قورشاعان ورتا جانە سۋ رەسۋرستارى ءمينيسترى نۇرلان قاپپاروۆ دۇنيەجۇزىلىك قورشاعان ورتا كۇنى جانە ەكولوگ كۇنىنە ورايلاستىرىلعان سالتاناتتى جينالىس وتكىزدى. جينالىسقا مينيسترلىكتىڭ قۇرىلىمدىق ءبولىمشەلەرىنىڭ, ۆەدومستۆوعا باعىنىستى جانە قوعامدىق ۇيىمداردىڭ وكىلدەرى قاتىستى.
جينالىس بارىسىندا مينيسترلىكتىڭ ەكولوگيالىق باقىلاۋ جانە رەتتەۋ كوميتەتىنىڭ ۇيىمداستىرۋىمەن رەسپۋبليكالىق دەڭگەيدە وتكىزىلگەن بالالاردىڭ سۋرەت بايقاۋىنىڭ جەڭىمپازدارىن ماراپاتتاۋ ءراسىمى ءوتتى.
ن.قاپپاروۆ استانا قالاسىنداعى №37 ورتا مەكتەبىنىڭ وقۋشىسى ماريا كاربۋشەۆانى, باتىس قازاقستان وبلىسى بوكەيوردا اۋداندىق ورتا مەكتەپتىڭ وقۋشىسى عاسىر ناسەكەنوۆتى, پاۆلودار وبلىسىنداعى ميچۋرين بالالار ءۇيىنىڭ تاربيەلەنۋشىسى الينا پيلياگينانى قۇرمەت گراموتاسىمەن جانە باعالى سىيلىقپەن ماراپاتتادى. سونىمەن قاتار, مينيستر وبلىستىق دەڭگەيدەگى بايقاۋ جەڭىمپازدارىن – ەلىمىزدىڭ بارلىق وڭىرلەرىنەن كەلگەن بالالاردى ماراپاتتادى.
سونداي-اق, وسى كۇنى بەلارۋس, قازاقستان جانە رەسەي ەلدەرى اۋماقتارىندا دۇنيەجۇزىلىك قورشاعان ورتا كۇنىنە وراي حالىقارالىق ەكولوگيالىق سەنبىلىك وتكىزىلدى.
قازاقستاننىڭ بارلىق ايماقتارىندا وتەتىن اكتسيا بارىسىندا قالالار مەن قالا ماڭى اۋماقتارى, دەمالىس مەكەندەرى, ساياباقتار مەن سۋ ايدىندارىنىڭ جاعالاۋلارى تۇرمىستىق كۇل-قوقىستاردان تازارتىلادى.
قازاقستان وڭىرلەرىندە سەنبىلىككە 130 مىڭعا جۋىق ادام قاتىستى. ولاردىڭ قاتارىندا ورتالىق جانە جەرگىلىكتى اتقارۋشى ورگانداردىڭ, قوعامدىق ۇيىمداردىڭ, كاسىپورىنداردىڭ وكىلدەرى, سونداي-اق, جوو ستۋدەنتتەرى ەڭبەك ەتتى.
استانادا ەكولوگيالىق اكتسياعا 600-دەن استام ادام قاتىستى. قورشاعان ورتا جانە سۋ رەسۋرستارى مينيسترلىگىنىڭ, «استانا ورمانى» جانە «پوليگون» جشس, سونداي-اق, «جاس وتان» جاستار قاناتىنىڭ وكىلدەرى مەن ستۋدەنتتەر قالالىق قالدىقتار پوليگونىنا ىرگەلەس ورمان اۋماعىن قوقىستان تازارتۋعا اتسالىستى.
«ەگەمەن-اقپارات».