كەشە «قازترانسگاز» اكتسيونەرلىك قوعامى مەن «LeMarCAInc» كومپانيالار توبى اراسىندا قاراعاندى كومىر باسسەينىنەن مەتان شىعارۋ جانە بارلاۋ جوبالارىن جۇزەگە اسىرۋ ءۇشىن بىرلەسكەن كاسىپورىن قۇرۋ تۋرالى قۇرىلتايشىلىق كەلىسىمگە قول قويىلدى.
وسىنىڭ الدىندا «قازترانسگاز» اق ەلباسى ن.نازارباەۆتىڭ 2010 جىلعى كومىر كەن ورىندارىنان مەتان شىعارۋ جانە ونى كادەگە جاراتۋدى ۇيىمداستىرۋ تۋرالى تاپسىرماسىنا وراي, سونداي-اق, ەلىمىزدىڭ سولتۇستىك جانە ورتالىق ايماقتارىن گازداندىرۋعا بالاما نۇسقالاردى زەردەلەۋ ماقساتىندا قاراعاندى كومىر باسسەينىندەگى كومىر قىرتىسىنان مەتان الۋدىڭ مۇمكىندىگىن قاراستىرعان بولاتىن. بۇل كومىرسۋتەگى شيكىزاتىن شىعارۋ سالاسىنداعى يننوۆاتسيالىق باعىتتاردىڭ ءبىرى ءارى ەلىمىزدەگى وتىن-ەنەرگەتيكا بازاسىنىڭ بالاما جيىنتىعىن قاراستىرۋعا بولجامدى قورى مۇمكىندىك بەرەتىن ءداستۇرلى ەمەس قۋات كوزى بولىپ ەسەپتەلەدى.
ال, «LeMarCAInc» كومپانياسىنىڭ جونىنە كەلەر بولساق, اقش اۋماعىندا جاڭا تەحنولوگيانىڭ مۇمكىندىكتەرىنىڭ ارقاسىندا جىلىنا 36 ملرد. م3 گاز شىعارىلاتىنى بەلگىلى. سول ەلدىڭ كومىر قىرتىسىن بۇرعىلاۋداعى الدىڭعى قاتارلى جۇمىس تاجىريبەسىن ۇيرەنىپ ءارى ونى قولدانىسقا ەنگىزۋ بارىسىندا جوعارىدا اتالعان قۇجاتقا قول قويماي تۇرعاندا بىرقاتار وزىق امەريكالىق كومپانيالار توبىمەن كەلىسسوزدەر جۇرگىزىلدى. اتاپ ايتقاندا, كومىر قىرتىسىنان مەتان وڭدەيتىن «CoreLaboratories» عىلىمي ورتالىعىمەن, وڭدەۋ جانە بۇرعىلاۋ تەحنولوگياسىن جاساۋمەن شۇعىلداناتىن «ScientifficDrillin» كومپانياسىمەن, كەن ورىندارىن كەشەندى يگەرەتىن «LeMarCAInc.» ينجينيرينگتىك كومپانياسىمەن بىرگە جۇمىس اتقارۋ ءۇشىن كەلىسسوزگە قول جەتكىزىلدى.
«قازترانسگاز» اق پەن «LeMarCAInc» كومپانيالار توبىنىڭ اراسىندا قۇرىلتايشىلىق كەلىسىمىنە قول قويۋ جوسپارلانعاندا تاراپتار زاڭدى تۇلعا قۇرۋعا جانە قاراعاندى كومىر باسسەينىنەن مەتان شىعارۋ جانە بارلاۋدى جۇزەگە اسىراتىن ينۆەستيتسيالىق جوبالار بويىنشا بىرگە اتقاراتىن ىستەرىنىڭ رەتىن انىقتاۋعا مىندەتتەلگەن بولاتىن. ەندى مىنە, جوسپارلانعان شارۋالاردى ءارى قاراي بىرگە اتقارىپ, مەتان الۋعا مۇمكىندىك تۋىپ وتىر. بۇل تۋرالى «قازترانسگاز» اق باس ديرەكتورى سەرىك سۇلتانعالي بىلاي دەيدى: «وسى قۇجاتتىڭ ارقاسىندا ەلىمىزدىڭ سولتۇستىك ايماقتارىن گازبەن قامتاماسىز ەتۋگە ستارت بەرىلدى. بۇل شارۋالاردىڭ بارلىعى ەلباسى ن.نازارباەۆتىڭ تاپسىرماسى بويىنشا جاسالۋدا». اتاپ وتەيىك, بىرلەسكەن قۇجاتقا «قازترانسگاز»اق-تىڭ باس ديرەكتورى سەرىك سۇلتانعالي مەن «LeMarCA Inc» پرەزيدەنتى لەون پوپيك قول قويدى.
«ەگەمەن-اقپارات».