ءمامس جۇيەسىن ەنگىزۋ بالالار دەنساۋلىعىن ساقتاۋعا جانە ەمدەۋگە كوبىرەك قاراجات بولۋگە مۇمكىندىك بەردى. ءبىر بالا ءۇشىن جۇمسالاتىن دەنساۋلىق ساقتاۋ جۇيەسىنىڭ شىعىندارى 22%-عا ءوستى. جۋىردا الەۋمەتتىك مەديتسينالىق ساقتاندىرۋ قورىندا بالالارعا مەديتسينالىق كومەككە قانشا قاراجات جۇمسالعانى تۋرالى ەسەپ بەرىلدى.
اتالعان قور قازاقستاندىق بالالار ءمامس جۇيەسىندە اۆتوماتتى تۇردە ساقتاندىرىلعانىن ەسكە سالدى. ولار ءۇشىن جارنالاردى جسن العان ساتتەن باستاپ كامەلەتكە تولعانعا دەيىن مەملەكەت تولەيدى. بۇل بالالارعا تمككك اياسىندا عانا ەمەس, ءمامس پاكەتىنە كىرەتىن مەديتسينالىق كومەكتى دە الۋعا مۇمكىندىك بەرەدى.
الەۋمەتتىك مەديتسينالىق ساقتاندىرۋ قورىندا حابارلاعانداي, ەمحانالارعا تىركەلگەن بالالار سانى جىل سايىن ارتىپ كەلەدى. 2020 جىلى تۋعاننان باستاپ 17 جاسقا دەيىنگى 6 ملن 290 مىڭعا جۋىق, 2021 جىلى 6 ملن 467 مىڭنان استام, ال 2022 جىلدىڭ 9 ايىنىڭ قورىتىندىسى بويىنشا 6 ملن 568 مىڭنان استام بالا تىركەلگەن.
«بىلتىر بالالارعا تمككك جانە ءمامس اياسىندا جالپى 350 ملرد تەڭگەگە مەديتسينالىق كومەك كورسەتىلدى. بيىل 33 %-عا ءوسىم كۇتىلۋدە. 2022 جىلدىڭ 9 ايىندا 324 ملرد تەڭگەگە مەديتسينالىق قىزمەتتەر كورسەتىلدى», دەلىنگەن قور اقپاراتىندا.
شىعىستاردىڭ نەگىزگى ۇلەسىن امبۋلاتوريالىق-ەمحانالىق كومەك (53%) قۇرايدى. بيىلعى جىلدىڭ 9 ايىندا وعان 232 ملرد تەڭگە جۇمسالدى. وسى كەزەڭدە بالالار تاۋلىك بويعى ستاتسيونارلاردا 300 مىڭ جاعدايدا 70 ملرد تەڭگەگە جۋىق, كۇندىزگى ستاتسيونارلاردا 39 مىڭ جاعدايدا 3 ملرد تەڭگەگە جۋىق قاراجاتقا ەمدەلدى. بۇدان باسقا, اۋىلدىق ستاتسيونارلاردا 15 ملرد تەڭگەدەن استام سوماعا 120 مىڭعا جۋىق بالا ەم الدى. 2022 جىلدىڭ 9 ايىنىڭ قورىتىندىسى بويىنشا بالالارعا جوعارى تەحنولوگيالىق مەديتسينالىق كومەك كورسەتۋگە 768 جاعداي بويىنشا شامامەن 3,4 ملرد تەڭگە ءبولىندى.
ءمامس جۇيەسى ەنگىزىلگەلى مەديتسينالىق وڭالتۋ سىندى ماڭىزدى باعىت قارقىندى دامىپ كەلەدى. بالالار كورسەتكىشتەرى بويىنشا وڭالتۋعا تەگىن جىبەرىلەدى. اتالعان كەزەڭدە تاۋلىك بويعى جانە كۇندىزگى ستاتسيونارلار جاعدايىندا 70 مىڭعا جۋىق بالا 12,6 ملرد تەڭگەدەن استام قاراجاتقا ەمدەلدى.
سونداي-اق اۋرۋلاردىڭ الدىن الۋعا كوپ كوڭىل بولىنەدى. اتالعان كەزەڭدە بالالاردى پروفيلاكتيكالىق تەكسەرۋگە شامامەن 30 ملرد تەڭگە باعىتتالدى. 9 ايدىڭ قورىتىندىسى بويىنشا مەكتەپ مەديتسيناسى قىزمەتتەرى ءۇشىن 20 ملرد تەڭگە تولەندى, كۇندىزگى ستاتسيونار جاعدايىندا باعدارلامالىق گەمودياليز قىزمەتتەرى 13 ملرد تەڭگەدەن استام سوماعا كورسەتىلدى. بالالاردى امبۋلاتوريالىق ءدارى-دارمەكپەن قامتاماسىز ەتۋگە 5 ملرد تەڭگە ءبولىندى.
ء«مامس جۇيەسى حالىقتىڭ الەۋمەتتىك وسال توپتارىنا تەگىن ستوماتولوگيالىق كومەك كورسەتۋگە مۇمكىندىك بەرەتىنى بەلگىلى. تالداۋ كورسەتكەندەي, ءمامس بويىنشا ستوماتولوگيالىق كومەكتىڭ نەگىزگى تۇتىنۋشىلارى – بالالار. 2022 جىلدىڭ 9 ايىندا 25,1 ملرد تەڭگەگە 8,8 ملن-عا جۋىق ستوماتولوگيالىق قىزمەت كورسەتىلدى», دەپ مالىمدەدى قور وكىلدەرى.
جالپى العاندا, 1 بالاعا ارنالعان شىعىستار 2021 جىلعى 54,1 مىڭ تەڭگەدەن 2022 جىلى 65,8 مىڭ تەڭگەگە دەيىن ۇلعايدى.