قازاقستان پرەمەر-ءمينيسترى ءاليحان سمايىلوۆ استاناعا جۇمىس ساپارىمەن كەلگەن وزبەكستان پرەمەر-ءمينيسترىنىڭ ورىنباسارلارى جامشيد حودجاەۆپەن جانە جۋرابەك مىرزاماحمۋدوۆپەن كەلىسسوز جۇرگىزدى.
تاراپتار قازاقستان پرەزيدەنتى قاسىم-جومارت توقاەۆتىڭ بيىل 21-22 جەلتوقساندا وزبەكستانعا جاساعان ساپارىنىڭ قورىتىندىسى بويىنشا ەكى مەملەكەت باسشىلارىنىڭ بەرگەن تاپسىرمالارىن ىسكە اسىرۋ ماسەلەلەرىن تالقىلادى.
اتاپ ايتقاندا, ءوزارا ساۋدا-ساتتىقتى ۇلعايتۋ, ونىڭ ىشىندە بىرلەسكەن سىرتقى ساۋدا كومپانياسىن قۇرۋ, كولىك-لوگيستيكالىق ىنتىماقتاستىقتى نىعايتۋ جانە ءتيىستى ينفراقۇرىلىمدى دامىتۋ, ونەركاسىپ پەن اۋىل شارۋاشىلىعىندا كووپەراتسيالىق جوبالاردى ىسكە قوسۋ, جاڭا قايتا وڭدەۋ كلاستەرلەرىن قۇرۋ, اۋىل شارۋاشىلىعى ونىمدەرىنىڭ تۇرلەرىن جەتكىزۋدى جولعا قويۋ جانە ت.ب. شارالار قارالدى.
ءاليحان سمايىلوۆ قازاقستان پرەزيدەنتىنىڭ وزبەكستانعا ساپارىنىڭ قورىتىندىسى بويىنشا ەكىجاقتى ءوزارا ءىس-قيمىلدىڭ بارلىق باسىم سالالارىندا سەرپىندى ۋاعدالاستىقتارعا قول جەتكىزىلگەنىن اتاپ ءوتتى. ولاردى ىسكە اسىرۋ تۋرالى ارنايى ازىرلەنگەن جول كارتاسىندا ەگجەي-تەگجەيلى جازىلعان, بۇل رەسپۋبليكالار اراسىنداعى ستراتەگيالىق ارىپتەستىكتى ودان ءارى نىعايتۋعا سەرپىن بەرەدى.
«مەملەكەت باسشىلارى ءبىرىنشى كەزەكتەگى بىرقاتار مىندەتتى ايقىنداپ, ولاردى ىسكە اسىرۋ مەرزىمدەرىن ناقتى بەلگىلەپ بەردى. ازاماتتارىمىزدىڭ ءال-اۋقاتىن ارتتىرۋعا باعىتتالعان بارلىق شارانى جۇزەگە اسىرۋ ءۇشىن ۇيلەسىمدى جانە ءتيىمدى جۇمىستى قامتاماسىز ەتۋىمىز كەرەك», دەدى پرەمەر-مينيستر.
ونىڭ ايتۋىنشا, قازاقستان مەن وزبەكستان اراسىنداعى تاۋار اينالىمى تۇراقتى ءوسىپ كەلەدى. بۇل رەتتە باستى مىندەتتەردىڭ ءبىرى – ءونىمدى تاسىمالداۋ كەزىندە «تار دالىزدەردى» كەڭەيتىپ, جالپى اكىمشىلىك كەدەرگىلەردى جويۋ.
ء«بىزدىڭ ەلدەرىمىزدىڭ كاسىپكەرلەرى ءوزارا بەلسەندى ىسكەرلىك قارىم-قاتىناستار ورناتقان, سوندىقتان بيزنەسكە جاڭا بىرلەسكەن جوبالاردى ىسكە قوسۋعا جان-جاقتى قولداۋ قاجەت. ءبىز سىزدەرمەن بىرگە وسى باعىتتا جۇمىس ىستەۋگە دايىنبىز», دەدى ءاليحان سمايىلوۆ.
سونىمەن قاتار تاراپتار سۋ شارۋاشىلىعى سالاسىنداعى ىنتىماقتاستىقتىڭ وزەكتى ماسەلەرىن تالقىلادى.
ءوز كەزەگىندە جامشيد حودجاەۆ وزبەكستان ۇكىمەتى بارلىق ءتيىمدى باعىت بويىنشا ورتاق ماقساتتار مەن مىندەتتەرگە قول جەتكىزۋ ءۇشىن قازاقستان ۇكىمەتىمەن تىعىز ىنتىماقتاستىقتا ناتيجەلى جۇمىس ىستەۋگە ءازىر ەكەنىن اتاپ ءوتتى.
كەزدەسۋ سوڭىندا ءاليحان سمايىلوۆ 2022 جىلعى 21-22 جەلتوقساندا ەكى ەل پرەزيدەنتتەرى اراسىندا وتكەن كەلىسسوز قورىتىندىسى بويىنشا قول جەتكىزىلگەن ۋاعدالاستىقتاردى ىسكە اسىرۋ جونىندەگى جول كارتاسىنا قول قويدى. وزبەك تاراپىنان بۇل قۇجاتقا ابدۋللا اريپوۆ قول قويادى.