فينليانديانىڭ سەينيايوكي قالاسىندا كونكيمەن جۇگىرۋ سپورتىنان جاستار اراسىنداعى الەم كۋبوگىنىڭ ءبىرىنشى كەزەڭى مارەسىنە جەتتى. الەمدىك دودادا باق سىناعان قازاقستان قۇراماسىنىڭ سپورتشىلارى 2 التىن, 2 كۇمىس پەن 1 قولا جۇلدە جەڭىپ الدى.
سپورتتى دامىتۋ ديرەكتسياسىنىڭ ءباسپاسوز قىزمەتى ءمالىم ەتكەندەي, الەم كۋبوگىنىڭ العاشقى كۇنىندە 1000 مەتر قاشىقتىقتا جارىسۋدا ەل قورجىنىنا التىن جۇلدە سالعان الينا داۋرانوۆا حالىقارالىق ءتۋرنيردىڭ سوڭعى كۇنىندە دە ءانۇرانىمىزدى شىرقاتتى. ءبىر شاقىرىمعا جارىسۋدا ول 1:22.10 سەكۋند ناتيجەمەن التىننان القا تاققان بولسا, 500 مەترگە جۇگىرۋدە دە الدىنا جان سالمادى. الينا بۇل قاشىقتىقتى 40,27 سەكۋند ىشىندە باعىندىردى. ودان كەيىنگى ساتىعا نيدەرلاندتىق پەن حەرسمان مەن يتاليالىق سەرەنا پەرگەر جايعاستى.
ال جاستار مەن ەرەسەكتەر اراسىنداعى وتپەلى نەو-ەرەسەكتەر دەڭگەيىندەگى 500 مەتردە التاي جاردەمبەك ۇلى كۇمىس جۇلدەگەر اتاندى. التاي ون كۇن بۇرىن قازاقستان كۋبوگى كەزەڭىندە 1500 مەتردە جەڭىسكە جەتكەن بولاتىن. وسى باعدارلاماداعى تاعى ءبىر وتانداسىمىز ماقسات مۇقاەۆ ۇزدىك بەستىكتىڭ قاتارىنان تابىلدى.
ال جاستار اراسىنداعى 1500 مەترگە جارىسۋدا باق سىناعان نۇرالى اقجولعا ءسال ساتتىلىك جەتىسپەدى. قازاقستاندىق سپورتشى قولا جۇلدە ءۇشىن تالاستا نيدەرلاند وكىلىنەن جارتى سەكۋند قالىپ قويىپ, 4-ورىننان كورىندى. بۇل سايىستا قازاقستاننىڭ تاعى ءبىر وكىلى رومان بينوزاروۆ 7-ساتىعا تۇراقتادى. سونداي-اق 3000 مەترگە جارىسۋدا نۇرالى اقجول قولا جۇلدەگەر اتاندى. ال مىڭ مەتردە ەرلەر اراسىندا نيكيتا ۆاجەنين كۇمىس جۇلدەنى موينىنا ءىلدى. ول تەك جاپونيالىق يسسا گۋندجيدەن 2 سەكۋندتاي قالىپ قويدى.
ايتا كەتەيىك, جاستار اراسىنداعى الەم كۋبوگىنىڭ ەكىنشى كەزەڭى 3-4 جەلتوقساندا وسى سەينيايوكي قالاسىندا وتەدى. سپورتشىلار ءۇشىنشى كەزەڭدە گەرمانيانىڭ ينتسەلل قالاسىندا سىنعا تۇسەدى. بۇل كەزەڭ كەلەر جىلدىڭ 4-5 اقپانى كۇندەرىنە جوسپارلانعان. ءارى قاراي 10-12 اقپاندا ءدال سول ينتسەلل قالاسىندا جاستار اراسىنداعى الەم چەمپيوناتى وتەدى.