زاماناۋي ۇلگىدەگى مەكتەپتەر

جاڭا مەكتەپتەردىڭ اشىلۋ سالتاناتىندا ءبىلىم باسقارماسىنىڭ باسشىسى ءلاززات جىلقىباەۆا قالالىق اكىمدىك تاراپىنان مەكتەپ سالۋ ءىسىنىڭ جالعاسىپ جاتقانىن جەتكىزدى.

«ىشكى-سىرتقى ميگراتسيا, دەموگرا­فيالىق احۋالدى ەسكەرەتىن بولساق, قالادا وقۋشى سانى جىل سايىن 13-15 مىڭ بالاعا كوبەيىپ كەلەدى. بۇگىندە وڭتۇستىك استانادا 210 مەملەكەتتىك مەكتەپ جۇمىس ىستەيتىن بولسا, وقۋشى ورنىنىڭ تاپشىلىعى 29 مىڭنان اسادى. وسى ورايدا كەلەسى وقۋ جىلىنان باستاپ «جايلى مەكتەپ» جوباسى جالعاسىن تاۋىپ, 22 مەكتەپ سالىنادى, 37 مىڭنان اسا وقۋشى ورنى اشىلادى. بۇعان قوسا 1000 مەكتەپ جوباسىنا وراي 2025 جىلعا دەيىن 36 مەكتەپ قۇرىلىسى جۇرگىزىلەدى», دەدى ل.جىلقىباەۆا.

ءبىلىم باسقارماسى باسشىسىنىڭ ايتۋىنشا, قالاداعى ءۇش اۋىسىمدى مەكتەپتەر ماسەلەسى تولىعىمەن شەشىلگەن. جەر تە­لىم­دەرىنىڭ تاپشىلىعىنا بايلانىس­تى ور­تالىق اۋدانداردا جاڭا مەكتەپ سالۋ­مەن قاتار جاپسارلاس قۇرىلىستار سالۋ جۇ­مىستارى جۇرگىزىلىپ جاتىر. وسى وراي­دا بيىل 5 عيمارات قولدانىسقا بەرىلسە, جىل­دىڭ اياعىنا دەيىن تورتەۋى ىسكە قو­سى­لادى. سونىمەن قاتار بالالاردى مەكتەپكە تاسىمالداۋ ماسەلەسى دە بىرتە-بىرتە شە­شىلىپ كەلەدى. اتا-انالاردىڭ سۇرا­نى­سىنا بايلانىستى 70-تەن اسا مەكتەپ­­تەن ءوتىنىش تۇسكەن. قازىرگى كەزدە «تو­­مي­ريس» شاعىن اۋدانىنداعى №205 مەك­­تەپ­تە قاناتقاقتى جوبا ىسكە اسۋدا. قار­­جى­­لان­دىرۋ جاعى شەشىلەتىن بولسا, قوعام­­دىق كولىك جۇرمەيتىن اۋدانداردا كەلەر جىلدىڭ قاڭتارىنان باستاپ وقۋشى­لاردى مەكتەپكە تاسىمالداۋ قولعا الىنادى.

جاڭادان اشىلعان ءبىلىم وشاقتارىندا ءبىر اۋىسىمدا 3 مىڭعا جۋىق وقۋشىنىڭ ءبىلىم الۋى قاراستىرىلعان. مۇندا ەرەكشە قاجەتتىلىكتەرى بار بالالارعا دا قولايلى جاعدايلار بار. بۇگىندە قالا بويىنشا 2 مىڭنان اسا ەرەكشە قاجەتتىلىكتەرى بار بالالار بولسا, ولار 8 ارنايى ينتەرناتتارمەن قاتار وزگە دە ءبىلىم وشاقتارىندا ءبىلىم الۋدا. الماتى قالاسىنىڭ 2025 جىلعا دەيىنگى دامۋ باعدارالاماسىنا سايكەس ينكليۋزيۆتى ورتادا ساباق بەرەتىن مىڭنان اسا مۇعالىمدى جىل سايىن وقىتىپ وتىرۋ كوزدەلىپ وتىر.

قازىرگى ۋاقىتتا №208 مەكتەپ-گيمنا­زيا­سىنداعى 37 سىنىپتا 960 وقۋشى قازاق تىلىندە ءبىلىم الادى. زاماناۋي وقۋ عيما­راتىندا تولىقتاي جابدىقتالعان 8 بلوك, 72 وقۋ كابينەتى بار. باستاۋىش جانە 5-9, 10-11-سىنىپ وقۋشىلارى ارنايى بلوك­تاردا وقيدى. مەكتەپكە گۇلبادا ادە­نوۆا باسشىلىق ەتەدى. «بوتاكوز-2» شاعىن اۋدانىنداعى №209 مەكتەپتە 2 851 وقۋ­شى ءبىلىم الۋدا. بۇل مەكتەپتىڭ ديرەكتورى – نۇرلان اداموۆ. سىنىپ سانى – 109. وقۋشىلار قازاق جانە ورىس تىلدەرىندە ءبىلىم الادى. مەكتەپتە پانورامالىق اينەكتەلگەن 77 وقۋ كابينەتى ينتەراكتيۆتى پانەلمەن, smart تاقتا جانە زاماناۋي موديفيكاتسياداعى جيھازدارمەن جابدىقتالعان. ەرگونوميكالىق ينتەرەرمەن ەرەكشەلەنەتىن مەكتەپ دالىزدەرى مەن كەڭسەلەرى كەڭ.

زاماناۋي مەكتەپتەردە مەدياتەكا, كىتاپحانا, سىرتقى سپورت الاڭى مەن ويىن الاڭدارى وقۋشىلارعا قولايلى ەتىپ جاسالعان. بيولوگيا, حيميا, فيزيكا كابينەتتەرى زەرتحانالار, پراكتيكالىق جۇمىستارعا قاجەتتى كورنەكى قۇرالدارمەن قامتاماسىز ەتىلسە, ارنايى ستانوكتارمەن جابدىقتالعان اعاش جانە مەتالل شەبەرحانالارىندا, ساز بەن قىشتى وڭدەۋگە ارنالعان قۇرالداردا وقۋشىلار زور قىزىعۋشىلىقپەن جۇمىس ىستەيتىنى ءسوزسىز. اسپازدىق كابينەتتەر, ماتا وڭدەۋ جانە تەحنولوگيا شەبەرحانالارى قىز بالالار ءۇشىن قولايلى. سپورت زالدار soundex دىبىس وتكىزبەيتىن پانەلدەرىمەن قاپتالىپ, sonaspray بۇرىككىش قۇرىلعىلارىمەن قامتاماسىز ەتىلگەن. زاماناۋي اسحانا دا ەرەكشە ارلەنگەن. Face ID زاما­ناۋي جۇيەسىمەن جابدىقتالعان مەكتەپتە بالالاردىڭ قاۋىپسىزدىگىنە ەرەكشە كوڭىل ءبولىنىپ وتىر. اتا-انالارعا دا قولايلى جاعدايلار قاراستىرىلىپ, بالالاردىڭ مەكتەپكە كىرىپ-شىققانى تۋرالى حابارلاما الا الادى.

الماتى