تۇركىستان قالاسىندا گاز قۇبىرىنان اقاۋ شىعىپ, 200-گە جۋىق ابونەنت جىلۋسىز قالدى, دەپ حابارلايدى Egemen.kz قازاقپاراتقا سىلتەمە جاساپ.
تۇركىستان قالاسىنداعى شاۋعار سەكتورى «رەمزاۆود» مولتەك اۋدانى ايماعىنداعى 7 كوشەدە گازدىڭ قىسىمى تومەندەپ كەتكەن. سونىڭ سالدارى – قىس مەزگىلىندە ەكى جۇزگە جۋىق ءۇي جىلۋسىز قالىپ وتىر.
مامانداردىڭ ايتۋىنشا, ديامەترى 110 مم گاز قۇبىرىندا كەپتەلىس پايدا بولعان. بۇل ماسەلەنى شەشۋ ماقساتىندا مەردىگەر مەكەمە مەن اكىمدىك اتالعان مولتەك اۋدانداعى گاز قۇبىرىن ورتا قىسىمدى ەكىنشى گاز قۇبىرىنا قوسىپ, بىرىكتىرۋ تۋرالى شەشىم قابىلدادى. قازىرگى تاڭدا, قاجەتتى جابدىقتار الىنىپ, ءتيىستى جۇمىستار جۇرگىزىلىپ جاتىر.
«جالپى, قازىرگى تاڭدا تۇركىستان قالاسىنا ساعاتىنا 80 000 تەكشە مەتر تابيعي گاز كەلىپ تۇر. قىس مەزگىلىنە بايلانىستى جەكە ابونەنتتەر مەن مەكەمەلەردىڭ گاز تۇتىنۋ كولەمى كوبەيگەندىكتەن, قالادا گازدىڭ قىسىمى تومەندەگەنى بايقالدى. قالىپتاسقان جاعدايعا بايلانىستى «قازترانسگاز ايماق» اق تۇركىستان وبلىسى وندىرىستىك فيليالى جانە تۇركىستان قالاسى اكىمدىگى بىرلەسىپ, گاز قىسىمىن ۇلعايتۋ تۋرالى كەلىسىمگە كەلىپ, ناتيجەسىندە تۇرعىنداردىڭ تابيعي گازعا دەگەن سۇرانىسىن قاناعاتتاندىرۋ ماقساتىندا, اگتس-15-تەن گاز كولەمى ۇلعايتىلدى», دەلىنگەن قالالىق اكىمدىك تاراپىنان تاراتىلعان اقپاراتتا.