سەنبىدەن جەكسەنبىگە قاراعان ءتۇنى ەكىباستۇز قالاسىنىڭ جىلۋ توراپتارىندا ۇلكەن اپات بولدى. شاھار ىشىندەگى جىلۋ جەلىلەرىندەگى زاقىمدانۋدان ىستىق سۋ تولاسسىز ىسىراپ بولىپ, «ەكىباستۇزجىلۋەنەرگو» جشس-ىنداعى 4 بىردەي قازاندىق توقتاپ قالعان, دەپ حابارلايدى Egemen.kz.
«پاۆلودارەنەرگو» اق حابارلاعانداي, اپات 27 قاراشا كۇنى, تۇنگى ساعات 01.20 شاماسىندا ورىن العان. اۋەلى سۋدىڭ وتە كوپ مولشەردە ىسىراپ بولۋىنان №11 قازاندىق اگرەگاتى ىستەن شىعادى, ودان 10 مينۋت وتكەندە №13, 14, 15 قازاندىقتارى توقتايدى. سايكەسىنشە شاھارداعى ورتالىقتاندىرىلعان جىلۋعا قوسىلعان بارلىق نىساندار, تۇرعىن ۇيلەر, الەۋمەتتىك مەكەمەلەر, كاسىپورىنداردا جىلۋ بەرۋ توقتاپ, قالا تۇندە قاتىپ قالدى.
كومىرلى شاھاردا 150 مىڭداي حالىق تۇرادى. اپاتتىڭ ادام ايتقىسىز ەكەنىن ەسكەرگەن پاۆلودار وبلىسىنىڭ اكىمى ابىلقايىر سقاقوۆ جەكسەنبى كۇنى تاڭەرتەڭگىلىك ەكىباستۇزعا جەدەل جەتىپ, جاعدايدى كوزىمەن كوردى. اكىم الەۋمەتتىك جەلىدەگى پاراقشاسىندا جاعدايدى بايانداپ, قالا تۇرعىندارىن سابىرلىققا شاقىردى.
- جىلۋ-ەلەكتر ورتالىعىندا قازىر اپات بويىنشا شتاب قۇرىلىپ, ءوزىمنىڭ ءبىرىنشى ورىنباسارىم ولەگ كرۋك, ەكىباستۇز قالاسىنىڭ اكىمى ايان بەيسەكين, «پاۆلودارەنەرگو» اق جانە ەكىباستۇز جەو باسشىلارى جاعدايدى باقىلاۋدا ۇستاۋدا. ساعات 11.00-دەگى جاعداي بويىنشا ستانتسيادا سۋ تۇتىنۋ ءۇش ەسەگە وسكەن. سۋدىڭ اعىپ كەتۋىنە تەست جۇرگىزىلدى. ستانتسيادا سۋ ازايىپ جاتقان جوق. بۇل جىلۋ جەلىلەرىندە اپات ورىن العانىن ايعاقتاپ وتىر. بىرنەشە دروندى ۇشىرىپ, جىلۋ توراپتارىنداعى ون زاقىمدانۋ ورنىن انىقتادىق. جىلۋ جەلىلەرىنىڭ ءبىر تۇسىندا ۇلكەن اپات ورىن العان بولۋى كەرەك, – دەدى ابىلقايىر سقاقوۆ بەينەۇندەۋىندە.
بۇعان قوسا اكىم جوندەۋ بريگادالارى اقاۋدى جويىپ جاتقانىن جەتكىزدى.
سونداي-اق ولەگ كرۋك پەن قالا اكىمى ايان بەيسەكين پاتەر يەلەرى كووپەراتيۆتەرىنىڭ جەتەكشىلەرىمەن شۇعىل جيىن وتكىزدى.
- جىلۋ-ەنەرگو ورتالىعىندا سۋ كوپ كولەمدە اعىپ كەتىپ جاتىر. جىلۋ توراپتارىنداعى زاقىمدانۋلاردان كوپ كولەمدە سۋ جوعالعان. 3 ەنەرگەتيكالىق قازاندىق, 1 ىستىق سۋ جىلىتاتىن قازاندىق جۇمىس ىستەپ تۇر. ستانساداعى تەمپەراتۋرالىق پارامەترلەر 42/51 گرادۋستى كورسەتىپ تۇر. سۋ اينالىمى قامتاماسىز ەتىلدى. بارلىق قاجەتتى رەسۋرستار جۇمىلدىرىلىپ, كوممۋنالدىق قىزمەتتەر مەن قالا قۇراۋشى كاسىپورىنداردىڭ جۇمىسى ۇيىمداستىرىلدى. 15 جوندەۋ بريگاداسى قۇرىلىپ, جىلۋ قۇبىرلارىندا ورىن العان اپاتتارمەن شۇعىلدانۋدا. تاعى 4 بريگادا وزگە جەرلەردەگى ىقتيمال زاقىمدانۋلاردى ىزدەپ جاتىر, - دەپ حابارلادى ەكىباستۇز قالاسىنىڭ اكىمى ايان بەيسەكين.