پرەزيدەنتى ءىس باسقارماسىنىڭ مەديتسينالىق ورتالىعى اۋرۋحاناسىنىڭ ديرەكتورى 75 جاستاعى پاتسيەنتكە وپەراتسيا جاسادى, دەپ حابارلايدى Egemen.kz قر ءپىب موا ءباسپاسوز قىزمەتىنە سىلتەمە جاساپ.
قر ءپىب مەديتسينالىق ورتالىعىنىڭ اۋرۋحاناسىنا شۇعىل تارتىپپەن 75 جاستاعى پاتسيەنت ءتۇستى. دارىگەرلەردىڭ قاراپ-تەكسەرۋى مەن جۇرەك كوروناروگرافياسىنىڭ ناتيجەسىندە «ميوكارد ينفاركتىسى» دياگنوزى قويىلدى.
قر ءپىب مەديتسينالىق ورتالىعى اۋرۋحاناسىنىڭ ديرەكتورى رۋستام الباەۆ بۇگىن تاڭەرتەڭ 8.45-تە وسى پاتسيەنتكە جەدەل تۇردە اورتوكورونارلىق شۋنتتاۋ وپەراتسياسىن جاسادى. وپەراتسيا ءساتتى ءوتتى, ناۋقاستىڭ قازىرگى جاعدايى قالىپتى.
«وپەراتسيالىق بولمە – باسقا ءبىر الەم سياقتى. بۇل جەردىڭ اتموسفەراسى بولەك, وزىنە ءتان رۋحى بار. ءبىز جۇمىس كۇنىن اياقتاۋ ءۇشىن عانا جۇمىس ىستەمەيمىز, پاتسيەنتتىڭ ءومىرىن جاقسارتا ءتۇسۋ ءۇشىن قىزمەت اتقارامىز. بىزدە ءبىر ۋاقىتتا 11 وپەراتسيالىق زال جۇمىس ىستەيدى. ءبىزدىڭ مىندەتىمىز – بارلىق جوسپارلانعان وپەراتسيالاردى ناقتى بەلگىلەنگەن ۋاقىتتا جاساۋ. ءبىزدى شۆەيتساريالىق ساعاتپەن سالىستىرۋعا بولادى, ىسكە قوسىلعان ساتتەن باستاپ سوڭىنا دەيىن ۇزدىكسىز جۇمىس ىستەيمىز. وپەراتسيالىق بلوك تا تۋرا سولاي – پاتسيەنتتەردىڭ ءومىرىن ساقتاپ قالۋ جانە دەنساۋلىقتى جاقسارتۋ ءۇشىن توقتاۋسىز جۇمىس ىستەيدى. ولاردىڭ بىرىندە روبوتتالعان حيرۋرگيا بويىنشا وپەراتسيالار, ەكىنشىسىندە – ەلدە بالاماسى جوق بيپلان انگيوگرافيالىق كەشەن جۇيەسىنىڭ كومەگىمەن وپەراتسيالار جاسالادى. بلوكتا انەستەزيولوگيا, ترانسفۋزيولوگيا, پەرفۋزيولوگيا, نەيروحيرۋرگيا, كارديوحيرۋرگيا, انگيوحيرۋرگيا, اريتمولوگيا, وتورينولارينگولوگيا, ۋرولوگيا, گينەكولوگيا, جالپى حيرۋرگيا, وفتالموحيرۋرگيا, كولوپروكتولوگيا, تراۆماتولوگيا جانە ورتوپەديا بەيىندەرى بويىنشا 60-تان استام ورتا جانە كىشى مەديتسينالىق پەرسونال ماماندارى مەن دارىگەرلەرى جۇمىس ىستەيدى», دەدى قر پرەزيدەنتى ءىس باسقارماسى مەديتسينالىق ورتالىعى اۋرۋحاناسىنىڭ ديرەكتورى رۋستام الباەۆ.
كورونارلىق شۋنتتاۋ – يشەميالىق جۇرەك اۋرۋىن (يجا) ەمدەۋدىڭ نەگىزگى ماڭىزدى ادىستەرىنىڭ ءبىرى. قازىرگى ۋاقىتتا بۇل پاتولوگيانى ەمدەۋدىڭ «التىن ستاندارتى» – ميوكارد رەۆاسكۋلياريزاتسياسى.
جىل سايىن قر ءپىب مەديتسينالىق ورتالىعى اۋرۋحاناسىنىڭ وپەراتسيالىق بلوگىندا 5000-نان استام وپەراتسيا, اشىق جۇرەككە 300-دەن استام وپەراتسيا جاسالادى.