استانا. 6 ماۋسىم. بۇگىن الماتىدا ءوتىپ جاتقان «تورتتىكتىڭ تۋرنيرىندە» قازاقستان ايەلدەر قۇراماسى وزبەكستان كومانداسىن 10:0 ەتىپ ۇتتى. بۇل تۋرالى NewTimes.kz ءتىلشىسى حابارلادى.
تۋرنير الماتى وبلىسىنىڭ تالعار قالاسىندا حالىقارالىق اۋەسقوي بوكس اسسوتسياتسياسى (ايبا) قۇزىرەتىندەگى بۇكىلالەمدىك بوكس اكادەمياسىندا ءوتىپ جاتىر. وعان وزبەكستان, موڭعوليا, رەسەي جانە قازاقستان قۇرامالارى قاتىسۋدا.
جارىس كەشە, 5 ماۋسىم كۇنى قازاقستان – موڭعوليا جاساقتارىنىڭ كەزدەسۋىمەن باستالدى. ماتچتا قازاقستاندىقتار 11:2 ەسەبىمەن جەڭىسكە جەتتى. كومانداعا بۇل جەڭىستى 2012 جىلعى الەم چەمپيوناتىنىڭ قولا جۇلدەگەرى نازىم قىزايباي مەن الينا تۇرلىباەۆا (48 كگ), جاينا شەكەربەكوۆا (51 كگ), دينا جولامان (54 كگ), وكسانا كورولەۆا (57 كگ), الۋا ءابدىرايىموۆا مەن فيرۋزا ءشارىپوۆا (60 كگ), زارينا تسولوەۆا (64 كگ), داريعا شاكىموۆا (69 كگ), 2012 جىلعى لوندون وليمپياداسىنىڭ قولا جۇلدەگەرى مارينا ۆولنوۆا مەن اناستاسيا رىلينا (75 كگ) الىپ بەردى. ءبىزدىڭ قىزداردان تەك جاننا باسقاەۆا (57 كگ) مەن ۇلبوسىن المەنوۆا (60 كگ) عانا ۇتىلدى.
بۇگىن قازاقستاندىقتار ساپىنان الينا تۇرلىباەۆا (48 كگ), جاينا شەكەربەكوۆا (51 كگ), ءسانيا سۇلتانقىزى مەن جاننا باسقاەۆا (57 كگ), گۇلجان ءۇببىنيازوۆا (60 كگ), ازيا ويىندارىنىڭ قول جۇلدەگەرى سايدا حاسەنوۆا (64 كگ), جاستار اراسىنداعى الەم چەمپيونى گاۋھار ەرمەكباي (69 كگ) جانە اناستاسيا رىلينا (75 كگ) قارسىلاستارىنا ەشقانداي مۇمكىندىك قالدىرعان جوق. جەكپە-جەكتەردە گۇلجان عانا 2:1 ەسەبىمەن جەڭىسكە جەتتى. ال قالعاندارى تۇگەلدەي 3:0 دەگەن ەسەپپەن ۇتتى.
جارىستىڭ ءبىرىنشى كۇنى رەسەي قۇراماسى وزبەكستان قىزدارىن 7:3 ەتىپ ءسۇرىندىردى.
ەرتەڭ ءبىزدىڭ قىزدار رەسەي كومانداسىمەن بەتتەسەدى.
قازاقستان بوكس فەدەراتسياسىنىڭ ءباسپاسوز قىزمەتى اتاپ وتكەندەي, بۇل كەزدەسۋلەر بيىل وتەتىن ازيا ويىندارى مەن الەم چەمپيوناتىنا دايىندىق بولماقشى.
دامير قوجامقۇل.
دەرەككوز: NewTimes.kz.
فوتو: ۆكونتاكتە.
سۋرەتتە: مارينا ۆولنوۆا.