بىرلىكتى تالاپ ەتەتىن تۇجىرىمداما

شىنى كەرەك, مۇنداي باعدارلاما­لار بۇرىن دا قابىلداندى, بىراق ءبارى قۇمعا سىڭگەن سۋداي بولىپ كەتتى. ەگەر ۇكىمەت قۇرامىندا قۇرىلىمدىق وزگەرىستەر بولماسا, بۇل جولعى باستاما دا الدىڭ­عىلاردىڭ كەبىن كيىپ كەتە مە دەگەن كۇدىك بار. سەبەبى ۇكىمەت قۇرامىندا اۋىلدىڭ پروبلەماسىن تۇبىرىنەن تانيتىن, تۇسىنەتىن داعدارىس مەنەدجەرلەرى جوق. ەكىنشىدەن, كۇنى بۇگىنگە دەيىن اۋىلدى قولداۋعا باعىتتالعان باع­دارلامالاردىڭ ءبىرازى اۋىل شارۋا­شىلىعى مينيسترلىگىنە جۇكتەلىپ كەلدى. ەلىمىزدە ءبىر مينيسترلىكتىڭ قۇزىرەتىمەن ەشتەڭە شەشىلمەيتىنى بارشاعا بەلگىلى. سوندىقتان دا اۋىلدى دامىتۋ مينيسترلىگىن قۇرىپ, اۋىل شارۋاشىلىعى مينيسترلىگىنىڭ ءبىراز مىندەتىن سوعان جۇكتەۋ كەرەك شىعار.

وسى سالانىڭ مامانى رەتىندە باعدارلامانىڭ ورىندالۋىن ءبىراز مينيسترلىكتىڭ موينىنا جۇكتەۋ كەرەك دەپ سانايمىن. ولار – دەنساۋ­لىق ساقتاۋ, ۇلتتىق ەكونوميكا, ەڭ­بەك جانە حالىقتى الەۋمەتتىك قور­عاۋ مينيسترلىكتەرى. جەكەلەگەن مي­نيسترلىكتەر ەمەس, جالپى ۇكىمەت قۇرا­مىندا جۇرگەن ازاماتتار ءوز مىندەتىنىڭ تىم بولماسا 40 پايىزىن تۇسىنسە, اۋىل­دى توزدىرىپ المايتىن ەدىك.

ەۋروپا, باتىس ەلدەرى اۋىلدى, ۇلكەن قالالاردىڭ اينالاسىنداعى ەلدى مەكەندەردى ساقتاۋ سول مەملەكەتتىڭ تيتۋلدى ۇلتىنىڭ گەنوفوندىن ساقتاۋ دەپ سانايدى. گەرمانياداعى ەلدى مەكەندەردە تۇراتىن تۇرعىندار كەيدە قالىپتى مولشەردەن كوپ جينالىپ قالعان ءسۇتتى توگىپ, ساقتاۋعا جارامايتىن جەمىس-جيدەكتى مال ازىعىنا اينالدىرىپ جاتادى. بىراق مەملەكەت سولاي جاسادى دەپ اۋىلدان باس تارتىپ جاتقان ەشكىم جوق, كەرىسىنشە اۋىلعا, فەرمەرلەرگە ارناعان كومەگى جىل سايىن ەسەلەپ ءوسىپ كەلەدى.

قازاقتىڭ 40 پايىزى اۋىلدا تۇرادى. ءبىز وسى مەجەنى ساقتاپ قالساق, قازاقتىڭ گەنوفوندىنا تونگەن قاۋىپ جوق. ەندى اۋىلدىڭ ينفراقۇرىلىمىن كوتەرسەك, مالمەن, ەگىن شارۋاشىلىعىمەن اينالىسۋىنا جاعداي جاساساق, قالادا جۇرگەن قازاق بالالارى ەلگە قايتادى, اۋىلدى كوتەرۋگە اتسالىسادى.

قازاقستاننىڭ قالالارى اياعىنا تۇردى. ەندىگى جەردە قالانى وبەكتەي بەرۋدىڭ قاجەتى جوق. ەندىگى جەردە قالا ايماعىنىڭ ەتەك-جەڭىن ۇزارتا بەرمەي, قالا ماڭىنداعى, وبلىستار, اۋداندار اينالاسىنداعى اۋىلداردى قولدايىق. سول كەزدە عانا باعدارلامالاردىڭ ناتيجەسىن ەل سەزىنە الادى.

اتامۇرات شامەنوۆ,

ەكونوميكا عىلىمدارىنىڭ دوكتورى

الماتى