كەشە تۇستەن كەيىن پرەمەر-ءمينيستردىڭ ءبىرىنشى ورىنباسارى رومان سكليار ەكىباستۇزعا كەلدى. تەحنوگەندىك اپاتتىڭ سالدارىن جويۋ بويىنشا وبلىستىق شتابتىڭ جۇمىسىن زەردەلەپ, ۇيلەرى جىلۋدان اجىراعان تۇرعىنداردىڭ ماسەلەلەرىنە قۇلاق ءتۇردى.
ۇكىمەتتىڭ جۇمىس توبى بۇقارالىق اقپارات وكىلدەرى ءۇشىن ءباسپاسوز ءماسليحاتىن وتكىزىپ, اپاتتى جويۋ بويىنشا قولعا الىنعان جۇمىستار جايىندا باياندادى.
– ەكىباستۇز قالاسى بويىنشا قازىرگى ساتتە جىلۋسىز قالىپ وتىرعان 58 كوپقاباتتى ءۇي بار. بۇعان دەيىن № 5ا شاعىن اۋدانداعى جىلۋ ماگيسترالىندا سوڭعى جوندەۋ جۇمىستارى اياقتالدى. بۇگىنگە دەيىن جۇيەدەگى تەڭگەرىمسىزدىك سالدارىنان جىلۋ-ەنەرگو ورتالىعى وسى اۋماقتاعى ۇيلەرگە قوسىلا الماي كەلدى. قازىر جاعداي بىرتىندەپ وڭالىپ كەلەدى, №5 ب جانە № 6 شاعىن اۋداندارىنداعى ورتالىق جىلۋ جەلىلەرىنە جىلۋ جىبەرىلە باستادى. ەرتەڭ №5 ا اۋدانىنداعى بىرنەشە كۇن بويى جىلۋسىز وتىرعان 17 ۇيدەگى پاتەرلەردى ورتالىق جەلىگە جالعاۋ جوسپاردا تۇر. ءبىز جەرگىلىكتى قالاقۇراۋشى كاسىپورىندارمەن سويلەستىك, جىلۋسىز تۇرعان 58 ءۇيدىڭ ارقايسىسىنا قاجەتتى ماماندار بەكىتىلەدى. جىلۋدى, اۋىز سۋمەن قامتۋدى, كارىز جۇيەسىن باقىلاپ وتىرادى, – دەدى ر.سكليار.
ەنەرگەتيكا مينيسترلىگى اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ توراعاسى سۇڭعات ەسىمحانوۆ باستاعان ماماندار جىلۋ بەرۋ مەكەمەسىندەگى تەرگەۋ جۇمىستارىن اياقتاپ قالىپتى. تەرگەۋدىڭ الدىن الا قورىتىندىلارىنا سۇيەنسەك, اپات ستانسا قىزمەتكەرلەرىنىڭ قاتە ارەكەتتەرىنەن ورىن العان. قىزمەتكەرلەر جىلۋ قىسىمىن كەنەتتەن بىردەن كوتەرىپ, سالدارىنان ونسىز دا توزىپ تۇرعان جىلۋ قۇبىرلارى بىرىنەن سوڭ ءبىرى جارىلعان. ارتىنشا سۋدىڭ ىسىراپ دەڭگەيى ءوسىپ, ورتالىقتاعى قازاندىقتار توقتاعان. اپات ورىن العان 27 قاراشا كۇنى شاھار بويىنشا – 43, ال كەلەسى كۇنى 30 اقاۋ انىقتالعان. مۇنداي كەشەندى اپات ەكىباستۇزدا العاش رەت كەزدەسىپ وتىر.
«بۇل قورىتىندىلار تەكسەرۋ توبىنىڭ الدىن الا ۇيعارىمدارى ەكەنىن ايتقىم كەلەدى. نەگىزگى اپاتتىڭ جىلۋ توراپتارىندا بولعانىنا نازار اۋدارۋ كەرەك. قازاندىقتار اۆتوماتتى تۇردە سونگەن. ەكىباستۇز جىلۋ-ەنەرگو ورتالىعىنىڭ قازىرگى جاعدايى جامان ەمەس. ماقساتىمىز ەرتەڭنەن باستاپ بارلىق تۇرعىن ءۇيدى امان-ەسەن جىلۋعا قوسىپ, ۇيلەر ىشىندە شىققان اقاۋلاردى قالپىنا كەلتىرۋ. كىنالى تۇلعالاردى جاۋاپكەرشىلىككە شاقىرۋ, جازالاۋ شارالارىمەن قۇقىق قورعاۋ ورگاندارى اينالىسادى. ءبىزدىڭ شتابىمىزدىڭ بارلىق الەۋەتى قالا تۇرعىندارىنىڭ ماسەلەسىن شەشۋگە جۇمىلدىرىلادى. بۇگىن بىرنەشە ۇيدە بولىپ, جۇرتشىلىقتىڭ ماسەلەلەرىن تىڭدادىم. ءۇي ىشىندەگى تەمپەراتۋرا نەبارى 10 گرادۋس جىلىلىقتى كورسەتىپ تۇر. مۇنداي بولماۋى كەرەك», دەدى ر.سكليار.
ەنەرگەتيكا ۆيتسە-ءمينيسترى جاندوس نۇرماعامبەتوۆ تۇرعىنداردىڭ بارلىق شىعىنىن «ورتالىق-ازيا ەلەكترەنەرگەتيكالىق كورپوراتسياسى» اق وتەيتىنىن, قازىرگى ۋاقىتتا كەلىپ تۇسكەن وتىنىشتەر بويىنشا شىعىن كولەمى ەسەپتەلىپ جاتقانىن ەسكە سالدى. ال ەكىباستۇزداعى جەو-عا جاقىن ارادا تەحنيكالىق اۋديت جۇرگىزىلىپ, ۇزاق مەرزىمدى جاڭارتۋ باعدارلاماسى قابىلدانباق.
پاۆلودار وبلىسى,
ەكىباستۇز قالاسى