اتىراۋ وبلىسى گازداندىرۋ بويىنشا كوش باسىندا ەكەنى بەلگىلى. بۇگىندە «قازترانسگازايماق» اق-نىڭ اتىراۋ وندىرىستىك فيليالى حالىقتى گازبەن قاۋىپسىزدىك تۇرعىسىنان ۇزدىكسىز قامتۋ باعىتىندا ءتيىستى شارالار اتقارىپ وتىر. اتالعان مەكەمە حالىققا قىزمەت ەتۋدىڭ ۇزدىك ۇلگىسىن كورسەتىپ جاتىر. بۇلاي دەۋىمىزگە جەرگىلىكتى فيليال تاراپىنا ايتىلعان جاعىمدى پىكىرلەردىڭ كوپتىگى سەبەپ. تاياۋدا «قازترانسگازايماق» اق-نىڭ اتىراۋ وندىرىستىك فيليالىنا بارۋدىڭ ءساتى ءتۇسىپ, ءبىراز مالىمەتكە قانىقتىق.
– «گاز كەلدى, تىرشىلىككە جان كىردى» دەپ قۋانعان حالىقتىڭ جۇمىسى جەڭىلدەپ, تۇرمىسى تۇزەلگەنى راس. بۇگىندە وبلىس تۇرعىندارى بەرەكەلى باستامانىڭ يگىلىگىن كورىپ كەلەدى. الايدا تۇرعىندار تاراپىنان تۇسىنبەۋشىلىكتەر دە بولادى. ماسەلەن, ۇيدەگى گاز جابدىعىنان اقاۋ شىقسا, ءۇي يەسى «104» قىزمەتىنە قوڭىراۋ شالادى. مۇنداي جاعدايدا ءبىز قۇبىرداعى گاز وتكىزىپ تۇرعان كراندى جاۋىپ تاستايمىز. بۇدان ءارى ءۇي يەسىمەن كەلىسىمشارتقا وتىرعان جەكەمەنشىك قىزمەت كورسەتۋ كومپانياسى ورىن العان اقاۋدى جوندەۋى كەرەك. بىراق حالىقتىڭ دەنى ونى تۇسىنە بەرمەيدى, جاۋاپكەرشىلىكتى ءبىزدىڭ مەكەمەدەن تالاپ ەتەدى. نەگىزىندە, ليتسەنزياسى بار جەكەمەنشىك كومپانيا قىزمەتكەرلەرى جوسپارلى تەكسەرۋلەر جۇرگىزىپ, قاجەت بولعان جاعدايدا جابدىقتى جوندەپ, اۋىستىرۋى كەرەك. وسى تارتىپكە حالىقتى ۇيرەتۋ ءۇشىن ۋاقىت قاجەت, – دەگەن اپاتتىق ديسپەتچەرلىك قىزمەتىنىڭ باستىعى ءادىلحان ەرباتىر مۇنداي جاعدايدىڭ جەكە سەكتوردا ءجيى كەزدەسەتىنىن العا تارتتى.
ءادىلحان دارحان ۇلىنىڭ ايتۋىنشا, جەرگىلىكتى فيليال «گازداندىرۋدىڭ تەحنيكالىق شارتتارى», دەپ اتالاتىن قۇجات بەرەدى. ال كوگىلدىر وتىنعا قاتىستى تەحنيكالىق قىزمەت كورسەتۋدى سەرتيفيكاتتالعان جەكەمەنشىك كومپانيالار اتقارادى. ولار جاۋاپكەرشىلىگىنە العان شاعىن اۋداندار مەن اۋىلدىق وكرۋگتەر تۇرعىندارىنا قىزمەت كورسەتەدى.
– تەحنيكالىق قىزمەت كورسەتۋ اشىق نارىقتا دەسەم دە بولادى. بىراق «104» نومىرىنە تۇسكەن حابارلامانى «قازترانسگازايماق» اق قابىلداپ, بىردەن شاقىرعان جەرگە اپاتتىق بريگادامەن جەدەل بارادى. نەگىزىندە, قاۋىپسىزدىك ماسەلەسى گاز تۇتىنۋشىعا جۇكتەلگەن, – دەگەن باسشىنىڭ سوزىنەن كوپ جايعا كوز جەتكىزگەندەي بولدىق.
راسىمەن, تەحنيكالىق قىزمەت كورسەتەتىن جەكەمەنشىك كومپانيالارعا باقىلاۋدىڭ جوقتىعى بايقالادى. مۇنداي ولقىلىق وسى قىزمەتكە قاتىسى بار بارلىق ۇيىمداردىڭ قىزمەتىن ۇيلەستىرۋمەن, گاز جەتكىزۋشىگە, قىزمەت كورسەتۋشى كومپانيالارعا, سونىڭ ىشىندە, رتسكۋ-عا قاتىستى شاعىمداردى قارايتىن گاز-تەحنيكالىق ينسپەكتسيانىڭ جوقتىعىنان بولسا كەرەك.
دەسەك تە, «قازترانسگازايماق» اق-نىڭ اتىراۋ وندىرىستىك فيليالىنىڭ قىزمەتكەرلەرى تۇرعىنداردىڭ ءوتىنىشىن اياقسىز قالدىرمايدى. ءبىر مىسالىن ايتساق, اتىراۋ قالاسىنىڭ ىرگەسىندەگى كوكارنا ەلدى مەكەنىنىڭ تۇرعىندارى ۇيلەرىنە جىلۋ دۇرىس كەلمەي تۇرعانىن ايتىپ شاعىمدانعان.
– كوكارناداعى ق.عابدۋللين كوشەسىندەگى تەك بەس ءۇيدىڭ تۇرعىنى «2-3 جىل بولدى, جىلىتۋ ماۋسىمىندا ءۇيىمىز بىرەسە سۋىق, بىرەسە جىلى» دەپ ءوتىنىش ايتتى. اتالعان جەكە سەكتورلار ءبىزدىڭ بالانسىمىزدا بولماسا دا, بارىپ تەكسەرۋدى ءجون كوردىك, – دەپ ءتۇسىندىردى ءادىلحان دارحان ۇلى.
ماماندار 3 كۇن بويى زەرتتەپ, قۇبىر بويىنداعى قىسىمنىڭ تۇراقتى ەمەس ەكەنىن انىقتاعان. بىرلەسكەن جۇمىستىڭ ناتيجەسىندە سەبەبى دە تابىلدى. «كىم ەكەنى بەلگىسىز, قۇبىرلاردىڭ قوسىلۋ نۇكتەسىن پلاستيكالىق پاكەتپەن بىتەپ تاستاعان ەكەن», دەيدى گاز تاراتۋ مەكەمەسىنىڭ ماماندارى. سونىڭ كەسىرىنەن جوعارىدا ايتقان 5 ءۇي تۇراقسىز گاز قىسىمىنان جىلۋدى جەتكىلىكتى مولشەردە الماعان. جىل سايىن قايتالاناتىن كۇرمەۋلى ماسەلەنىڭ شەشىلگەنىنە قۋانعان تۇرعىندار الەۋمەتتىك جەلى ارقىلى گاز قىزمەتكەرلەرىنە ريزاشىلىعىن ءبىلدىرىپتى.
وسى تۇستا مىنا جاعدايدى دا ايتا كەتەلىك. جۋىردا بەلگىلى جۋرناليست ۆيكتور سۋتياگين ءوزىنىڭ پاراقشاسىندا قيىن جاعدايعا تاپ بولعان جاس انانىڭ ءومىرى تۋرالى جازدى. ونىڭ ايتۋىنشا, دانا حە ەسىمدى تۇرعىننىڭ اناسى قايتىس بولىپ, ءوزى سابيىمەن قيىن كۇندەردى باستان وتكىزەدى. جاس انانىڭ پاتەرى جىلداپ جوندەۋ كورمەگەن, ءتىپتى تابيعي گازدىڭ يگىلىگىن دە پايدالانىپ كورمەگەن.
«قايىرىمدىلىق جاساساڭ – يگىلىگىن ءوزىڭ كورەسىڭ» دەگەندەي, تۇرعىندار جارىسا قولۇشىن سوزدى.
«بۇگىن بۇل پاتەرگە العاش رەت گاز بەرىلدى. «قازترانسگازايماق» اق-نىڭ اتىراۋ وندىرىستىك فيليالى ديرەكتورىنىڭ مىندەتىن اتقارۋشى سامات ەشمانوۆ بۇل ماسەلەنى جەكە باقىلاۋىنا الىپ, كوگىلدىر وتىننىڭ بەرىلۋىن باستان-اياق قاداعالاپ وتىردى», دەپ جازىلعان ۆ.سۋتياگيننىڭ پاراقشاسىندا. ال ۆيدەودا دانا حەنىڭ ءوزى پاتەرىندە گاز قۇرىلعىسىن پايدالانىپ تۇرىپ, بارلىق قولداۋشى قايىرىمدى جاندارعا ريزاشىلىعىن جەتكىزدى.
مىنە, گاز تاراتۋ قىزمەتكەرلەرىنىڭ جۇمىس بارىسىندا مۇنداي مىسالدار ءجيى كەزدەسەدى. بۇل تەك ءبىزدىڭ زاماناۋي اقپارات تاراتۋ قۇرالدارىنان بىلگەنىمىز...
وندىرىستىك تەحنيكالىق ءبولىم باستىعىنىڭ ورىنباسارى سالامات يحسانوۆتىڭ ايتۋىنشا, «قازترانسگازايماق» اق-نىڭ اتىراۋ وندىرىستىك فيليالى وڭىردەگى 5 600 شاقىرىمداي ماگيسترالدىق گاز قۇبىرىنا قىزمەت كورسەتەدى.
– گاز تاسىمالداۋ جۇيەسى نىساندارىنىڭ تسيفرلىق كارتاسى جاسالعان. كارتادان بارلىق اقپارات كورىنىپ تۇرادى (قۇبىر, ابونەنتتەر). بۇل دەرەكتەردى تالداۋ ارقىلى تەحنيكالىق قىزمەت كورسەتۋ مەن جوندەۋ شىعىندارىن باقىلاۋعا مۇمكىندىك بار. ايتا كەتەيىن, وسى 5 600 شاقىرىم قۇبىردىڭ 3 مىڭ شاقىرىمى ءبىزدىڭ مەكەمەگە ءالى كۇنگە دەيىن تاپسىرىلماعان. «اۋادا» تۇرعان قۇبىرلار ءبىرى زاڭدى تۇلعالارعا تيەسىلى بولسا, ەندى ءبىرى باۋ-باقشا قوعامداستىعىنىڭ يەلىگىندە تۇر, – دەگەن وندىرىستىك تەحنيكالىق ءبولىم باستىعىنىڭ ورىنباسارى يەسىز قۇبىرلاردىڭ دا اپاتسىز جانە ۇزدىكسىز گازبەن جابدىقتالۋى قامتاماسىز ەتىلەتىنىن اتاپ ءوتتى.
وڭىردەگى «قازترانسگازايماق» اق-نىڭ اتىراۋ وندىرىستىك فيليالى گازدى تاراتىپ تاسىمالداۋ, تۇرعىنداردى, كوممۋنالدىق-تۇرمىستىق, ونەركاسىپتىك كاسىپورىنداردى اپاتسىز جانە ۇزدىكسىز گازبەن جابدىقتاۋدى قامتاماسىز ەتۋ جانە ينفراقۇرىلىمداردى باسقارۋ جونىندەگى قىزمەتتەردى جۇزەگە اسىرادى. گاز تاراتۋ ماماندارىنىڭ ايتۋىنشا, كومپانيانىڭ الەۋمەتتىك جاۋاپكەرشىلىگى دە جوعارى.
– فيليال باسشىلىعى الەۋمەتتىك-ەڭبەك قاتىناستارىنا, كادرلاردىڭ بىلىكتىلىگىن ارتتىرۋ, ەڭبەكتى قورعاۋ ماسەلەلەرىنە ەرەكشە نازار اۋدارادى. كومپانيانىڭ كاسىپوداعى تاراپىنان دەمالىس ورنىنا جەڭىلدىكپەن جولداما قاراستىرىلعان, سونداي-اق «مەكتەپكە جول» اكتسياسىنىڭ بەلسەندى قولداۋشىسى دەسەم دە بولادى, – دەدى وندىرىستىك تەحنيكالىق ءبولىم باستىعىنىڭ ورىنباسارى سالامات يحسانوۆ.
ءتۇيىن. گاز تاراتۋ مەكەمەسىنىڭ ماماندارى اڭگىمەنى توبىقتاي تۇيىنمەن اياقتادى. ول «ساقتانساڭ – ساقتايمىن» دەگەن ءتامسىل بار عوي, تۇرعىندار كوگىلدىر وتىننىڭ قاۋىپتىلىگىن ەستەن شىعارماسا ەكەن», دەگەن ءبىراۋىز ءسوز ەدى...
مايرا ورازعاليەۆا