ۇلتتىق قوردىڭ ينۆەستيتسيالىق تابىسى بالالاردىڭ ەسەپشوتىنا اۋدارىلا باستايدى

«ۇكىمەت بيۋدجەتتىڭ تۇراقتى بولۋىن قامتاماسىز ەتۋى كەرەك. ۇلتتىق قوردىڭ ترانسفەرتىنە تاۋەلدىلىكتەن بىرتىندەپ قۇتىلۋىمىز قاجەت. ءبىر جىلدان كەيىن ۇلتتىق قوردىڭ ينۆەستيتسيالىق تابىسىنىڭ جارتىسىن بالالاردىڭ ەسەپشوتىنا اۋدارا باستايمىز. سول كەزدە بارشا ازاماتتار ۇلتتىق قورداعى احۋالدى ءجىتى قاداعالاپ وتىراتىن بولادى», دەدى پرەزيدەنت. 

قاسىم-جومارت توقاەۆ ء«اربىر ازامات – ۇلتتىق بايلىقتىڭ يەسى» دەگەن ءسوز جاي ۇران ەمەس ەكەنىن اتاپ ءوتتى. 

- بۇل ناعىز حالىقتىق, قوعامدىق باقىلاۋدىڭ باستالعانىن بىلدىرەدى. ۇكىمەت تە, ۇلتتىق بانك تە مۇنى جەتە ءتۇسىنۋى كەرەك. تاعى دا ەستەرىڭىزگە سالامىن, الداعى 7 جىلدا ۇلتتىق قوردىڭ اكتيۆتەرى 100 ميلليارد دوللارعا جەتۋگە ءتيىس. سوندىقتان اقشانى ازىراق جۇمساپ, كوبىرەك تابىس تابۋ كەرەك. قازىر بۇل ماسەلەدە ولقىلىقتار بار. ۇلتتىق قوردىڭ ينۆەستيتسيالىق كىرىسى وزگە ەلدەردىڭ مۇنداي قورلارىمەن سالىستىرعاندا الدەقايدا تومەن. ۇلتتىق قوردىڭ جىلدىق تابىسى سوڭعى 10 جىلدا 1,6 پايىز بولدى. سينگاپۋرداعى وسىنداي قور 6,4 ال نورۆەگيانىڭ قورى 7,5 پايىز تابىس تاپقان. دەمەك, بىزدەگى قوردى باسقارۋ مىندەتىن اتقاراتىن ورگاننىڭ جۇمىسى ايتارلىقتاي ءتيىمدى دەپ ايتۋعا بولمايدى, - دەدى مەملەكەت باسشىسى.وسى رەتتە ق.توقاەۆ ۇلتتىق بانككە ۇكىمەتپەن بىرلەسىپ, ۇلتتىق قوردى باسقارۋ ءىسىن جەتىلدىرۋ تۋرالى ۇسىنىس ەنگىزۋدى تاپسىرىپ, وندا ءوزى ايتىپ وتكەن كەمشىلىكتەر تۇگەل ەسكەرىلۋگە تيىستىگىن قاداپ ايتتى.