ساۋد ارابياسى كورولدىگىنىڭ استاناداعى ەلشىلىگىندە باقتيار تاسىموۆتىڭ ەر-ريادتا توتەنشە جانە وكىلەتتى ەلشى رەتىندە اتقارعان ميسسياسىنىڭ اياقتالۋىنا بايلانىستى قازاقستاندىق ديپلوماتتى ساۋديانىڭ جوعارى وردەنىمەن ماراپاتتاۋ قۇرمەتىنە وراي سالتاناتتى قابىلداۋ ءوتتى.
سالتاناتتى قابىلداۋعا قر ءسىم-ءىنىڭ جاۋاپتى حاتشىسى اسقار مۋسينوۆ جانە قازاقستاندا اككرەديتتەلگەن ديپلوماتيالىق كورپۋستىڭ وكىلدەرى قاتىستى.
ساۋد ارابياسىنىڭ قازاقستانداعى ەلشىسى ابدەل ماجيت حاكيم باقتيار تاسىموۆتى ءابدەل ءازيز كورولدىڭ I دارەجەلى وردەنىمەن ماراپاتتاۋ تۋرالى ەكى قاسيەتتى ورىننىڭ ساقتاۋشىسى ابداللا كورولدىڭ جارلىعىن وقىپ, ءوز ەلى باسشىلىعىنىڭ تاپسىرماسى بويىنشا جوعارى ماراپاتتى ۇسىندى.
«ەكى قاسيەتتى ورىننىڭ ساقتاۋشىسى ابداللا كورول مەن قازاقستان پرەزيدەنتى نۇرسۇلتان نازارباەۆتىڭ اراسىنداعى تۇراقتى جانە سەنىمدى بايلانىستاردىڭ ارقاسىندا ەكىجاقتى ىنتىماقتاستىق ديپلوماتيالىق قاتىناستار ورنىققان كەزدەن باستاپ ءساتتى دامىپ كەلەدى, بۇل ۇدەرىس الداعى ۋاقىتتا دا جالعاسىن تابادى دەپ سەنەمىز», دەگەن ساۋد ارابياسىنىڭ قازاقستانمەن ساۋدا-ەكونوميكالىق جانە مادەني-گۋمانيتارلىق سالالاردا ءوزارا ءتيىمدى ىنتىماقتاستىقتى ودان ءارى تەرەڭدەتۋگە دايىن ەكەنىن مالىمدەدى.
ءوز كەزەگىندە, ب.تاسىموۆ ساۋديالىق تاراپ ءوزىنىڭ قىزمەتىن جوعارى باعالاعانى ءۇشىن العىسىن بىلدىرە كەلىپ, بۇل ماراپات, ەڭ الدىمەن, پرەزيدەنت نۇرسۇلتان نازارباەۆتىڭ باسشىلىعىمەن الەۋمەتتىك-ەكونوميكالىق دامۋدا ايتارلىقتاي جەتىستىكتەرگە جەتىپ, حالىقارالىق قوعامداستىقتىڭ سەنىمدى دە ابىرويلى مۇشەسىنە اينالعان قازاقستاننىڭ دوستاس حالقىنا ساۋديا حالقىنىڭ كورسەتكەن ءىلتيپاتى دەپ بىلەتىنىن ەرەكشە اتاپ ءوتتى.
«ەگەمەن-اقپارات».