جامبىل وبلىسىنىڭ اگروونەركاسىپ كەشەنىندە جاڭارتىلاتىن ەنەرگيا سالاسى بەلسەندى دامىپ كەلەدى. ءبىر عانا تالاس اۋدانىندا بىردەن ءۇش جەل ەلەكتر ستانتسياسى سالىنۋدا, دەپ حابارلايدى Egemen.kz.
تالاس اۋدانىنىڭ اكىمى نۇربول جۇنىسبەكوۆتىڭ ايتۋىنشا, بيىل وڭىردە «جاسىل ەكونوميكا» اياسىندا جالپى قۇنى 5,4 ميلليارد تەڭگەنى قۇرايتىن ءۇش جوبا جۇزەگە اسىرىلماق.
«قىزىلاۋىت اۋىلدىق وكرۋگىندە بىردەن ءۇش جەل ەلەكتر ستانساسىن سالۋ ءۇشىن جەر تەلىمدەرى ءبولىندى – ارقايسىسىنىڭ قۋاتى 4,5 مۆت, جوبالىق قۇنى 1,8 ملرد تەڭگە. بارلىق ءۇش قۇرىلىس الاڭى بۇرىن سالىنعان توعىز مەگاۆاتتىق ەكى جەل ەلەكتر ستانتسياسىنىڭ جانىندا ورنالاسقان. بيىل 13,5 مەگاۆاتت ءۇش ستانتسيا سالىپ جاتىرمىز», دەدى سپيكەر.
قازىرگى ۋاقىتتا قوندىرعىلاردان وندىرىلەتىن ەلەكتر ەنەرگياسىن جيناۋ ءۇشىن ۇلكەن ەلەكتر ستانتسياسى سالىنۋدا. جەل ەلەكتر ستانتسيالارىنا ارنالعان جابدىقتار دانيادان جەتكىزىلدى. جاڭارتىلاتىن ەنەرگيا نىساندارى 2022 جىلدىڭ سوڭىنا دەيىنيپايدالانۋعا بەرىلەدى. الداعى ۋاقىتتا قوندىرعىلار سانىن كوبەيتىپ, قۋاتتىلىعىن 30 مەگاۆاتقا جەتكىزۋ جوسپارلانۋدا.
«جاڭارتىلاتىن ەنەرگيا كوزدەرى بويىنشا بۇل جوبالار اۋداننىڭ الەۋمەتتىك جانە ەكونوميكالىق الەۋەتىن ايتارلىقتاي ارتتىراد. جەرگىلىكتى تۇرعىندار ءۇشىن جاڭا جۇمىس ورىندارى اشىلادى», دەدى تالاس اۋدانىنىڭ اكىمى نۇربول جۇنىسبەكوۆ.
جامبىل وبلىسى كۇننىڭ, جەلدىڭ جانە سۋدىڭ الەۋەتىن پايدالانۋ جونىنەن رەسپۋبليكادا تۇراقتى جەتەكشى ورىندى يەلەنىپ كەلەدى. 2009 جىلى قازاقستاندا «جاڭارتىلاتىن ەنەرگيا كوزدەرىن قولداۋ تۋرالى» زاڭنىڭ قابىلدانۋىمەن قۋاتتىلىعى 7-دەن 300 مۆت-قا دەيىنگى سۋ, جەل جانە كۇن ەلەكتر ستانتسيالارىن سالۋ بويىنشا وننان استام ينۆەستيتسيالىق جوبالار جۇزەگە اسىرىلدى.