بۇگىن سەناتتا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ «كۇزەتپەن ۇستاۋدىڭ بالامالى شارالارىن, ونىڭ ىشىندە ەلەكتروندىق باقىلاۋ قۇرالدارىن (بىلەزىكتەردى) دامىتۋ» تاقىرىبىنداعى وتىرىسى ءوتتى, دەپ حابارلايدى Egemen.kz.
شارا سوت جۇيەسىن ودان ءارى رەفورمالاۋ جونىندەگى ۇسىنىستاردى تالقىلاۋ جۇمىستارىنىڭ زاڭدى جالعاسى بولدى.
قاتىسۋشىلار بۇلتارتپاۋ شارالارىن قولدانۋ اياسىن كەڭەيتۋگە باعىتتالعان كەشەندى شارالاردى, كۇزەتتە ۇستاۋدىڭ بالاما ءتۇرى مەن كۇزەتتە ۇستاۋداعى بۇلتارتپاۋ شارالارىن قولدانۋدى شەكتەۋدى تالقىلادى.
«تالقىلاۋ كۇزەتتە ۇستاۋدىڭ بالاما شارالارىن, ونىڭ ىشىندە ەلەكتروندىق باقىلاۋ قۇرالدارىن دامىتۋ ءۇشىن قانداي شارالار قولدانۋ كەرەكتىگىن ودان ءارى تالقىلاۋ قاجەتتىگىن كورسەتتى. ەلەكتروندىق باقىلاۋ قۇرالدارىن قولدانۋدىڭ نەگىزگى پروبلەماسى – جەرگىلىكتى بيۋدجەتتەردە قولما-قول اقشانىڭ بولماۋى, تەرگەۋ بولىمشەلەرى ءۇشىن ەبق ساتىپ الۋ نەمەسە جالعا الۋ ماسەلەسى بولىپ تابىلادى. ءبىز كۇزەتتە ۇستاۋعا بالاما شارالارىنىڭ تىزبەسىن وزىق شەتەلدىك تاجىريبە نەگىزىندە كەڭەيتۋىمىز كەرەك», دەپ اتاپ ءوتتى سەناتور قاناتبەك سافينوۆ.
شاراعا جوعارعى سوت, باس پروكۋراتۋرا, ىشكى ىستەر مينيسترلىگى جانە باسقا دا مۇددەلى مەملەكەتتىك ورگانداردىڭ, سونداي-اق قوعامدىق ۇيىمداردىڭ, ادۆوكاتتار القاسىنىڭ وكىلدەرى, زاڭگەر عالىمدار دا قاتىستى.
سەناتورلار كەزدەسۋ بارىسىندا ايتىلعان بارلىق ۇسىنىستار مەن ەسكەرتۋلەر قىلمىستىق ءىس جۇرگىزۋ زاڭناماسىن رەفورمالاۋ جونىندەگى جۇمىس كەزىندە ەسكەرىلەتىنىن اتاپ ءوتتى.