قازاقستان پارلامەنتى ءماجىلىسىنىڭ سپيكەرى ەرلان قوشانوۆ باستاعان دەلەگاتسيا پاكىستان ۇلتتىق اسسامبلەياسىنىڭ سپيكەرى رادجا پەرۆەز اشرافتىڭ شاقىرۋىمەن يسلامابادقا باردى.
ساپار بارىسىندا ەرلان قوشانوۆ پاكىستان ۇلتتىق اسسامبلەياسىنىڭ سپيكەرى رادجا پەرۆەز اشرافپەن كەزدەسىپ, ەكى ەل اراسىنداعى پارلامەنتارالىق ىنتىماقتاستىق ماسەلەلەرىن تالقىلادى.
ءماجىلىس سپيكەرى ارىپتەسىن پاكىستان تاۋەلسىزدىگىنىڭ جانە پارلامەنتىنىڭ 75 جىلدىعىمەن قۇتتىقتادى. باۋىرلاس ەلگە باق-بەرەكە تىلەپ, پاكىستان قازاقستاننىڭ وڭتۇستىك ازياداعى ماڭىزدى سەرىكتەسى ەكەنىن اتاپ ءوتتى.
– بيىل ەلدەرىمىز اراسىندا ديپلوماتيالىق قارىم-قاتىناستىڭ ورناعانىنا 30 جىل تولدى. وسى ۋاقىتتىڭ ىشىندە قازاقستان مەن پاكىستان جان-جاقتى ىنتىماقتاستىق ورناتىپ, ءبىراز تابىسقا قول جەتكىزدى, – دەدى ەرلان قوشانوۆ.
ءماجىلىس توراعاسى قازىرگى تاڭدا قازاقستاندا ماڭىزدى تاريحي وقيعالار بولىپ, پرەزيدەنت قاسىم-جومارت توقاەۆتىڭ باستاماسىمەن اۋقىمدى ساياسي رەفورمالار جۇرگىزىلىپ جاتقانىنا نازار اۋداردى.
– 20 قاراشادا قاسىم-جومارت توقاەۆ قازاقستان پرەزيدەنتى بولىپ سايلاندى. كەلەسى جىلى پارلامەنت سايلاۋىن وتكىزۋدى جوسپارلاپ وتىرمىز. بۇل – ءبىزدىڭ ەلىمىزدەگى پارلامەنتاريزمنىڭ دامۋ تاريحىنداعى جاڭا كەزەڭ. جاڭا زاڭناماعا سايكەس ساياسي پارتيالاردى تىركەۋ راسىمدەرى ەداۋىر جەڭىلدەدى. ناتيجەسىندە سايلاۋدان كەيىن ماجىلىستە ساياسي پارتيالاردىڭ سانى ارتادى دەپ ويلايمىز. بۇل پارلامەنتتىڭ قوعامداعى ءرولى مەن بەدەلىن نىعايتۋعا سەپتىگىن تيگىزەدى, – دەدى ەرلان قوشانوۆ.
ءوز كەزەگىندە پاكىستان ۇلتتىق اسسامبلەياسىنىڭ سپيكەرى رادجا پەرۆەز اشراف پارلامەنتتىك ديپلوماتيانىڭ ماڭىزدىلىعىنا توقتالدى.
– پارلامەنتارالىق ىقپالداستىق جالعاسا بەرەدى. ءبىزدىڭ الەۋەتىمىز زور. ەنەرگەتيكا, قاۋىپسىزدىك, ازىق-ت ۇلىك, اسكەري سالاداعى ارىپتەستىكتى دامىتا الامىز. سونىمەن بىرگە باۋىرلاس حالىقتارىمىزدىڭ دوستىعىن نىعايتۋ ماڭىزدى. ءبىزدىڭ ماقساتىمىز – ورتالىق ازيا ەلدەرىمەن بايلانىستى كۇشەيتۋ, – دەدى پەرۆەز اشراف.
قازىرگى ۋاقىتتا ەكى ەل پارلامەنتتەرىنىڭ بايلانىسى جان-جاقتى دامىپ كەلە جاتىر. «قازاقستان-پاكىستان» دوستىق توبى تابىستى قىزمەت ەتۋدە. بۇگىن ەكى ەل دەپۋتاتتارى پارلامەنتارالىق ىنتىماقتاستىقتى ارتتىرۋعا باعىتتالعان وسى توپتىڭ العاشقى وتىرىسىنا قاتىستى. باسقوسۋدا دوستىق توپتار مەن كوميتەتتەر زاڭناما سالاسىندا تاجىريبە الماسۋ جونىندە كەلىستى.
ساپار اياسىندا ەرلان قوشانوۆ پاكىستاننىڭ پرەمەر-ءمينيسترى شاحباز شاريفپەن كەزدەستى. وندا ءماجىلىس توراعاسى پاكىستان پرەمەر-مينيسترىنە قازاقستان پرەزيدەنتىنىڭ ىستىق سالەمى مەن زور ىقىلاسىن جەتكىزدى.
– ءسىزدىڭ قاسىم-جومارت توقاەۆپەن قىسقا ۋاقىتتىڭ ىشىندە ەكى رەت كەزدەسۋىڭىز ەلدەرىمىزدىڭ دوستىعىن تەرەڭدەتىپ, بايلانىسىمىزدى ارتتىرا تۇسۋدە. وسىنداي جوعارى دەڭگەيدەگى قاتىناستارىمىزدىڭ جالعاسى رەتىندە قازاقستان پرەزيدەنتى قاسىم-جومارت توقاەۆتىڭ الداعى ۋاقىتتا يسلامابادقا رەسمي ساپارى جوسپارلانىپ وتىر. بۇل ساپار دوستاس ەلدەر اراسىنداعى تىعىز قارىم-قاتىناستى جاڭا دەڭگەيگە كوتەرىپ, ودان ءارى دامۋىنا زور سەرپىن بەرەتىنىنە سەنىمدىمىن, – دەدى ءماجىلىس سپيكەرى.
ەرلان قوشانوۆ پاكىستان مەملەكەتى قازاقستان تاۋەلسىزدىگىن ەڭ العاشقىلاردىڭ ءبىرى بولىپ تانىعان ەل ەكەنىن ەرەكشە اتاپ ءوتتى. قازىرگى تاڭدا قازاقستان مەن پاكىستان اراسىنداعى ساۋدا-ەكونوميكالىق قارىم-قاتىناس جىل ساناپ ارتىپ كەلەدى. بىلتىر ءوزارا تاۋار اينالىمى 100 ملن دوللارعا جۋىقتادى. الدىڭعى جىلمەن سالىستىرعاندا ەكى ەسە ۇلعايىپ وتىر.
پاكىستان پرەمەر-ءمينيسترى شەحباز شاريف ەكى جىلدا قازاقستان مەن پاكىستان اراسىنداعى ساۋدا-ساتتىقتى ەكى ەسە ارتتىرۋعا مۇمكىندىك بار ەكەنىنە باسا ءمان بەردى.
– بۇگىنگى ۇلتتىق اسسامبلەيانىڭ سپيكەرىمەن كەزدەسۋىڭىز تابىستى بولدى دەپ ويلايمىن. پارلامەنتتەرىمىزدىڭ بايلانىسى نىعايىپ, ەكونوميكالىق ىنتىماقتاستىقتى كۇشەيتۋگە بارلىق مۇمكىندىك بار. اسىرەسە, ساۋدا-ساتتىق, لوگيستيكا, اۋىل شارۋاشىلىعى, ءبىلىم مەن عىلىم سالاسىنداعى سەرىكتەستىكتىڭ الەۋەتى زور. پرەزيدەنت توقاەۆقا مەنىڭ ىستىق سالەمىمدى جەتكىزۋىڭىزدى سۇرايمىن. الداعى كەزدەسۋىمىزدى اسىعا كۇتەمىن جانە جەمىستى وتەتىنىنە كامىل سەنەمىن, – دەدى شەحباز شاريف.
سونىمەن قاتار ءماجىلىس توراعاسى پاكىستان پرەزيدەنتى اريف ۋر-رەحمان الۆيمەن جانە پاكىستان سەناتىنىڭ توراعاسى مۋحامماد ساديك ساندجرانيمەن جەكە-جەكە كەزدەستى. ءماجىلىس توراعاسى 230 ملن-نان اسا حالقى بار پاكىستان نارىعى قازاقستان ءۇشىن ۇلكەن قىزىعۋشىلىق تۋدىرىپ وتىرعانىنا ءمان بەردى.
– پاكىستاننىڭ تەڭىز پورتتارىنا شىعۋى ەلىمىز ءۇشىن ءتيىمدى بولار ەدى. ءبىز استىق, ەنەرگورەسۋرستار جانە باسقا دا تاۋارلاردى ەكسپورتتاۋ مۇمكىندىگىن پىسىقتاپ جاتىرمىز. بىزگە وڭىرلىك ترانزيتتىك جانە لوگيستيكالىق ينفراقۇرىلىمدى دامىتۋدىڭ ماڭىزى زور, – دەدى ەرلان قوشانوۆ.
سونداي-اق كەزدەسۋلەردە حالىقارالىق, مادەني-گۋمانيتارلىق ىنتىماقتاستىق ماسەلەلەرى دە تالقىلاندى. تاراپتار دوستىق بايلانىستار قوس ەل كوشباسشىلارىنىڭ ءوزارا ءتيىمدى ىقپالداستىعىنىڭ جەمىسى ەكەنىنە نازار اۋداردى. ەكىجاقتى بايلانىستى كۇشەيتۋگە باعىتتالعان بۇل جۇمىستار پارلامەنت دەڭگەيىندە قىزۋ جالعاسادى.