كولىك گاراجىنان «ەكىباستۇز جىلۋ-ەنەرگو» جشس ۋچاسكە باسشىسىنىڭ ءمايىتى تابىلدى.
بۇل فاكتى سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە تىركەلىپ, ەكىباستۇز قالاسىنىڭ پوليتسيا باسقارماسىندا تەرگەۋ امالدارى جۇرگىزىلىپ جاتىر. بولعان وقيعانىڭ ءمان-جايى الدىن الا انىقتالدى.
– 33 جاستاعى ەر ادامنىڭ مۇردەسى ەكىباستۇز قالاسىنداعى اۆتوگاراجداردىڭ بىرىندە, قوزعالتقىشى جۇمىس ىستەپ تۇرعان جەكە اۆتوكولىكتەن تابىلدى. الدىن الا مالىمەتتەر بويىنشا, ءولىم جاعدايى وتباسىلىق جانجالدىڭ سالدارىنان بولعان جانە مارقۇمنىڭ قىزمەتىمەن بايلانىستى ەمەس. بىرقاتار ساراپتاما تاعايىندالدى, ولاردىڭ ناتيجەلەرى بويىنشا پروتسەسسۋالدىق شەشىم قابىلدانادى, – دەدى پاۆلودار وبلىستىق پوليتسيا دەپارتامەنتى باستىعىنىڭ ورىنباسارى راشاد وتەۋوۆ.
الدىن الا بولجام بويىنشا, ەر ازامات ايەلىمەن بولعان جانجالدان سوڭ گاراجعا كەتىپ, كولىگىن وتالدىرعان. كەيىن ول ۇيىقتاپ كەتىپ, گازدان ۋلانىپ قالعان بولۋى مۇمكىن.
ەكىباستۇز جىلۋ-ەنەرگو ورتالىعى مارقۇمنىڭ بۇعان دەيىن شىن مانىندە ستانسادا ۋچاسكە باسشىسى قىزمەتىندە جۇمىس ىستەپ كەلگەنىن راستاپ وتىر.
پاۆلودار وبلىسى,
ەكىباستۇز قالاسى