اقش پەن كانادادا قاتتى داۋىل سالدارىنان كەم دەگەندە 50 ادام قازا تاپتى, دەپ حابارلايدى Egemen.kz.
جەرگىلىكتى باق-تىڭ حابارلاۋىنشا, اقش-تا داۋىل 46 ادامنىڭ ءومىرىن قيدى. كانادانىڭ بريتاندىق كولۋمبيا پروۆينتسياسىندا اۆتوبۋس كوكتايعاق جولدا اۋدارىلىپ, تاعى ءتورت ادام قازا تاپتى.
اقش-تا قازا تاپقانداردىڭ 18-ءى نيۋ-يورك شتاتىنداعى بۋففالو قالاسىنىڭ تۇرعىندارى. وڭىردەگى داۋىلدىڭ قۇرباندارى كولىكتە قالعان ادامدار بولدى.
ۇلتتىق اۋا رايى قىزمەتى 25 جەلتوقساندا بۋففالو اۋەجايىندا 1,2 مەترگە جۋىق قار جاۋعانىن حابارلادى.
دەمالىس كۇندەرى نيۋ-يورك گۋبەرناتورى كەتي حوچۋل شتاتتىڭ كوپتەگەن جەدەل جاردەم كولىكتەرى مەن ءورت ءسوندىرۋ كولىكتەرى قار استىندا قالىپ قويعانىن ايتتى.
بۋففالو پوليتسيا دەپارتامەنتى قاردا جۇرەتىن كولىك يەلەرىنە ىزدەۋ-قۇتقارۋ جۇمىستارى بويىنشا كومەك سۇراپ, ونلاين ۇندەۋ جاريالادى.
اقش-تا 1,8 ميلليونعا جۋىق ءۇي جارىقسىز قالدى, مىڭداعان رەيستەر توقتاتىلىپ, كەشىكتىرىلدى. كانادادا كەم دەگەندە 140 000 ءۇي ەلەكتر قۋاتىنسىز قالدى.