وبلىستىڭ كاسىپكەرلەر پالاتاسى بيزنەس وكىلدەرىنە ءتۇرلى ماسەلەلەر بويىنشا كومەك بەرۋ ءۇردىسىن قالىپتاستىرۋدا. پالاتا ءوز ونىمدەرىن شەتەلدەرگە ەكسپورتقا شىعارۋدى كوزدەيتىن كاسىپكەرلەرگە ىقپال ەتۋگە دايىن. بۇل مەكەمەنىڭ ساراپشىلارى تاۋار وندىرۋشىلەردىڭ دەرەكتەر بازاسىن قۇرادى, كەدەن وداعىنا كىرەتىن ەلدەردىڭ جانە الىس شەتەلدەردىڭ نارىعىن تالدايدى.
وبلىستىڭ كاسىپكەرلەر پالاتاسىنىڭ حالىقارالىق جانە وڭىرارالىق ىنتىماقتاستىق جونىندەگى ساراپشىسى اينۇر بايمۇراتوۆانىڭ ايتۋىنشا, كومپانيالار سىرتقى نارىقتا قانداي ونىمدەرگە سۇرانىس بارىن بىلە بەرمەيدى, قانداي ونىمدەردى ەكسپورتقا شىعارۋعا بولاتىنىنان دا بەيحابار بولىپ كەلەدى. سونداي-اق, شەتەلدىك كومپانيالار دا قازاقستاننىڭ ەكسپورتتىق الەۋەتىن جەتىك بىلمەيدى.
– ءبىز اقتوبەلىك كاسىپكەرلەرگە جاڭا ىسكەرلىك قارىم-قاتىناستار ورناتۋعا كومەكتەسۋگە ءازىرمىز, – دەيدى ول.
وتكەن جىلى وبلىستىڭ سىرتقى ساۋدا اينالىمى 9918,8 ميلليارد اقش دوللارى بولدى. ونىڭ نەگىزگى ۇلەسىن 8420,8 ميلليارد اقش دوللارى بولاتىن تاۋار ەكسپورتى قۇرادى. ەكسپورتقا نەگىزىنەن شيكى مۇناي, حروم جانە مىس كەنى, حروم تۇزدارى شىعارىلدى. اقتوبەدە شىعارىلعان ونىمدەر قىتايعا, جاپونياعا, يتالياعا, اۆسترياعا جانە باسقا دا ەلدەرگە ەكسپورتتالدى.
ساتىبالدى ءساۋىرباي,
«ەگەمەن قازاقستان».