ەلىمىزگە ەكسپو-2017 حالىقارالىق مامانداندىرىلعان كورمەسىن وتكىزۋ مارتەبەسى بۇيىرعان ساتتەن-اق وعان ازىرلىكتىڭ بىردەن باستالىپ كەتكەنى ايان. سونىڭ ىشىندە لوگوتيپ تاڭداۋ, بولاشاق كورمەنىڭ ارحيتەكتۋراسىنىڭ نوبايىن جاساۋ سىندى جۇمىستار حالىقارالىق دەڭگەيدەگى بايقاۋلاردىڭ ناتيجەسىندە ىسكە استى. مىسالى, بىلتىر لوگوتيپ تاڭداۋ بارىسىندا وتاندىق جانە الەمدىك ديزاينەرلەر 56 ءتۇرلى جۇمىس ۇسىنعان بولاتىن. سونىڭ ىشىندە جاسىل, كوگىلدىر, قىزعىلت سارى تۇستەردى كوركەمدىك شەشىممەن بىرىكتىرگەن «جەل ەنەرگياسى» جوباسى ەكسپو-2017 كورمەسىنىڭ لوگوتيپى بوپ بەكىتىلدى. جۋىردا «استانا ەكسپو-2017» اكتسيونەرلىك قوعامى كورمەنىڭ تاليسمانىنا (ماسكوت) بايقاۋ جاريالادى. وسى بايقاۋدىڭ بارىسى تۋرالى اكتسيونەرلىك قوعامنىڭ ماركەتينگ جانە جۇرتشىلىقپەن بايلانىس دەپارتامەنتىنىڭ ديرەكتورى اسەل قوجاقوۆاعا جولىعىپ سۇراقتار قويعانبىز.
– اسەل حانىم, سىزدەردىڭ سايتتارىڭىزدان اكتسيونەرلىك قوعامنىڭ ماسكوت جوبا-ديزاينىنا بايقاۋ جاريالانعانىن بايقاپ قالدىق. بايقاۋدىڭ قانداي ەرەكشە شارتتارى بار؟
– ءيا, مامىر ايىنىڭ 20-سى مەن ماۋسىمنىڭ 20-سىنا دەيىنگى ارالىقتا ۇمىتكەرلەر بايقاۋعا ءوز جوبالارىن ۇكىلەپ قوسا الادى. ماسكوت دەگەندى كەيبىرەۋلەر ۇقپاي قالىپ جاتىر. بۇل كادىمگى تاليسمان. ول بىرىنشىدەن, «بولاشاقتىڭ ەنەرگياسى» اتتى كورمەنىڭ تاقىرىبىن ايشىقتاپ تۇرۋى ءارى ءبىر كورگەن ادام استانادا وتەتىن كورمەگە قاتىستى تاليسمان ەكەنىن تانىپ الاتىنداي بولۋى كەرەك. ەكىنشىدەن, كورمە وتكىزەتىن ەل مادەنيەتىنىڭ ەرەكشەلىگى ەسكەرىلۋى ءتيىس. «كورمە وتكىزەتىن ەل» دەپ وتىرعان سەبەبىمىز بايقاۋعا وتاندىق ديزاينەرلەر عانا قاتىسپايدى. الىس-جاقىن شەتەل ديزاينەرلەرى مەن ءوزىمىزدىڭ ديزاينەرلەر قاتىسىپ, ولاردىڭ جوبالارى ساراپقا سالىنادى. ۇشىنشىدەن, تاليسماندا ءبىزدىڭ لوگوتيپتىڭ جاسىل, كوگىلدىر جانە قىزعىلت سارى تۇستەرى كورىنىس بەرۋى ءتيىس. تاليسمان جانسىز زات بولۋى دا, جاندى زات بولۋى دا مۇمكىن. مىسالى, ءوز ەلىمىزدە وتكەن ازيادانىڭ تاليسمانى يربي بارىسى بولسا, ۋنيۆەرسيادا ءۇشىن سۇڭقار تاڭداپ الىندى. جالپى, كەيبىر ەلدەردە بەلگىلى ءبىر ۇلكەن شارالاردىڭ تاليسمانى ادام كەيپىندە دە كورىنىس بەرەدى. ءبىز بۇل تۇرعىدا ديزاينەرلەرگە ناقتى ءبىر شەكتەۋلەر قويىپ وتىرعانىمىز جوق. ولار جوبالارىن شىعارماشىلىق ەركىندىكپەن ۇسىنا الادى. باستىسى ول جوبالار بىرەگەي ءارى قايتالانبايتىن, ياعني, تۇسىنىكتىرەك ايتساق, وسىعان دەيىن ونى ەشكىم پايدالانباعان بولۋى شارت. سوندىقتان ونىڭ جاۋاپكەرشىلىگىن جوبا اۆتورى ءوز موينىنا الادى. ال حالىقتىق داۋىسپەن ءبىر جوبا-تاليسمان تاڭداپ الىنعان سوڭ ونىڭ اۆتورلىق قۇقىعى ءبىزدىڭ اكتسيونەرلىك قوعامعا وتەدى.
– بايقاۋدىڭ حالىقارالىق دارەجەدە ەكەنىن اتاپ ءوتتىڭىز. ەندى وسىنى تاراتىڭقىراپ بەرسەڭىز. بۇنى حالىقارالىق دەڭگەيدە جاساۋدىڭ سىرى نەدە؟ وتاندىق ديزاينەرلەردىڭ كورمە تاليسمانىن جاساپ شىعارۋعا قاۋقارى جەتپەي مە؟
– وتاندىق ديزاينەرلەردىڭ شەبەرلىكتەرىنە ءبىزدىڭ ەشقانداي كۇمانىمىز جوق. ماقساتىمىز – 2017 جىلى وتەتىن كورمەگە قىزىعۋشىلاردىڭ سانىن ارتتىرۋ. ونىڭ ىشىندە ديزاينەرلەردى تارتۋ. ءبىز ەشكىمنىڭ ونەرىنە شەكتەۋ قويمايمىز. كاسىبي ديزاينەرلەر, ءتىپتى, سول ماماندىققا وقىپ جاتقان ستۋدەنتتەر دە قاتىسسىن, باعىن سىناسىن. بۇل جەردە ءبىر اۆتوردىڭ باعى جاناتىنى بەلگىلى. 20 ماۋسىمنان سوڭ ۇكىمەت باسشىسىنىڭ توراعالىعىمەن مەملەكەتتىك كوميسسيا جوبالاردى ساراپقا سالىپ, جەتى جوبانى تاڭداپ الادى. ال ەڭ شەشۋشى داۋىس حالىقتا. ءبىز ارنايى ۆەب-سايت جاسايتىن بولامىز. سوندا تۇتاس الەم حالقى داۋىس بەرەدى. داۋىس بەرۋ ونلاين رەجىمىندە جۇرگىزىلمەك. ياعني, داۋىس بەرۋ اشىق تۇردە وتەدى, ءبارى كورىنىپ تۇرادى. سايتقا قوسىمشا داۋىس بەرۋدىڭ ۇتقىر ء(موبيلدى) ءتۇرىن دە جاسايمىز. سوسىن تامىز ايىنىڭ سوڭىندا شەشىم شىعادى دا, جەڭىمپاز انىقتالادى.
– وسى كۇنگە دەيىن قانشا جۇمىس ءتۇستى؟ ولاردىڭ اراسىندا شەتەلدىكتەر بار ما؟ جەڭىمپاز جوبانىڭ اۆتورىمەن كەلىسىمشارتتار جاسالا ما؟
– قازىرگى تاڭدا قورجىنىمىزدا ونشاقتى جوبا بار. ولاردىڭ ىشىندە يزرايلدىك جوبالاردىڭ دا بار ەكەنىن اتاپ وتۋگە بولادى. ءتۇرلى تۇجىرىمدامالار كورىنىس تاپقان قىزىق جۇمىستار ۇسىنىلعان. ءالى تالاي جۇمىستار ۇسىنىلادى دەپ ويلايمىز. ال جەڭىمپاز جوبانىڭ اۆتورىمەن اكتسيونەرلىك قوعام كەلىسىمشارت جاسايتىن بولادى. ول ءوزى جاساعان تاليسماننىڭ برەندبۋگىن, ياعني, جاسالۋ جولدارىن, فيرمالىق ءتۇسىن, ونى پايدالانۋ ەرەجەلەرىن تۇتاس سۋرەتتەپ, كومپانيا اتىنا وتكىزەدى. بۇل ءوز كەزەگىندە فيرمانىڭ مەنشىگىنە اينالىپ, ءارى قاراي اكتسيونەرلىك قوعامنىڭ فيرمالىق ءستيلىن دە بەينەلەۋى مۇمكىن.
– تاليسمان وتاندىق تاۋار اينالىمىنا شىعارىلا ما؟
– ارينە. بۇل تاليسمان كەيىن دە ءتۇرلى فورمادا قولدانىلا بەرەدى دەپ ويلايمىز. مىسالى ويىنشىقتار, كادەسىيلار تۇرىندە كورىنىس بەرۋى مۇمكىن. ول ءبىزدىڭ دەمەۋشىلەرىمىزگە, ارىپتەستەرىمىزگە دە ساتىلا باستايدى. جالپى ايتقاندا, لوگوتيپ پەن تاليسماننىڭ اينالاسىندا تۇتاس ساياسات بار ەكەنىن ايتقىم كەلەدى.
– اڭگىمەڭىزگە راحمەت.
اڭگىمەلەسكەن
مارات اققۇل,
«ەگەمەن قازاقستان».