ەلوردادا «حالىق قاھارمانى» جانە «قازاقستاننىڭ ەڭبەك ەرى» مەملەكەتتىك ەڭ جوعارى ماراپات يەلەرىنىڭ بىرلەستىگى «تáyelsiz qazaqstannyń halyq batyrlary» رەسپۋبليكالىق قوعامدىق ۇيىمىنىڭ I رەسپۋبليكالىق كونفەرەنتسياسى ءوتتى.
بىرلەستىك بيىل ماۋسىم ايىندا قۇرىلعان ەدى. پارلامەنت دەپۋتاتتارىنىڭ, مەملەكەتتىك مەكەمەلەر, ۇكىمەتتىك ەمەس ۇيىمدار وكىلدەرىنىڭ قاتىسۋىمەن وتكەن كونفەرەنتسيادا بىرلەستىكتىڭ تۇجىرىمداماسى بەكىتىلدى. سونداي-اق ەلىمىزدىڭ ايماقتارىندا فيليالدار اشۋ سياقتى ماسەلەلەر تالقىلاندى. بۇگىندە جوعارى دارەجەلى «حالىق قاھارمانى» اتاعىنىڭ 9, «قازاقستاننىڭ ەڭبەك ەرى» اتاعىنىڭ 35 يەگەرى وزدەرىنىڭ ونەگەسىن ۇلتتىق قۇندىلىقتاردى نىعايتۋعا جۇمساپ جۇرگەنى قۋانتادى.
كونفەرەنتسياعا حالىق قاھارمانى, گەنەرال-لەيتەنانت باقىتجان ەرتاەۆ توراعالىق ەتتى. «ەل استاناسىندا تۇڭعىش رەت باتىرلار جيىنى ءوتىپ جاتىر. ەل جاستارىنىڭ پاتريوتتىق سەزىمىن, مەملەكەتتىڭ بەرىكتىگىن نىعايتۋدا ۇيىمنىڭ ىقپالى زور», دەدى بىرلەستىك توراعاسى ب.ەرتاەۆ.
جيىنعا قاتىسقان مەملەكەت جانە قوعام قايراتكەرلەرى ورالباي ابدىكارىم ۇلى, قۋانىش سۇلتان ۇلى, احمەتجان سماعۇل ۇلى, قايىربەك شوشان ۇلى, ۇزاقباي سۇلەيمەن ۇلى, يۆان اداموۆيچ, مۇقاش زۇلقاينار ۇلى ۇيىمنىڭ قۇرىلۋىن جوعارى باعالاپ, بارىنشا قولداۋ كورسەتۋگە ءازىر ەكەندەرىن جەتكىزدى.
جاڭا بىرلەستىكتىڭ ەلىمىزگە تانىمال 10 قۇرىلتايشىسى بار. ولار: ايدىن ايىمبەتوۆ, سەرىك اقشولاقوۆ, مۇحتار التىنباەۆ, ابزال ەراليەۆ, باقىتجان ەرتاەۆ, مۇقاش ەسكەندىروۆ, ايمان مۇساقوجاەۆا, يۆان ساۋەر, قايرات ۇمبەتوۆ جانە وسى جولداردىڭ اۆتورى.
بار ءومىرىن حالقىنا قىزمەت ەتۋگە ارناعان, باقىتىن ەلگە قىزمەت ەتۋدەن تاپقان جاندار بولادى. مەملەكەت باسشىسى قاسىم-جومارت توقاەۆ ۇلت ۇستازى احمەت بايتۇرسىن ۇلىنىڭ 150 جىلدىعى مەرەيتويىنا وراي: «شىن مانىندە, اقاڭنىڭ ءومىر جولى – ۇلتقا قىزمەت ەتۋدىڭ جارقىن ۇلگىسى» دەپ ايتقان ءسوزى تاريحي تۇلعالارىمىزدى عانا ارداقتاۋ ەمەس, سونىمەن بىرگە بۇگىندە ارامىزدا جۇرگەن مەملەكەتتىك جوعارى ماراپاتقا يە بولعان ازاماتتاردى دا ۇلگى تۇتىپ, قوعامعا كەڭ تانىتۋ دەپ بىلەمىز.
«تáyelsiz qazaqstannyń halyq batyrlary» قوعامدىق ۇيىم نەگىزىنەن «حالىق قاھارمانى» جانە «قازاقستاننىڭ ەڭبەك ەرى» ماراپاتى يەگەرلەرىن ناسيحاتتاۋ ءىسىن ءبىر ورتالىققا بىرىكتىرۋدى كوزدەيدى. قوعامدىق بىرلەستىكتىڭ ءاربىر مۇشەسىنىڭ ەڭبەك جولىن, ازاماتتىق بەينەسىن, ىزگىلىكتى ءومىر سالتىن حالىق اراسىندا كەڭىنەن ناسيحاتتايتىن ارنايى باعدارلامالار ازىرلەۋ كوزدەلگەنى قۇپتارلىق. ولاردىڭ جۇزەگە اسۋىنا بۇقارالىق اقپارات قۇرالدارىن, قوعامدىق جانە مەملەكەتتىك ۇيىمدارىن كەڭىنەن تارتۋ, كىتاپتار, البومدار, اۋديو-ۆيدەو قۇرالدار دايىنداپ, تاراتۋ جۇمىستارىن قولعا الۋ پاتريوتتىق باستاماشىلىق دەپ بىلەمىن.
ماراپات وزدىگىنەن كەلمەيدى. قوعامدىق ەڭبەك جەمىسىن كورسەتۋ قۇرالىنىڭ ءبىر ءتاسىلى رەتىندە قاراستىرعان ءجون. اعا بۋىندا بۇعان قۇشتارلىق كۇشتى بولدى. بۇل رەتتە, ەل ارداقتىلارىن تانىتاتىن تەتىكتى ىسكە اسىرۋدىڭ ۋاقىتى جەتكەن سياقتى. جاستاردى ەڭبەكشىل بولۋعا, ەڭبەك ەرلەرىنە قاراپ بوي تۇزەۋدى, ءوز ەلىنىڭ جەتىستىكتەرىنە ۇلەس قوساتىنداي جاعدايعا جەتكىزۋىمىز كەرەك. مۇنداي قادام ءبىزدىڭ تاربيە سالاسىنداعى ۇلكەن ولقىلىقتارعا جول بەرمەس ەدى.
مەملەكەت باسشىسى قاسىم-جومارت كەمەل ۇلى اتىراۋ وبلىسى جۇرتشىلىعىمەن كەزدەسۋدە ەلىمىزدەگى ارداگەرلەر كەڭەسىنىڭ قازاق حالقىنىڭ ءداستۇرلى ينستيتۋتى بولىپ كەلگەن اقساقالدار قاۋىمداستىعىنىڭ جالعاسى ەكەنىنە نازار اۋداردى. بۇگىندە ارداگەرلەر كەڭەسى جۇمىسىنىڭ بەلسەندىلىگىن ارتتىرۋ قاجەتتىلىگىن ايتتى. پرەزيدەنتتىڭ بۇل ءسوزى «تáyelsiz qazaqstannyń halyq batyrlary» جۇمىسىنىڭ نەگىزگى ارقاۋى دەپ سانايمىن.
بۇل رەتتە, ۇلت ۇستازى احمەت بايتۇرسىن ۇلىنىڭ: «الاشقا اتى شىققان ادامدار! كوسەمدىكتەرىندى اداسپاي ءتۇزۋ ىستەڭدەر! سەندەر اداسساڭدار, ارتتارىڭنان الاش اداسادى, ارتتارىنان ەرگەندەردىڭ وبال-ساۋاپتارىنا سەندەر قالاسىڭدار» دەگەن ءسوزى ويعا ورالادى. ءالى دە وزەكتىلىگىن جوعالتپاعان بۇل ءسوز قازىرگى ەل اعالارى مەن انالاردىڭ جاستارعا ۇلتتىق, رۋحاني-ادامگەرشىلىك, پاتريوتتىق ءتالىم-تاربيە بەرۋ ىسىنە ۇلەس قوسۋدى جاۋاپكەرشىلىكپەن اتقارۋ كەرەكتىگىن ەسكە سالادى.
ەڭ جوعارى ماراپات يەگەرى «حالىق قاھارمانى», «قازاقستاننىڭ ەڭبەك ەرى» دەگەن اتىنا ساي بولۋى مىندەتتى. بۇل – ولاردىڭ مەملەكەت الدىنداعى جاۋاپكەرشىلىگى, ازاماتتىق پارىزى.
ۇستاز رەتىندە «تáyelsiz qazaqstannyń halyq batyrlary» اتتى بىرلەستىكتىڭ جاس ۇرپاق تاربيەسى ءۇشىن تاپتىرماس ۇلگى ەكەنىن ايتا وتىرىپ, اتالعان بىرلەستىك مۇشەلەرىنىڭ ەڭبەك جانە ەرلىك ىستەرىن رەسپۋبليكا مەكتەپتەرىندە كەڭ ناسيحاتتاۋ جۇمىسىنا كوبىرەك كوڭىل بولىنسە ەكەن دەگەن تىلەگىمدى بىلدىرەمىن.
اياگۇل ميرازوۆا,
قازاقستاننىڭ ەڭبەك ەرى