پاۆلودار وبلىسىندا 1 200 باس ءىرى قاراعا ارنالعان تاۋارلى ءسۇت فەرماسى ىسكە قوسىلدى. جوبا سەگىز اي ىشىندە جۇزەگە اسىرىلىپ, زامانعا ساي تەحنولوگيالارمەن جاراقتالدى. مۇندا كۇنىنە 30 مىڭ ليتر ءسۇت ساۋىلماق.
«AgroTrade PV» جشس-نىڭ جاڭا تاۋارلى ءسۇت فەرماسى پاۆلودار اۋدانىنداعى ولگينو اۋىلىندا ورنالاسقان. فەرمەرلىك شارۋاشىلىق ديرەكتورى قۋانىش تەمىرعاليننىڭ ايتۋىنشا, مۇندا كۇنىنە 30 مىڭ ليترگە دەيىن ءسۇت ءوندىرۋ جوسپارلانىپ وتىر. ال كاسىپورىن تولىق قۋاتتىلىق دەڭگەيىنە شىققان كەزدە جىلىنا 10 مىڭ توننا ءسۇت ساۋىلماق.
فەرما كەشەنىندە 100-گە جۋىق جاڭا جۇمىس ورنى قۇرىلدى, قىزمەتكەرلەردىڭ نەگىزگى بولىگىن جەرگىلىكتى تۇرعىندار قۇراپ وتىر. مۇندا ءسۇت شارۋاشىلىعىنان بولەك كارتوپ, ءداندى داقىلدار مەن مال ازىعى وسىرىلەدى. 1 700 گەكتار سۋارمالى القاپتار شارۋاشىلىقتا ۇستالاتىن ت ۇلىككە قاجەت جەم-ءشوپتى وسىرۋگە جەتكىلىكتى.
– قازىر بىزدە دانيادان اكەلىنگەن گولشتين-فريز تۇقىمدى 476 باس ءىرى قارا بار. تاعى دا قوسىمشا 1 200 باس سيىر ساتىپ الۋ جوسپارلاندى. جوبا مەملەكەتتىڭ قولداۋىمەن جۇزەگە اسىرىلدى. 40 سيىرعا شاقتالعان ساۋىن بلوگى ورناتىلدى. ءوندىرىستىڭ اۆتوماتتاندىرىلعان پروتسەسى جانە ءسۇت باعىتىنداعى اسىل تۇقىمدى سيىرلاردىڭ بولۋى جوعارى كورسەتكىشتەرگە قول جەتكىزۋىمىزگە مۇمكىندىك بەرەدى, – دەدى قۋانىش تەمىرعالين.
بۇل فەرمانىڭ ناتيجەسىندە وڭىردەگى ءسۇت ءوندىرىسى قوسىمشا 10 مىڭ تونناعا ۇلعايىپ, جەرگىلىكتى نارىقتى ءسۇت ونىمدەرىمەن قامتۋ كورسەتكىشى وسەدى. پاۆلودار وبلىسىندا سوڭعى ءۇش جىلدىڭ ىشىندە 14 تاۋارلى ءسۇت فەرماسى اشىلعان. الداعى ءۇش جىلدا 100-دەن استام ينۆەستيتسيالىق جوبانى قارجىلاندىرۋ كوزدەلىپ وتىر.
– مال شارۋاشىلىعى, سونىڭ ىشىندە ءسۇت شارۋاشىلىعىن دامىتۋعا بۇگىندە كوپ كوڭىل بولىنۋدە. ءوزىمىزدىڭ اعارعانمەن جەرگىلىكتى نارىقتى بارىنشا قامتىپ, يمپورتتىق ونىمدەردى شەكتەۋ ماسەلەسىن مەملەكەت باسشىسى مىندەت ەتتى. سول ۇدەدەن كورىنۋدىڭ ءبىر كورىنىسى – بۇگىن اشىلىپ وتىرعان تاۋارلى ءسۇت فەرماسى. الداعى ەكى جىلدا وڭىردە تاعى وسىنداي 8 فەرما سالىنادى دەگەن جوسپار بار. ناتيجەسىندە ءسۇت باعىتىنداعى اسىل تۇقىمدى سيىرلار سانى 6 مىڭ باسقا ۇلعايىپ, ءسۇت ءوندىرۋ 43 مىڭ تونناعا جەتپەك. اۋىل شارۋاشىلىعى سالاسىنداعى قارقىندى دامۋعا ەرتىس وزەنىنىڭ جاقىن ورنالاسۋى دا ۇلكەن سەبەپ بولۋدا. وزەن سۋىن پايدالانىپ, سۋارمالى جەرلەردىڭ سانىن ارتتىرۋعا ۇلكەن قادامدار جاسالۋدا. قازىرگى كۇنى سۋارمالى القاپتار 142 مىڭ گەكتارعا جەتتى, – دەپ اتاپ ءوتتى وبلىس اكىمى ابىلقايىر سقاقوۆ.
كەيىنگى ءۇش جىلدا وبلىستاعى اۋىل شارۋاشىلىعى ءوندىرىسىنىڭ تيىمدىلىگى 4,5 ەسەگە ارتقان. ال 2020 جىلدان بەرى سالادا شىعارىلعان ءونىمنىڭ جالپى كولەمى 1,8 ەسەگە ءوستى. قازىرگى ۋاقىتتا ايماقتا جالپى سانى 37 تاۋارلى ءسۇت فەرماسى جۇمىس ىستەپ تۇر.
پاۆلودار وبلىسى,
پاۆلودار اۋدانى