«سامۇرىق-قازىنا», «قازمۇنايگاز» جانە فرانتسيانىڭ Total Eren كومپانياسى قازاقستاننىڭ وڭتۇستىك-شىعىسىندا جەل پاركىن سالادى, دەپ حابارلايدى Egemen.kz پرەزيدەنتتىڭ ءباسپاسوز قىزمەتىنە سىلتەمە جاساپ.
قازاقستان رەسپۋبليكاسىنىڭ ەنەرگەتيكا مينيسترلىگى مەن فرانتسيانىڭ ەۋروپا جانە سىرتقى ىستەر مينيسترلىگى اراسىندا جامبىل وبلىسىندا قۋاتى 1 گۆت بولاتىن جەل ەلەكتر ستانتسياسىن سالۋ ماسەلەلەرى تۋرالى ۇكىمەتارالىق كەلىسىمگە قول قويىلدى.
قول قويۋ راسىمىنە مەملەكەت باسشىسى قاتىستى. جەل ەلەكتر ستانتسياسى 2026-2027 جىلدارى پايدالانۋعا بەرىلەدى, بۇل ءبىزدىڭ ەلىمىزدەگى جەك نىساندارىنىڭ جيىنتىق ەنەرگيا ءوندىرىسىن شامامەن 50 پايىزعا ارتتىرادى.
جوبانىڭ بولجامدى قۇنى – 1,9 ميلليارد دوللار. قازاقستاندا العاش رەت جەل ەلەكتر ستانتسياسى ەلەكتر قۋاتىن جيناقتاۋ جۇيەسىمەن تولىقتىرىلادى. بۇل جوبانىڭ بىرەگەيلىگىن كورسەتەدى. اتالعان باستاما جاڭارتىلاتىن ەنەرگيا ءوندىرىسىنىڭ تابيعي قۇبىلمالىلىعىن رەتتەۋگە, ارتىق ەلەكتر ەنەرگياسىن جيناقتاۋعا جانە ەنەرگيا جەلىسىنىڭ تۇراقتىلىعىن قامتاماسىز ەتۋگە مۇمكىندىك بەرەدى.