استانا. ماۋسىمنىڭ 7-ءسى كۇنى تۇندە ازەربايجان استاناسى – باكۋ قالاسىندا بۇكىلالەمدىك بوكس سەرياسىنىڭ فينالدىق ماتچتارى اياقتالىپ, ونىڭ قورىتىندىسىندا كۋبانىڭ Cuba Domadores كومانداسى باس بايگەنى جەڭىپ الدى. بۇل تۋرالى ۆكونتاكتe الەۋمەتتىك جەلىسىنىڭ دەرەگىنە سۇيەنگەن egemen.kz ءتىلشىسى حابارلادى.
بيىل ءتورتىنشى مارتە مارەگە جەتىپ جاتقان سەريانىڭ فينالىندا ازەربايجاننىڭ Azerbaijan Baku جانە كۋبانىڭ Cuba Domadores جاساقتارى كەزدەستى. ولاردىڭ 6 ماۋسىم كۇنى وتكەن ءبىرىنشى كەزدەسۋلەرىندە كۋبالىقتار 3:2 ەسەبىمەن جەڭىسكە جەتتى. وندا 49 كيلولىق كۋبالىق يوسۆاني ۆەيتيا – ازەربايجان حامزا نامەتوۆتى, 75 كيلولىق ارلەن لوپەس – حايبۋلا مۋسالوۆتى, 91 كيلولىق ەريسلاندي ساۆون ابدۋلكادىر ابدۋللاەۆتى 3:0 ەتىپ جەڭسە, باكۋ كومانداسىنداعى 56 كيلولىق رەسەيلىك لەگيونەر ماگومەد كۋربانوۆ – كۋبالىق نورلان يەرانى 3:0, 64 كيلولىق گايباتۋللا حادجياليەۆ ياسنيەر تولەدو لوپەستى 2:1 ەسەبىمەن ۇتتى.
ال كەلەسى, 7 ماۋسىم كۇنگى ماتچ تا تاپ وسىنداي ەسەپ تىركەلدى. بىراق وندا باكۋلىكتەر ۇتىسقا يە بولدى. ولاردىڭ اراسىندا 52 كيلولىق ەلۆين ماميشزادە – جەراردو كەرۆانتەستى 3:0, 60 كيلولىق البەرت سەليموۆ – لازارو الۆارەستى, 91 كيلودان اۋىر سالماقتاعى ارسلانبەك ماحمۋدوۆ قارسىلاسى دجويس لاردۋەتتى 2:1 ەتىپ تىزە بۇكتىردى. كۋبالىقتار ساپىنان 69 كيلوداعى روسنيەل يگلەسياس – بەلارۋستىك ماگومەد ءنۋرۋتدينوۆتى, 81 كيلوداعى حۋليو سەزار دە لا كرۋس تاعى ءبىر بەلارۋس ازاماتى ميحايل دوۆگوليانەتستى 3:0 ەتىپ ۇتىپ شىقتى. ءسويتىپ, ەكى كەزدەسۋدىڭ قورىتىندىسىندا ەسەپ تەڭەستى – 5:5!
سوندىقتان قوسىمشا التىنشا جەكپە-جەككە كەزەك كەلدى. وندا 69 كيلوعا دەيىنگى سالماقتاعى كۋبالىق اريسپويد دەسپاين مەن كەلەسى بەلورۋس ەۆگەني روماشكەۆيچ سىنعا ءتۇستى. ۇرىس بوستاندىق ارالى وكىلىنىڭ تولىق جەڭىسىمەن (3:0) ءبىتتى. وسىنىڭ ناتيجەسىندە بۇل كۇننىڭ ەسەبى 3:3-كە توقتادى. بۇل Cuba Domadores كومانداسىنىڭ باس بايگەگە قول جەتكىزۋىن قامتاماسىز ەتتى.
دامير قوجامقۇل.
دەرەككوز: ۆكونتاكتە.
فوتو: ۆكونتاكتە.