باۋىر ەتى بالاسىنا اتا-انادان ارتىق كىم قامقور بولا الادى؟ ءومىردىڭ بار جاقسىسىن بالاسىنا كورسەتكىسى كەلەتىن اتا-انالار ءوتىنىشى كەيىنگى جىلدارى جەردە قالىپ جاتقان جوق. مەملەكەت باسشىسى قاسىم-جومارت توقاەۆتىڭ وتاندىق جەڭىل ونەركاسىپتى دامىتۋ اياسىندا مەملەكەتتىك تاپسىرىستاردى مەكتەپ فورماسىن ساتىپ الۋعا باعىتتاۋ تاپسىرماسى سوزىمىزگە تۇزدىق. بۇگىندە اتالعان جوباعا سايكەس ارنايى تسيفرلى پلاتفورمانى جۇزەگە اسىرۋ كوزدەلىپ وتىر.
يندۋستريا جانە ينفراقۇرىلىمدىق دامۋ مينيسترلىگىندە «اشىق ساعات الاڭى» اياسىندا مۇددەلى مەملەكەتتىك ورگاندارمەن بىرلەسىپ از قامتىلعان وتباسىلارعا قارجىلىق جانە ماتەريالدىق كومەك كورسەتۋ قاعيدالارى بويىنشا تسيفرلىق پلاتفورمانى ەنگىزۋ ماسەلەلەرى تالقىلاندى.
يندۋستريالىق دامۋ كوميتەتىنىڭ توراعاسى ءىلياس وسپانوۆتىڭ باسشىلىعىمەن وتكەن كەڭەستە جوبانى ىسكە قوسۋ ماسەلەلەرى قاراستىرىلىپ, قاناتقاقتى جوبانى الدىمەن استانا قالاسىندا, كەيىن ەلىمىزدىڭ بارلىق وڭىرىندە ەنگىزۋ جوسپارلاندى.
«قازىرگى ۋاقىتتا «الەۋمەتتىك ءاميان» پلاتفورماسى ارقىلى اتا-انالارعا بەلگىلى ءبىر دۇكەندەردە مەكتەپ فورماسىن ساتىپ الۋعا كەپىلحات بەرۋ ماسەلەسى قاراستىرىلۋدا. سونداي-اق وتاندىق تاۋار وندىرۋشىلەرگە مەكتەپ فورماسىن ساتۋ ءۇشىن جەڭىلدىكتى شارتتارمەن ساۋدا نۇكتەلەرى ۇسىنىلعانى ءجون. وسىعان بايلانىستى وتاندىق تاۋار وندىرۋشىلەردىڭ ءتىزىلىمىن قالىپتاستىرۋ قاجەت. باستى تالاپتاردىڭ ءبىرى – ۇلتتىق ستاندارتتارعا سايكەس ءونىم ءوندىرىسىن انىقتاۋ», دەپ اتاپ ءوتتى ءى.وسپانوۆ.
جوبا ناتيجەسىندە بيۋدجەت قاراجاتىن نىسانالى ماقساتتا جۇمساۋدىڭ اشىقتىعى قامتاماسىز ەتىلەتىندىگى, سونداي-اق مەكتەپ فورماسىن شىعارۋ باعىتىنداعى وتاندىق ءوندىرىس كولەمىن ارتتىرۋعا ىقپال جاسالاتىنى شىنىندا قۋانىشتى جايت. از قامتىلعان وتباسىلارعا قارجىلىق جانە ماتەريالدىق كومەك كورسەتۋ قاعيدالارى اياسىندا كيىم, اياقكيىم, مەكتەپ كەرەك-جاراقتارىن ساتىپ الۋعا كومەك اتا-انالاردىڭ وتىنىشىنە سايكەس ەڭ تومەنگى كۇنكورىس دەڭگەيىنەن تومەن ەمەس مولشەردە اقشالاي بەرىلەتىنىن اتاپ وتكەن ءجون.
ارينە, ءار بالانىڭ قاتارىنان قالماي وسۋىنە بارىنشا جاعداي جاساۋ, مەيلىنشە كوڭىل ءبولۋ – قاي اتا-انانىڭ بولسىن مەرەيىن اسىرارى ءسوزسىز. «باقىت دەگەن – مەنىڭ بالا كۇندەرىم» دەپ مۇقاعالي جىرلاعانداي, بالالىق شاق اركىمنىڭ جادىندا تەك قىزىقتى دا باقىتتى ساتتەرىمەن ەستە قالۋعا ءتيىس.