ەلىمىزدىڭ كونستيتۋتسياسىندا جازىلعانداي, سوت بيلىگى سوتتا ءىس جۇرگىزۋدىڭ ازاماتتىق, قىلمىستىق جانە زاڭمەن بەلگىلەنگەن وزگە نىساندارى ارقىلى جۇزەگە اسىرىلادى. ال سوت قىزمەتىنىڭ تۇپكىلىكتى ءناتيجەسى سوتقا جۇگىنگەن قۇقىقتىق قاتىناستار سۋبەكتىلەرىنىڭ قۇقىقتارىن, بوستاندىقتارىن جانە زاڭدى مۇددەلەرىن قورعاۋ بولىپ تابىلادى. بۇل اتالعان يگىلىكتى ءىستى جۇزەگە اسىرۋ ءۇشىن زاڭدارىمىزدىڭ دا ەل يگىلىگىنە قىزمەت ەتەتىندەي بولۋى وتە قاجەت. مىنە, وسى ورايدا كەشە قازاقستان رەسپۋبليكاسىنىڭ جوعارعى سوتى گەرمانيا حالىقارالىق قۇقىقتىق ىنتىماقتاستىق قورىمەن (IRZ) بىرلەسىپ, «قازاقستان رەسپۋبليكاسىنىڭ جاڭا ازاماتتىق ءىس جۇرگىزۋ كودەكسى – ۋاقىت تالابى» تاقىرىبىندا ازاماتتىق ءىس جۇرگىزۋ كودەكسىنىڭ جاڭا رەداكتسياداعى جوباسىن تالقىلاۋ شەڭبەرىندە حالىقارالىق كونفەرەنتسيا وتكىزدى. ونىڭ جۇمىسىنا پارلامەنت دەپۋتاتتارى, مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى, عالىمدار, قازاقستاندىق جانە حالىقارالىق ساراپشىلار قاتىستى.
كونفەرەنتسيانى اشقان جوعارعى سوت توراعاسى قايرات ءمامي: «بۇگىنگى ءبىزدىڭ كونفەرەنتسيا قازاقستان رەسپۋبليكاسىنىڭ جاڭا ازاماتتىق ءىس جۇرگىزۋ كودەكسى جوباسىن تالقىلاۋعا جانە ونىمەن تانىستىرۋعا ارنالىپ وتىر. بارشاعا بەلگىلى سوت ارقىلى قورعاۋ تەتىكتەرىنىڭ دۇرىس جۇمىس ىستەۋى قوعامنىڭ ءاربىر مۇشەسىنىڭ كونستيتۋتسيالىق قۇقىعىن ىسكە اسىرۋ كەزىندە تىكەلەي كورىنىس تابادى. بۇل ورايدا سوت ادىلدىگى مەملەكەتتەگى ينۆەستيتسيالىق احۋالعا, الەۋمەتتىك ساياساتقا, حالىقارالىق ىنتىماقتاستىق پەن تاتۋلىققا دا تىكەلەي اسەر ەتەدى», دەدى. بۇدان كەيىن پرەزيدەنت اكىمشىلىگى باسشىسىنىڭ ورىنباسارى تالعات دوناقوۆ, گەرمانيا حالىقارالىق قۇقىقتىق ىنتىماقتاستىق قورىنىڭ (IRZ) باسشىسى ديرك ميرو دا ويلارىن ورتاعا سالدى.
راسىندا جاڭا رەداكتسياداعى اتالعان كودەكستە سوت ءىسىن جۇرگىزۋگە قاتىسۋشىلاردىڭ ءىس جۇرگىزۋ قۇقىقتارى مەن مىندەتتەرىنىڭ شىنايى تەڭگەرىمى كوزدەلگەن. جوبا 533 باپتى, 60 تاراۋ مەن 4 ءبولىمدى قامتيدى. جوبادا سوتتاردىڭ قىزمەتىندەگى تەحنيكالىق قۇرالداردى كەڭىنەن پايدالانۋ ارقىلى ازاماتتىق ىستەردى قاراۋ ءتارتىبىن جەڭىلدەتۋگە باعىتتالعان نەگىزگى ەرەجەلەر قاراستىرىلعان.
ۇسىنىلاتىن بارلىق شارالار حالىقتىڭ الەۋمەتتىك جاعىنان وسال توپتارىنىڭ مۇددەلەرىن قورعاۋدى قامتاماسىز ەتۋ قاجەتتىگى ەسكەرىلىپ قابىلداناتىن بولادى.
بۇل ورايدا ءوز ءسوزىن ودان ءارى جالعاعان جوعارعى سوت ءتوراعاسى ق.ءمامي: «مەملەكەت باسشىسى ن. نازارباەۆ قازاقستان رەسپۋبليكاسى سۋديالارىنىڭ ءVى سەزىندە ازاماتتىق ىستەردى قاراۋ ءتارتىبى پروتسەسكە قاتىسۋشى تاراپتار ءۇشىن ىڭعايلى ءارى جىلدام, سونداي-اق, ولاردى تاتۋلاستىرۋعا جانە زاماناۋي تەحنولوگيالاردى كەڭىنەن قولدانۋعا باعىتتالۋى ءتيىس. قازاقستاننىڭ ازاماتتىق سوت ءوندىرىسىنىڭ جاڭا مودەلىن قۇرۋ تاراپتاردىڭ, مەملەكەت پەن ازاماتتار مۇددەلەرىنىڭ تەڭگەرىمىن قامتاماسىز ەتەتىن پراگماتيكالىق تاسىلگە نەگىزدەلگەن. ءبىز قازاقستاندىق قوعامعا ءتان قالپىنا كەلتىرىلەتىن سوت تورەلىگى تۇجىرىمداماسىن قولدايمىز», – دەپ اتاپ ءوتتى.
جاڭا جوبانىڭ نەگىزىنە توقتالعان جوعارعى سوتتىڭ ازاماتتىق جانە اكىمشىلىك ىستەر جونىندەگى قاداعالاۋشى سوت القاسىنىڭ ءتوراعاسى ە.ابدىقادىروۆ ازاماتتىق ءىس جۇرگىزۋ كودەكسى جوباسىنىڭ ماقساتتارى مەن مىندەتتەرى, ازاماتتىق سوت ءىسىن جۇرگىزۋدى جەڭىلدەتۋ مەن جەدەلدەتۋ تۋراسىندا ايتتى.
كونفەرەنتسيا جۇمىسى بارىسىندا ەۋروپا كەڭەسىنىڭ ادام قۇقىقتارى جونىندەگى ەۋروپالىق سوتتىڭ زاڭگەرى ۆ.ا.لۋكاشەۆيچ جاڭا اىجك جوباسىندا ءادىل سوت تالقىلاۋىنىڭ حالىقارالىق ستاندارتتارىن ىسكە اسىرۋ ماسەلەلەرى, بەرلين قالاسى جەر سوتىنىڭ توراعالىق ەتۋشى سۋدياسى, گەرمانيا حالىقارالىق قۇقىقتىق ىنتىماقتاستىق قورىنىڭ (IRZ) ساراپشىسى لوتار يۋنەمانن گەرمانيانىڭ ءىستى سوت تالقىلاۋىنا دايىنداۋ جانە سوتتاعى تاتۋلاستىرۋ راسىمدەرى جونىندەگى تاجىريبەسى, رەسەي فەدەراتسياسى جوعارعى سوتىنىڭ سۋدياسى ا.ا.كليكۋشينا سوت اكتىلەرىن قايتا قاراۋ مەن رەسەي فەدەراتسياسىنىڭ تاجىريبەسى تۋرالى جانە باسقا دا بايانداماشىلار جوبا بويىنشا ءسوز سويلەدى.
الەكساندر تاسبولاتوۆ,
«ەگەمەن قازاقستان».