ەلورداداعى ۇلتتىق اكادەميالىق كىتاپحانا مەن كىتاپحانالار قاۋىمداستىعىنىڭ باستاماسىمەن 2007 جىلدان بەرى ەلىمىزدە يگى داستۇرگە اينالعان «ءبىر ەل – ءبىر كىتاپ» اتتى اكتسياعا بيىل كورنەكتى جازۋشى سايىن مۇراتبەكوۆ شىعارماسى ارقاۋ بولدى. وسىعان وراي قالامگەر دۇنيەگە كەلگەن جەتىسۋ جەرىندە «سايىن دالانىڭ سۋرەتكەرى» اتتى رەسپۋبليكالىق كىتاپ كورمەسى ءوتتى. وعان ەلىمىزگە تانىمال ازاماتتار اكادەميك, پروفەسسور عاريفوللا ەسىم, جازۋشى «پاراسات», «قۇرمەت» وردەندەرىنىڭ يەگەرى – بەكسۇلتان نۇرجەكە ۇلى, «قازاق ادەبيەتى» گازەتىنىڭ باس رەداكتورى, قازاقستاننىڭ ەڭبەك سىڭىرگەن قايراتكەرى جۇماباي شاشتاي ۇلى, الماتى وبلىسى اكىمىنىڭ ورىنباسارى سەرىك مۇقانوۆ قاتىستى.
سونىمەن, جاستارعا پاتريوتتىق تاربيە بەرۋ, كىتاپ وقۋعا دەگەن قۇمارلىقتارىن وياتىپ, دامىتۋدى ماقسات ەتكەن يگى شارا تالدىقورعاندا باستالىپ «جۋسان ءيسى», «باسىندا ۇشقارانىڭ...» اتتى تۋىندىلارىن تانىستىرۋ جازۋشى سايىن مۇراتبەكوۆتىڭ تۋعان جەرى قوڭىر اۋىلىندا ادەمى جالعاستى.
«سوڭعى 15-20 جىلدا جاستار كىتاپ وقۋدان الشاقتاپ بارادى. بۇل شارا سول ولقىلىقتى تولتىرا ما دەپ جاسالعان قادام. شىنى كەرەك, وسىدان 8 جىل بۇرىن ابايدىڭ «قارا سوزدەرىنەن» باستالعان شارا اياسىندا العاش 400-گە جۋىق ءتۇرلى دەڭگەيدەگى باسقوسۋ بولسا, بىلتىرعى جىلى فاريزا وڭعارسىنوۆانىڭ «داۋا» اتتى كىتابىنا ارنالعان 2000-نان استام شارا ءوتىپتى. بيىل دا سايىن مۇراتبەكوۆتىڭ دە كىتابىن وقۋعا مىڭداعان ادام قاتىسادى دەپ ويلايمىن. وسىنىڭ بارلىعى جاستاردىڭ كىتاپ وقۋعا دەگەن قۇلشىنىسىن وياتۋ», دەدى الماتىداعى ۇلتتىق كىتاپحانا باس ديرەكتورى الىبەك اسقار.
«جىل اۆتورى اتانعان جەرلەسىمىز سايىن مۇراتبەكوۆتىڭ قوس كىتابى جەتىسۋ جەرىندەگى بارلىق كىتاپحانالارعا جەتكىزىلىپ, جاستاردىڭ كەز كەلگەن ۋاقىتتا الىپ وقۋلارىنا بولادى. ءسوز رەتى كەلگەندە ايتارىمىز, الماتى وبلىسىنىڭ اكىمى اڭسار مۇساحانوۆتىڭ قولداۋىمەن جەتىسۋلىق 200-دەن استام اقىن-جازۋشىلاردىڭ كىتاپتارى جارىق كورگەن ەدى. وسى قۇندىلىقتى كورگەن زيالى قاۋىم شىن ريزا بولدى. ەندى, مىنە, سايىن مۇراتبەكوۆتىڭ تاعى ەكى كىتابى قوسىلىپ وتىر. بۇل كىتاپ وقيمىن دەگەن جاستارعا جاسالعان جاعداي ەمەس پە؟», – دەدى الماتى وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىسى راحمەت ەسداۋلەتوۆ.
نۇربول الدىباەۆ,
«ەگەمەن قازاقستان».
الماتى وبلىسى.