استانادا جەڭىل اتلەتيكادان حالىقارالىق تۋرنير ءوتىپ جاتىر

تۇڭعىش رەت جالاۋىن كوتەرگەن جارىسقا تاجىكستان, گونكونگ, قىرعىزستان جانە قازاقستاننان ەكى جۇزگە تارتا سپورتشى قاتىسىپ جاتىر.

«ەلوردا تورىندە جەڭىل اتلەتيكادان كسرو-نىڭ ەڭبەك سىڭىرگەن سپورت شەبەرى, ەلىمىزدىڭ ەڭبەك سىڭىرگەن قايراتكەرى ءامين ەلەمەس ۇلى تۇياقوۆتىڭ قۇرمەتىنە جەڭىل اتلەتيكادان حالىقارالىق تۋرنير ءوتتى. الىس-جاقىن بەس مەملەكەت سپورتشىلارى باق سىناعان جارىس الداعى ۋاقىتتا ءداستۇرلى تۇردە جالعاسىن تابادى دەپ ۇمىتتەنەمىن. ءامين اعامىزدىڭ وتاندىق جەڭىل اتلەتيكاعا قوسقان ۇلەسى وراسان زور. ءبىز وسىنداي ازاماتتاردى ارداقتاپ, بارىندا باعاسىنا جەتۋگە ءتيىسپىز. ال وسكەلەڭ ۇرپاق, جاس سپورتشىلار الدىڭعى بۋىن اعالارىنىڭ جولىن جارقىن جەڭىستەرىمەن جالعاۋى ءتيىس», دەدى جەڭىل اتلەتيكا فەدەراتسياسىنىڭ باس حاتشىسى اسحات سەيسەمبەك.

جارىس باعدارلاماسىنا جەڭىل اتلەتيكانىڭ مىناداي تۇرلەرى كىرەدى:

• جۇگىرۋ – 60م, كەدەرگىلەرمەن 60م, 400م, 800م, 3000م;

• يادرو يتەرۋ;

• ۇزىندىققا سەكىرۋ;

• بيىكتىككە سەكىرۋ.

سونىمەر قاتار جارىس باعدارلاماسىنا 14 جاسقا دەيىنگى بالالار اراسىندا 60 م قاشىقتىققا جۇگىرۋ جانە 4ح200م ارالاس ەستافەتا (2ۇل + 2قىز) ەنگىزىلدى.

جارىستىڭ جەڭىمپازدارى مەن جۇلدەگەرلەرىنە اقشالاي سىياقى تاعايىندالعان. جارىستىڭ سالتاناتتى اشىلۋ سالتاناتىنا ءامين تۇياقوۆ, قر مادەنيەت جانە سپورت ۆيتسە-ءمينيسترى سەرىك جاراسباەۆ, جەڭىل اتلەتيكا فەدەراتسياسىنىڭ باس حاتشىسى اسحات سەيسەمبەك قاتىستى.

«جەڭىل اتلەتيكاعا ارنالىپ سالىنعان وسىنداي مانەجدە حالىقارالىق جارىستاردىڭ كوپتەپ وتكەنى جاقسى. بيىل مەنىڭ اتىما ارنالعان جارىس ءبىرىنشى رەت ۇيىمداستىرىلىپ وتىر, وتە قۋانىشتىمىن. سايىستا ءارتۇرلى ەلدەردىڭ سپورتشىلارى باق سىناپ جاتىر, بۇل ءبىزدىڭ سپورتشىلارىمىزدى ۇلكەن جارىستارعا دايىنداۋعا كومەكتەسەدى. قازاقستاندىق جەڭىل اتلەتتەر وسىنداي باسەكەلەرگە ءتۇسۋ ارقىلى شىڭدالادى, وزگە ەل سپورتشىلارىنان ۇلگى الادى», دەدى جەڭىل اتلەتيكادان ەۋروپا چەمپيوناتىنىڭ جۇلدەگەرى ءامين تۇياقوۆ.

ءامين تۇياقوۆ جەڭىل اتلەتيكادان كسرو-نىڭ ەڭبەك سىڭىرگەن سپورت شەبەرى, قازاقستاننىڭ ەڭبەك سىڭىرگەن قايراتكەرى, ماڭعىستاۋ وبلىسىنىڭ قۇرمەتتى ازاماتى. قسرو چەمپيوناتىنىڭ جەڭىمپازى جانە جۇلدەگەرى, كسرو رەكوردشىسى, ەۋروپا كۋبوگىنىڭ يەگەرى, ەۋروپا چەمپيوناتىنىڭ جۇلدەگەرى.