تەڭىز كەن ورنىندا مۇناي ءوندىرۋ كولەمى 12 ملن تونناعا ارتادى. بۇل تۋرالى ەنەرگەتيكا ءمينيسترى بولات اقشولاقوۆ ورتالىق كوممۋنيكاتسيالار قىزمەتىندە وتكەن بريفينگ بارىسىندا مالىمدەدى, دەپ حابارلايدى Egemen.kz.
«مۇناي ءوندىرۋ سالاسىندا ەلىمىزدىڭ ءۇش نەگىزگى كەن ورنىندا ءىرى جوبالاردى ىسكە اسىرۋ بويىنشا جۇمىستار جالعاسۋدا. تەڭىز كەن ورنىندا مۇناي ءوندىرۋدى جىلىنا 12 ملن تونناعا ۇلعايتۋعا مۇمكىندىك بەرەتىن بولاشاق كەڭەيتۋ جوباسى ىسكە اسىرىلۋدا. 2022 جىلدىڭ قورىتىندىسى بويىنشا جوبا بويىنشا جۇمىستاردىڭ جالپى ىلگەرىلەۋى 95,2%-دى قۇرادى, جوبانى اياقتاۋ 2024 جىلى جوسپارلانىپ وتىر. 2023 جىلى تەڭىزدە ساعالىق قىسىمدى باسقارۋ جوباسى اياقتالادى, ول بولاشاق كەڭەيتۋ جوباسى اياقتالعان كەزدە كەن ورنىندا جۇمىس ىستەيتىن زاۋىتتاردىڭ وڭدەۋ قۋاتتارىنىڭ تولىق جۇكتەلۋىن قامتاماسىز ەتەدى», دەدى مينيستر.
ونىڭ ايتۋىنشا, قاراشىعاناق كەن ورنىندا گازدى كەرى ايداۋدىڭ ءتورتىنشى كومپرەسسورى ىسكە قوسىلعان. سونداي-اق قۇنى شامامەن 1 ملرد دوللاردى قۇرايتىن بەسىنشى كومپرەسسوردى ىسكە اسىرۋ باستالدى, 735 ملن دوللار سوماسىنا 6-شى كومپرەسسوردى سالۋ بويىنشا تۇپكىلىكتى ينۆەستيتسيالىق شەشىم قابىلداندى. بۇل جوبالار ءوندىرۋ كولەمىن جىلىنا 10-11 ملن توننا دەڭگەيىندە ۇستاپ تۇرۋعا باعىتتالعان.
قاشاعان كەن ورنىندا قۋاتتىلىعى جىلىنا 1 ملرد تەكشە مەتر ىلەسپە گازدى قايتا وڭدەۋ بويىنشا جوبانى ىسكە اسىرۋ باستالدى. مۇناي مەن گاز كوندەنساتىن ەسەپكە الۋدىڭ اقپاراتتىق جۇيەسى ىسكە قوسىلدى, ول مۇناي اينالىمىنىڭ 95%-ىن باقىلاۋعا مۇمكىندىك بەرەدى.
مينيستر جوعارىدا اتالعان جوبالاردىڭ ەل ەكونوميكاسى ءۇشىن تيىمدىلىگىن ارتتىرۋ ماقساتىندا مەملەكەت باسشىسىنىڭ تاپسىرماسى بويىنشا 2023 جىلى شەتەلدىك ارىپتەستەرمەن بىرلەسىپ ءىرى مۇناي-گاز جوبالارىن دامىتۋدىڭ كەشەندى جوسپارى ازىرلەنەتىنىن اتاپ ءوتتى.