تاشكەنتتە وتكەن وزبەك-قازاق وڭىرارالىق بيزنەس-فورۋمىنىڭ قورىتىندىسى بويىنشا ەكى ەل اراسىنداعى ينۆەستيتسيالىق جانە ساۋدا-ەكونوميكالىق ىنتىماقتاستىق سالاسىندا جالپى سوماسى 2,5 ملرد دوللار بولاتىن 40 قۇجاتقا قول قويىلدى.
فورۋمعا ەكى جاقتان 400-دەن استام دەلەگات قاتىستى. بيزنەس-فورۋم الاڭىندا B2G, B2B كەزدەسۋلەر وتكىزىلىپ, ىنتىماقتاستىقتىڭ جاڭا باعىتتارى بەلگىلەندى.
«QazTrade» ساۋدا ساياساتىن دامىتۋ ورتالىعى» اق قولداۋ باعدارلامالارىنا قاتىسۋشىلار جالپى سوماسى 112,7 ملن دوللارعا 11 كوممەرتسيالىق قۇجات جاساستى. ولاردىڭ قاتارىندا قازاقستاندىق «تەمىرجول جوندەۋ» جشس كومپانياسى مەن «وزبەكستان تەمىر جولى» اراسىنداعى انگرەن – پاپ – قوقان – ءاندىجان – ساۆاي ۋچاسكەسىندە تەمىر جول جوندەۋ قىزمەتتەرىن كورسەتۋ تۋرالى كەلىسىم بار. شارت بويىنشا كەلىسىمشارتتىق مىندەتتەمەلەر 80 ملن دوللاردان اسادى. بۇدان باسقا, وزبەكستان رەسپۋبليكاسىنىڭ دەنساۋلىق ساقتاۋ سالاسىنا جاساندى ينتەللەكتتىڭ كومەگىن ەنگىزۋ تۋرالى, قازاقستاندىق كومپانيالاردىڭ اليۋمينيدەن جاسالعان سوزبا سىم, ۇن, الما شىرىندارى مەن دامدەۋىشتەردى ەكسپورتتاۋى تۋرالى كەلىسىمدەرگە قول قويىلدى.
بۇگىنگى تاڭدا قازاقستاندا وزبەك كاپيتالىنىڭ قاتىسۋىمەن 1 400-دەن استام كاسىپورىن جانە ساۋدا, كاسىپتىك جانە عىلىمي قىزمەت, قۇرىلىس, كولىك, قويمالاۋ جانە باسقا دا سالالاردا 400-دەن استام بىرلەسكەن قازاق-وزبەك كومپانيالارى بار.