسكەرە وتىرىپ, كورپوراتسيا نەسيە شارتىنا وزگەرىس ەنگىزدى. ەندى شارۋا قوجالىقتارى ەگىن ەگۋ جۇمىستارىنا قاجەتتى اقشانى جەلتوقسان ايىندا الىپ, تۇقىم, جانار-جاعارماي, تىڭايتقىشتى بيىلعى باعامەن ساتىپ الا الادى. تاجىريبە كورسەتكەندەي, كوكتەمگە قاراي باعا 10-15 پايىزعا كوتەرىلەدى, – دەيدى «تسەلينوگراد» نەسيە سەرىكتەستىگىنىڭ باسقارما توراعاسى ساعادات اشەبەكوۆ.
بىلتىرعى ماكروەكونوميكالىق جاعدايدى, ەگىس جانە ەگىن جيناۋ ناۋقانىنداعى شىعىنداردىڭ ارتۋىن, وسى سالاداعى نەسيە قاراجاتىنا سۇرانىستىڭ جوعارى ەكەنىن ەسكەرە وتىرىپ, مەملەكەتتەن قوسىمشا 70 ملرد تەڭگە بولىنگەن بولاتىن
– اگرارلىق نەسيە كورپوراتسياسىنىڭ قولداۋىمەن بىلتىرعى 5,2 ملن گەكتار ەگىستىك جەر وڭدەلدى. قاراجاتتىڭ ءبىر بولىگى – 23 ملرد تەڭگە 2023 جىلعى ەگىس جۇمىستارىن قارجىلاندىرۋعا باعىتتالعان. اگرارلىق نەسيە كورپوراتسياسى اۋىل شارۋاشىلىعى تاۋارىن وندىرۋشىلەردى قارجىلاندىرۋ ءۇشىن ءوز قىزمەتىن جەتىلدىرۋدى جالعاستىرادى, – دەدى «اگرارلىق نەسيە كورپوراتسياسى» اق باسقارما توراعاسى المات اشىربەكوۆ.
قارجىنىڭ ەرتە بولىنگەنىنىڭ ناتيجەسىندە تۇركىستان وبلىسىنداعى «اي» شارۋا قوجالىعى كوكتەمدە ەگەتىن تۇقىمدى ساتىپ الا باستادى. شارۋاشىلىق وكىلى باعدات ايبوسىنوۆتىڭ ايتۋىنشا, بۇل شارۋالارعا اقشا ۇنەمدەۋگە مۇمكىندىك بەرەدى.
– كۇزدىك داقىلدى ەگىپ قويدىق. كوكتەمدە 800 گەكتار جەرگە بيداي, ارپا, ماقسارى جانە جوڭىشقا ەگۋدى جوسپارلاپ وتىرمىز. تۇقىمىن قازىر ساتىپ الىپ جاتىرمىز, كوكتەمدە الدەقايدا قىمباتقا تۇسەدى. سوندىقتان نەسيەنىڭ قازىر بەرىلگەنى جاقسى. كوكتەمگە اۋىل شارۋاشىلىعى تەحنيكاسىن, 25 توننا جانار-جاعارماي دايىندادىق. ناۋرىز ايىندا ەگىن ەگۋدى باستايمىز, – دەدى «اي» شارۋا قوجالىعىنىڭ وكىلى باعدات ايبوسىنوۆ.
بيىل كوكتەمگى ەگىس جانە ەگىن جيناۋ جۇمىستارىن جۇرگىزۋگە بولىنەتىن قارجى كولەمى 140 ملرد تەڭگە بولادى دەپ جوسپارلانىپ وتىر.