ساۋد ارابياسىنداعى ديپلوماتيالىق كورپۋستا «Ambassadors Choice International Film Festival» كينوفەستيۆالى ءوتىپ, وعان قازاقستانمەن قاتار ءۇندىستان, يسپانيا, اۋستراليا, كۋبا, شۆەتسيا, بانگلادەش, اقش, ليۆان, ساۋد ارابياسى, الجير, ليۆان, پالەستينا سياقتى ەلدەر قاتىستى.
كينوفەستيۆال اياسىندا رەجيسسەر اقان ساتاەۆتىڭ «توميريس» اتتى قازاقستاندىق كوركەم ءفيلمى كوپشىلىككە ۇسىنىلدى. كينو ەجەلگى گرەك تاريحشىسى گەرودوت گاليكارناستىڭ ماسساگەت پاتشايىمى تۋرالى شەجىرە-دەرەكتەرىنە نەگىزدەلگەن.
فيلم جەرگىلىكتى كورەرمەندەر مەن ديپلوماتيالىق كورپۋس وكىلدەرىنىڭ وڭ پىكىرلەرىن الدى. تاماشالاۋعا كەلگەندەر قازاقستاندىق كينو اكتەرلەرىنىڭ ونەرىن جوعارى باعالادى. ولار سونداي-اق ەڭ كۇردەلى جاۋىنگەرلىك, شاباندوزدىق شەبەرلىك كورىنىستەرىنىڭ اۋقىمى مەن ورىندالۋىن اتاپ ءوتتى جانە «توميريس» ءفيلمىن سوڭعى جىلدارداعى ساپالى تاريحي فيلمدەردىڭ ءبىرى دەپ اتادى.