ۇزاق جىلدار بويى جولىندا قان دا, جاس تا, تەر دە توگىلگەن تاۋەلسىزدىك ءبىزدىڭ حالقىمىز ءۇشىن اسا قىمبات. ال سول ەگەمەندىگىمىز بەن ەلدىگىمىزدىڭ باياندى بولۋى ىشكى تۇراقتىلىقتىڭ ساقتالۋىنا تىكەلەي بايلانىستى. قوعامدىق ءتارتىپ پەن قاۋىپسىزدىكتى قامتاماسىز ەتەتىن ۇلتتىق ۇلان ساپىنا جىل سايىن ون مىڭداعان بوزبالا كەلىپ, وتان الدىنداعى ازاماتتىق بورىشىن وتەيدى.
استانا ىرگەسىندەگى 5573 اسكەري ءبولىمىنىڭ وزىنەن جىل سايىن ەلىمىزدىڭ تۇكپىر-تۇكپىرىنەن كەلگەن ءبىر جارىم مىڭداي جاس سارباز ەلىنە قورعان بولار رۋحى مىعىم ازامات بوپ تۇلەپ شىعادى. بىلتىر وسى ۋاقىتتا جەدەل قۇرامانىڭ تابالدىرىعىن اتتاعان كۇزگى شاقىرىلىم وزدەرىنە جۇكتەلگەن مىندەتتەردى ابىرويمەن اياقتاپ, تاياۋدا تۋعان ولكەلەرىنە اتتاندى.
جاقىندا ۇلتتىق ۇلاننىڭ استانالىق اسكەري قالاشىعىندا 2021 جىلعى شاقىرىلىم ساربازدارىن قۇرمەتتەۋ كەشى ءوتتى. سالتاناتتى ءىس-شارا ادەتتەگىدەي, ساحنا تورىنە ەلىمىزدىڭ مەملەكەتتىك تۋىن كىرگىزۋدەن باستالدى. جاندى داۋىستا ءانۇران شىرقالعان سوڭ, ءبولىم كومانديرى پولكوۆنيك ايان ەسجانوۆ اسكەرمەن قوشتاسقالى وتىرعان بۋىنعا ءسوز ارنادى. ايان ابدۋعاني ۇلى ساربازدارعا ادال قىزمەتتەرى ءۇشىن كومانديرلىك العىسىن ءبىلدىرىپ, رۋحتارىن كوتەردى. اعالىق وسيەتىن ايتىپ, جاۋىنگەرلىك قىزمەتتە ەرەكشەلەنگەن ساربازدارعا ماراپات تاپسىردى.
ءاربىر ساربازدىڭ اسكەري ءىستى مەڭگەرۋىندە, ناعىز وتان قورعاۋشى بوپ قالىپتاسۋىنا ىقپال ەتكەن ۇلكەن-كىشى كومانديرلەرگە, جىل بويى قولداۋ تانىتقان اتا-انا, جاقىندارىنا دا العىس ءبىلدىردى. ءىس-شارا بارىسىندا ساربازدارعا ءوز باتالوندارى تۋرالى ادەمى بەينەروليكتەر, قىزمەت جولدارى مەن دەمالىس ۋاقىتىنداعى قۋانىشتى ساتتەرى تاسپالانعان ەستەلىك سيۋجەتتەر كورسەتىلدى.
سونداي-اق كەش يەلەرىنە ارناپ ۇلتتىق ۇلاننىڭ ءان-بي ءانسامبلىنىڭ شىعارماشىلىق ۇجىمى كونتسەرتتىك باعدارلاما ۇسىندى. كەش سوڭىنا كەيىنگى تولقىن اتىنان قاتارداعى ولجاس شيراجەدەنوۆ جاۋىنگەرلىك جول كورسەتكەن اعا بۋىنعا ءان ارنادى. ءبولىم باسشىلىعى مەن قارۋلاستارى تاراپىنان كورسەتىلگەن قۇرمەت ساربازدارعا ەرەكشە كوڭىل كۇي, شاتتىق سىيلادى. مەرەكەلىك كەشتى اسكەري ءبولىم كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پودپولكوۆنيك ايدار جۇسىپبەكوۆ قورىتىندىلاپ, جاۋىنگەرلەردىڭ ۇيلەرىنە امان-ساۋ ورالۋىن تىلەدى. ءىس-شارا اياقتالعان سوڭ ەستەلىك ءۇشىن جاۋىنگەرلىك تۋ الدىندا سۋرەتكە ءتۇسىپ, قوس بۋىن ءبىر-بىرىمەن قيماستىقپەن قوشتاستى.
نازگۇل بايشينا
استانا