قازاق ەلى ءوز جولىن ايقىندادى

وڭىرلەردەن جەتكەن دەرەكتەرگە كوز جۇگىرتسەك, اباي وبلىسى بويىنشا – 80,18, اقمولا وبلىسى بويىنشا – 78,87, اقتوبە وبلىسى بويىنشا – 72,81, الماتى وبلىسى بويىنشا – 72,10, اتىراۋ وبلىسى بويىنشا – 70,87, باتىس قازاقستان وبلىسى بويىنشا – 68,67, جامبىل وبلىسى بويىنشا – 79,57, جەتىسۋ وبلىسى بويىنشا – 81,42, قاراعاندى وبلىسى بويىنشا – 78,39, قوستاناي وبلىسى بويىنشا – 79,28, قىزىلوردا وبلىسى بو­يىنشا – 81,7, ماڭعىستاۋ وبلىسى بويىنشا – 66,99, پاۆلودار وبلىسى بويىنشا – 77,58, سولتۇستىك قازاقستان وبلىسى بويىنشا – 79,1, تۇركىستان وبلىسى بويىنشا – 80,37, ۇلىتاۋ وبلىسى بويىنشا – 75,48, شىعىس قازاقستان وبلىسى بويىنشا – 79,49, استانا قالاسى بويىنشا – 48,60, الماتى قالاسى بويىنشا – 28,72, شىمكەنت قالاسى بويىنشا 59,79 پايىز تۇرعىندار داۋىس بەردى.

سونىمەن قاتار 53 شەت مەملەكەتتەگى 68 ۋچاسكەدە 12 مىڭنان استام قازاقستان ازاماتى داۋىس بەرۋگە مۇمكىندىك الدى. داۋىستاردى ساناۋ ناتيجەلەرى اۋماقتىق سايلاۋ كوميسسيالارىنىڭ وتىرىستارىندا بەلگىلەنىپ, ورتالىق سايلاۋ كوميسسيا­سىنا ەكى كۇندىك مەرزىمدە جەتكىزىلەدى. سايلاۋدىڭ الدىن الا قورىتىندىلارى 22 قاراشاعا دەيىن جاريالانۋعا ءتيىس. «ەل ىشىندەگى بارلىق سايلاۋ ۋچاسكەسىندە داۋىس بەرۋ اياقتالدى. بۇكىل كەزەڭ بويى داۋىس بەرۋ ۇدەرىسىن كانديداتتاردىڭ سەنىم بىلدىرگەن وكىلدەرى, ساياسي پارتيالاردىڭ وكىلدەرى, قوعامدىق بىرلەستىكتەر, بۇقارالىق اقپارات قۇرالدارى باقىلادى. قورىتىندى ستاتيستيكا بۇگىن ۇسىنىلادى. سايلاۋشىلار تىزىمىنە قوسىلماعان جانە تىركەۋى جوق ازاماتتارعا دا داۋىس بەرۋ مۇمكىندىگى بەرىلدى. ناتيجەسىندە, 2 260 سايلاۋشى سونداي مۇمكىندىككە يە بولدى», دەدى ورتالىق سايلاۋ كوميسسياسى توراعاسىنىڭ ورىنباسارى كونستانتين پەتروۆ.

ساعات 22.00-دەگى جاعداي بويىنشا شەت مەملەكەتتەردەگى قازاقستان وكىلدىكتەرى جانىنان اشىلعان 68 ۋچاسكەنىڭ 24-ءى جۇمىسىن اياقتادى. داۋىس بەرۋ تەك 44 ۋچاسكەدە ءجۇرىپ جاتىر.

جالپى, سايلاۋ كۇنى تاڭعى 7.00-دەن باستاپ اباي وبلىسىندا – 475, اقمولا وب­لى­سىندا – 717, الماتى وبلىسىندا – 606, شىعىس قازاقستان وبلىسىندا – 537, جامبىل وبلىسىندا – 493, جەتى­سۋ وبلىسىندا – 447, قاراعاندى وبلىسىن­دا – 642, قوستاناي وبلىسىندا – 745, پاۆ­لو­دار وبلىسىندا – 528, سولتۇستىك قازاق­ستان وبلىسىندا – 640, تۇركىستان وبلى­سىندا – 919, ۇلىتاۋ وبلىسىندا – 136, استانا قالاسىندا – 406, الماتى قالا­سىندا – 600, شىمكەنت قالاسىندا 311 سايلاۋ ۋچاسكەسى جۇمىس ىستەدى. ال قالعان 5 وڭىردە, اتاپ ايتقاندا اقتوبە, اتى­راۋ, ماڭعىستاۋ, باتىس قازاقستان جانە قىزىل­وردا وبلىستارىنداعى 1 883 سايلاۋ ۋچاس­كە­سىندە داۋىس بەرۋ جەرگىلىكتى ۋاقىتپەن ساعات 07-00-دە, ياعني استانا ۋاقىتىمەن ساعات 08-00-دە باستالىپ, ساعات 21.00-دە اياقتالدى.

سايلاۋ زاڭناماسىندا كوزدەلگەن تار­تىپ­پەن اۋماقتىق كوميسسيالار داۋىس بە­رۋدى باستاۋدىڭ وزگە ۋاقىتىن بەل­گى­لەۋ جونىندە شەشىم قابىلداعانىن اتاپ وتكەن ءجون. وبلىستاردىڭ, استانا, ال­ماتى, شىمكەنت قالالارىنىڭ اۋماقتىق كوميسسيالارىنان ۇسىنىلعان جەدەل ما­لى­مەتتەر بويىنشا ءتيىستى اۋماقتىق كوميس­سيالاردىڭ شەشىمدەرىمەن 86 سايلاۋ ۋچاسكەسىندە دا­ۋىس بەرۋ جەرگىلىكتى ۋاقىت بويىنشا تاڭعى ساعات 06.00-دە باستالدى. قالا قۇراۋشى كاسىپورىنداردىڭ اۋىسىمدىق جۇمىس كەستەسى ەسكەرىلدى. ونىڭ 47-ءسى ازاماتتاردىڭ ۋاقىتشا بولاتىن جەرلەرىندەگى ۋچاسكەلەر. بۇدان بولەك, 514 سايلاۋ ۋچاسكەسىندە داۋىس بەرۋدىڭ اياقتالۋ ۋاقىتىن ساعات 20-00-گە دەيىن شەكتەۋ تۋرالى شەشىم قابىلدانعان جوق. ياعني اسكەري بولىمدەردە, ستاتسيونارلىق ەمدەۋ-پروفيلاكتيكالىق مەكەمەلەردە, الىس جانە جەتۋ قيىن اۋدانداردا, شالعايداعى مال شارۋاشىلىعى ۋچاسكەلەرىندە, دەمالىس ۇيلەرىندە, ساناتوريلەردە, تەرگەۋ يزولياتورلارى مەن ۋاقىتشا ۇستاۋ ورىندارىندا, سونداي-اق قازاقستاننىڭ شەت مەملەكەتتەردەگى وكىلدىكتەرى جانىنان قۇرىلعان ۋچاسكەلىك سايلاۋ كوميسسياسى تىزىمىنە ەنگىزىلگەن بارلىق سايلاۋشىلار داۋىس بەرگەن جاعدايدا كەز كەلگەن ۋاقىتتا «داۋىس بەرۋ اياقتالدى» دەپ جاريالاۋعا مۇمكىندىك بەرىلدى.

ىشكى ىستەر مينيسترلىگى سايلاۋ كەزەڭى قالىپتى جاعدايدا وتكەنىن مالىمدەدى. «سايلاۋ كۇنى قۇقىق قورعاۋ ورگاندارى ەلدەگى قاۋىپسىزدىك شارالارى مەن قۇقىق­تىق ءتارتىپتىڭ ساقتالۋىن كۇشەيتىلگەن رە­جىمدە قامتاماسىز ەتتى. 10 مىڭعا جۋىق سايلاۋ ۋچاسكەسىندە 20 مىڭ پوليتسيا قىزمەتكەرى قىزمەت اتقارسا, بۇدان بولەك قوعامدىق ورىنداردا 14 مىڭداي ساقشى جۇمىس ىستەدى», دەدى ىشكى ىستەر مينيسترلىگى اكىمشىلىك پوليتسيا كوميتەتىنىڭ توراعاسى جاندوس مۇراتاليەۆ.

زاڭنامادا سايلاۋ قورىتىندىلارىن بەلگىلەۋگە جانە جاريالاۋعا, سايلانعان پرەزيدەنتتى تىركەۋ سايلاۋدان كەيىن 10 كۇننەن اسپايتىن مەرزىمدە كوزدەلگەن. بۇل جولى سايلاۋ قورىتىندىلارىن انىقتاپ, ساي­لانعان پرەزيدەنتتى تىركەۋگە 7 كۇن بەرى­لىپ وتىر.

ەستەرىڭىزگە سالا كەتەيىك, 20 قاراشادا ورتالىق سايلاۋ كوميسسياسى كۇنى بويى ۋچاسكەلەردىڭ اشىلۋى جانە داۋىس بەرۋدىڭ باستالۋى تۋرالى اقپارات بەرىپ وتىردى, سونداي-اق ءاربىر ەكى ساعات سايىن وسك مۇشەلەرى داۋىس بەرۋشىلەردىڭ كەلۋى تۋرالى وبلىستاردىڭ, رەسپۋبليكالىق ماڭىزى بار قالالاردىڭ, ەلوردانىڭ اۋماقتىق كوميسسيالارىنىڭ دەرەكتەرىن جاريالادى.

رەسپۋبليكا بويىنشا ۋچاسكەلەردە داۋىس بەرۋ ساعات 20.00-دە اياقتالسا, رەسپۋبليكا اۋماعىنداعى ساعات بەلدەۋلەرىنىڭ شەكارالارىنا سايكەس بەس وڭىردە – اقتوبە, اتىراۋ, باتىس قازاقستان, قىزىلوردا جانە ماڭعىستاۋ وبلىستارىندا داۋىس بەرۋ ەلوردا ۋاقىتى بويىنشا ساعات 21.00-دە اياقتالدى.

وبلىستاردىڭ, رەسپۋبليكالىق ماڭىزى بار قالالاردىڭ, ەلوردانىڭ كوميسسيالارى ۇسىنعان دەرەكتەرگە سايكەس 2022 جىلعى 20 قاراشادا استانا ۋاقىتىمەن ساعات 22.00-دەگى جاعداي بويىنشا تىزىمگە ەنگىزىلگەن ازاماتتاردىڭ جالپى سانىنىڭ 69,43%-ى بيۋللەتەن العان.