جاقسىلىق, جاردەم جانە ساۋاپ ءىس – قوعامنىڭ بەرەكەسى. وسى ورايدا ماڭعىستاۋدا بيۋدجەتتەن ارنايى اقشا ءبولىنىپ, از قامتىلعان وتباسىلارعا كومەك رەتىندە 5 مىڭنان اسا گاز تالداعىش ورناتىلدى.
مامانداردىڭ ايتۋىنشا, تۇرعىن ۇيلەردە تابيعي جانە كومىرتەگى توتىعىمەن ۋلانۋدىڭ الدىن الۋدىڭ ءبىر ءادىسى – قازاندىق قۇرىلعىلارىنان گازدىڭ اعىپ كەتۋىن انىقتايتىن گاز (تالداعىش) اناليزاتورلارىن ورناتۋ. سوندىقتان بۇل جۇمىستاردى توتەنشە جاعداي دەپارتامەنتى جەرگىلىكتى اتقارۋشى ورگاندارمەن بىرلەسىپ, 2019 جىلدان بەرى جۇرگىزىپ كەلەدى, ناتيجەسىندە 2019 جىلى – 660, 2020 جىلى – 1 749, 2021 جىلى 2 917 قۇرىلعى قويىلعان.
– تۇرعىندار گازدى پايدالانۋ كەزىندە قاۋىپسىزدىكتى ساقتاۋعا اسا ءمان بەرۋى قاجەت. سونىمەن قاتار ارنايى قۇرىلعىلاردى تەحنيكالىق قىزمەت كورسەتۋ مەكەمەلەرىنەن گازدى پايدالانۋ جونىندە شارتتارى بولۋى كەرەك. تۇرعىنداردى سالعىرتتىق تانىتپاي, ارقاشان ۇيىندەگى گاز جابدىقتارىن تەكسەرىپ وتىرۋعا شاقىرامىز. «قازترانسگازايماق» مەكەمەسى دە رەيد جۇرگىزىپ تۇرادى, – دەيدى ماڭعىستاۋ وبلىستىق ەنەرگەتيكا جانە تۇرعىن-ءۇي كوممۋنالدىق شارۋاشىلىعى باسقارماسى باسشىسىنىڭ ورىنباسارى نۇرلان ورىنباساروۆ.
گاز تالداعىش حالىقتىڭ الەۋمەتتىك وسال توپتارىنىڭ تۇرعىن ۇيلەرىنەن باسقا, ءورتتىڭ تۋىنداۋىنا بارىنشا بەيىم تۇرعىن ۇيلەرگە دە ورناتىلادى.
«ساقتىقتا قورلىق جوق» دەيدى حالىق دانالىعى. كۇن سالقىنداپ, ۇيلەردى, نىسانداردى جىلىتۋ ماۋسىمى باستالعان سوڭ-اق قاۋىپسىزدىك, قاۋىپتىڭ الدىن الۋ جۇمىستارى دا قاۋىرت سيپاتقا يە بولادى.
– ماڭعىستاۋ وبلىسى اۋماعىندا بيىل جىلىتۋ ماۋسىمى باستالعالى تۇرعىن ءۇي سەكتورىندا 12 ءورت وقيعاسى تىركەلدى. ءورتتىڭ سالدارىنان قازا تاپقاندار جانە جاراقات العاندار تىركەلگەن جوق. تۇرعىن ءۇي سەكتورىنداعى ءورتتىڭ نەگىزگى سەبەپتەرى – گازبەن جابدىقتاۋ جۇيەسىن پايدالانۋ تالاپتارىنىڭ بۇزىلۋى. جىل سايىن بارلىق ءورتتىڭ شامامەن 50%-ى تۇرعىن ءۇي سەكتورىندا تىركەلەدى. دەپارتامەنتپەن تۇرعىن ءۇي سەكتورىندا پروفيلاكتيكالىق جۇمىس جۇرگىزۋدىڭ باستى ماقساتى – قارتتار, مۇگەدەكتەر سىندى الەۋمەتتىك وسال توپتاردىڭ, كوپبالالى وتباسىلاردىڭ تۇرعىن ۇيلەرىندە ءورتتىڭ الدىن الۋ جۇمىستارىن جۇرگىزۋ جونىندەگى شارالار كەشەنىن ىسكە اسىرۋ, بارلىق مۇددەلى قىزمەتتەر مەن ۇكىمەتتىك ەمەس سەكتوردى تارتۋ ارقىلى جۇيەلى ءتاسىل پايدالانۋ, – دەدى ماڭعىستاۋ وبلىستىق تجد باستىعى مۇرات مۇحانوۆ.
ونىڭ ايتۋىنشا, ۇگىت-ناسيحات جۇمىستارى قورىتىندىسىندا 2 447 ءۇي ەسەپكە الىنىپ, 8 234 ازاماتقا نۇسقاما بەرىلگەن. ايماقتا جىل باسىنان بەرى ۋلى گازبەن ۋلانۋ فاكتىلەرى بار. 2 ادام قايتىس بولىپ, 7 ادام زارداپ شەككەن. «قازترانسگازايماق» اق ماڭعىستاۋ وبلىستىق وندىرىستىك فيليالىنىڭ ديرەكتورى ەركىن جۇماعاليەۆتىڭ ايتۋىنشا, ەكى جاعدايدا دا قاۋىپسىزدىك تالاپتارى ساقتالماعان.
– تەكسەرۋ بارىسىندا گاز ماماندارىمەن كەلىسىم جاساماي, ءوز بەتتەرىمەن قولدان جاسالعان گاز قۇرىلعىلاردى ورناتقان. دۇرىس ورىنعا قويماعان نەمەسە قاتەلىك جىبەرگەندىكتىڭ سالدارىنان كەلەڭسىز وقيعا ورىن الدى. گاز قوندىراردا سەرتيفيكاتتالعان قۇجاتتارى بار كاسىبي ماماندارعا جۇگىنۋ كەرەك, – دەدى ە.جۇماعاليەۆ.
جىلۋ مەن قاۋىپسىزدىك قاتار جۇرگىزىلەتىن قاجەتتىلىك. تۇرعىنداردىڭ ماڭىزدى ىستە ماماندار كەڭەسى مەن كومەگىنە جۇگىنگەنى ءجون بولماق.
ماڭعىستاۋ وبلىسى